2 Ebitru 2 - Ohwihwim Olehe

Moa la a nye onyenye ba akpro

¹ Moare la a sheŋ akpro ma Ahogbrẽ angyiŋ a hom mo otum, a zgi eshki moare ayga, ekakahelo angyiŋ, moare la a nye onyenye ba akpro á ba a zgi eshki bimi. Moa á nye onyenye la o wo oyla, ta la onyenye ba akpro nga, moa á dzu evom ba Adigi-odne la a shla mo, nga moa á jygi oshoshoŋ okyku lo.

² Ambo ekakahelo a mbo, moare nzenze á dzu mo ezhẽ ba eshre nga okyku edgu ayakplo ba moa a la a kpo, moare á tsa Ozhẽ ba adlidzi atsa.

³ Nga okyku ohwlayi mo, moa la a nye onyenye ba akpro lo, moa á hwiŋ ohwihwiŋ okyku oshpa ba ototno ba moa a kpo, nga a lu ka la gimi. Omba o dga nzenze ba are la a sõ mo ombgu a la a dzu a bli mo. Nga omba o dga nzenze ba are la a jygi mo lo a la a dzu a kʼpu!

⁴ Okyku eshi Ahogbrẽ a ka a dzu moanwyeadga la a kpo odlobi a mbo a zga mbo ku-ku. Ambo a shri mo a shri a ygi enzheovo. Ahe lo, moa a ta mo aslika a ygi evbu, nga moa a dzu a bli Olum onda ba Ombgu lo.

⁵ Ahogbrẽ a ka a dzu obiŋ ba ogbyi lo a zga mbo ku-ku. Ambo a da ami a ba a shki moarehwĩ la a wo abi obiŋ hi lo, nga a shla Onuhu la a su odlodzi, pa la moarehwĩ afoha ahwõ sha.

⁶ Ahogbrẽ a shraŋ moarehwĩ ba esku ba Osodom ta la Ogomora, nga a jygi mo la ovo, nga a da lo o dzu egŋe okyku moarehwĩ ba odlobi, eshri ekplo la é ba e kpo pa la mo.

⁷ Aŋa angyiŋ a shla Olotu la a wo arehwĩ ba odlodzi. Ambo edgu odzudzu ba eshre ba moarehwĩ la a yi odaŋ mbo e kpo ŋa ewu nzenze.

⁸ Okyku eshi arehwĩ ba odlodzi he lo a dzu pa la mo ombamba pyeŋ, nga a la a ka nga a gno odlo eshri edgu ayakplo he lo, nga ayakplobi ba moa a la a kpo lo, a tpi ŋa esõ ayi a gre eshri.

⁹ Okyku eka he, Adigi-odne a yi eka baŋ a se moarehwĩ ba Ahogbrẽ a sku ewu ba moa a wo ma. Nga a sa a yi eka baŋ á shri ewu á zga ma okyku moarehwĩ ba odlobi Olum onda ba Ombgu lo.

¹⁰ Ombgu o wo ma zhezheŋ okyku moarehwĩ la a klo ayakplo ba eshre ba egʼba, nga moa a la a dzĩ ekʼpo ba Ahogbrẽ. Moa la a nye onyenye ba akpro he lo, moa a shpi esõ nga moa a la a hre egʼba. Nga moa a la a ka olbi ba ama ba esesla la a wo ongyeŋ mbo. Ambo moa a dzĩ lo a sku.

¹¹ Moanwyeadga ba Ahogbrẽ la a wo la oshye ta la ekʼpo a gre moare la a nye onyenye ba akpro, moa a la a hrẽ mo egi ayi ba Adigi-odne mbo.

¹² Ambo moare he lo moa a la a kpo ayakplo okoklo ba egʼba sha angyiŋ eka ba ébyi ba akla, ba moa a mbre mo okyku o da mo a vu mo nga a bga. Moa a la a dzĩ ayakplo ba moa a ka lo a bmye mbo. Moa á bga mo eka ba ébyi ba akla ototno.

¹³ Egbre mo é wo ewu angyiŋ okyku ewu ba moa a shri a ba. O kpo ayakplo la á ba a shri oraŋ á shri á kom mo egʼba egi ayi moare angyiŋ, o wo ekplo ba oraŋ okro mo. Moa a dzu ekplo ba anzi ta la ekplo ba ototno angyiŋ omba ba moa a la a ba a ri algo ka la gimi otsotse, nga moa a la a gno emo oraŋ ta la ezhẽ ba obile mo lo!

¹⁴ Moa a la a klo o ka ekplokyeŋ ku-ku mbo, o wo le moashe ba eshre sha. Ogroayi mo okyku o kpo odlobi ó khwo mbo ku-ku. Moa a la a da moa la a wo oshye esõ mbo a gbu amgbaŋ. Moa a sheŋ a nye eda ba okayiogro esõ mo bgu. Moa a wo abgo ba ogbukyu ba Ahogbrẽ angyiŋ!

¹⁵ Moa a sheŋ a dzu ozhẽ la o wo kye a zga, nga moa a ta akpu ozhẽ lo. Moa a zhiŋ a sõ ozhẽ ba Abalam anwye ba Obosoro. Aŋa a klo amgbaŋ baŋ moa a hwiŋ lo ozhẽ ba o kpo ayakplobi.

¹⁶ Ambo moa a shrom ŋa okyku odlobi baŋ a kpo. Okyku eshi ashrishri la a lu odlo a gbu mbo a lu odlo la enzi ba are-hwĩ, nga alo a nyom are ba moa a hom ŋa otum okyku o kpo ekplo adro baŋ a klo o kpo-kpo lo.

¹⁷ Moarehwĩ he lo, moa a wo eka ba eyi ami la e mom angyiŋ. Moa a wo eka ba etabro ba ogbga ogbu o la o hlu lo. Ahogbrẽ nga a shri okro, okro la o hwĩ evbu mgbyimgbyiŋ angyiŋ a shri a zga okyku mo.

¹⁸ Moa a la a lu odlo la ega, nga moa a lu odlo ba ototno. Nga moa a tsa moare okoklo eshre ba egʼba okyku o bile moare la a zga ngre nga a zgi eshki ba moarehwĩ ba odzudzu mo o wo eka lo mbo.

¹⁹ Moarehwĩ he lo, moa a la a hwim ba moahwõ á hwiŋ odzudum, ambo moa ababgo mo a mbo, moa a wo moawaghrẽ ba edgu odzudzu ba oyla angyiŋ. Arehwĩ nga a wo awa-ghrẽ angyiŋ okro ekployaŋ a mbo la e kpo e gre ŋa.

²⁰ Okyku eshi, o wo ba moarehwĩ a gro abgo ba ekʼpo ba ozhẽ ba eku ba obiŋ hi, ohe lo o kpo ozhẽ ba oyioyi ba Adigi-odne la a wo Areoshla bi Eyesu Ekristi, nga o wo ba moa a bla a vu mo, nga moa a kpo a gre mo, moa edgu moarehwĩ he lo, odzudzu mo o wo obi o gre eka ba omba ba moa a wo oriori.

²¹ O raŋ o gre e mbi ba moa a dzu efĩ ozhẽ ba odlodzi o gre ba moa a yi lo a khwo nga, a sa a dzu ozhẽ ba odaŋ ba esesla ba moa a shri a da mo a zga!

²² Ekplo la e kpo pa la mo e tsa ba egŋe lo e wo adlidzi angyiŋ. Egŋe lo e lu mi le, Abu a sa a bla a gre ogzo baŋ a gzo lo, nga okoko ba moa a sheŋ lo a nglo, o bla o gre o yi o byiŋ amwre.