1 MoaEtasolonika 5 - Ohwihwim Olehe

Agimi e nyuŋ e dzu okyku oba-ba ba Adigi-odne

¹ Agimi anáŋ, o dzu omgbybi ba ame e ta gimi akpa eshri omba ta la onda ba ayakplo he lo á ba a kpo mbo.

² Okyku eshi agimi a mbo ababgo bimi e yi zhezheŋ ba olum Onda ba Adigi-odne ó ba o ba eka ba asi a la a ba okyukyku angyiŋ.

³ Omba ba moare a lu mi le, Ekployaŋ a mbo e wo yoŋ nga ekplokyeŋ ba o ngʼba esõ e wo ma mbo, omba he lo angyiŋ ewu é ba e gnyu pa la mo! Moa á gro mbo ku-ku. Ewu he lo é wo eka ba ewu ba ashe a la a gno omba baŋ a kpo ombrombre.

⁴ Ambo agimi anáŋ, agimi e wo evbu angyiŋ mbo, okyku eka he agimi e da Olum lo o gnyu gimi ognyu eka ba asi a la a gnyu moare mbo.

⁵ Agimi pyeŋ e wo moarehwĩ ba ayimom angyiŋ. Agimi e wo moarehwĩ ba olulum angyiŋ. Agi e wo moarehwĩ ba okyukyku o mbo le moarehwĩ ba evbu angyiŋ mbo.

⁶ Okyku eka he o raŋ o gre ba agi e la e ndze enu eka moahwõ mbo. O raŋ o gre ba agi e dzu ayi nga e nyuŋ eshri bi e zga.

⁷ Okyku eshi moare a la a ndze enu okyukyku angyiŋ, nga la okyukyku angyiŋ moare a la a wa ajige a kpo ayi.

⁸ Ambo agi e wo moarehwĩ ba olulum angyiŋ, okyku eka he o raŋ o gre ba agi e nyuŋ eshri bi e zga. O raŋ o gre ba agi e tspi obmi ba adlidzi ta la oklo angyiŋ eka ba ombyli ba egi ayi. Nga agi e sko oshla ba agi e la e ka ayi ozhẽ okyku lo e zga eka ba etka ba ahwre.

⁹ Ahogbrẽ a sla gi okyku o da gi e kpo ewu abgo ombgu baŋ angyiŋ mbo, ambo okyku o da gi e hwiŋ oshla abgo ba Adigi-odne Eyesu Ekristi,

¹⁰ la a kpu okyku o da gi e dzu otsotse ka la ŋa omba baŋ á ba. O wo ba agi e wo ma la esõ o mbo le e kpu a mbo, o wo okyekyeŋ okro baŋ.

¹¹ Okyku eka he, e shri oshye-esõ e da gimi nga e kpo e ghwo la egimi eka ba agimi e la e kpo ohuhuhi.

Onyenye ba amom-abgo ta la oshko ba amom-abgo

¹² Agimi anáŋ, agi e vẽ gimi okyku o da gimi e fa olbi e da moa la a la a kpo otum agʼbaha bimi eka ba alo o raŋ o gre, moa ba Adigi-odne a sla mo okyku o da mo a tsa gimi nga a nye gimi.

¹³ E ka mo la olbi nzenze ta la oklo, okyku otum ba moa a la a kpo. E dzu opyapyaŋ ta la egimi.

¹⁴ Agi e shĩ gimi, agimi anáŋ, okyku o da gimi e shĩ moa la a da egʼba e shki mo ami pa la moa la a la a kpo eyli, e kpo e ghwo la moa la a wo la oshye ba esõ ma mbo, nga e kpo heheŋ pa la moare pyeŋ.

¹⁵ E nyuŋ e kpo-kpo, o wo ba anáŋ a kpo eshki bimi odlobi le, a bla ŋa a kpo ŋa mbo, ambo ombamba pyeŋ e hwiŋ esõ bimi nga e kpo ayakplo adzi ta la egimi ta la areyaŋ a mbo.

¹⁶ Agimi e dzu la ovye ombamba pyeŋ.

¹⁷ Nga e fa olu ombamba pyeŋ.

¹⁸ E vye la Ahogbrẽ okyku ekployaŋ a mbo, okyku eshi Ahogbrẽ a klo eka he angyiŋ ka la gimi ibu odzudzu bimi okro ba Ekristi Eyesu.

¹⁹ Agimi e tpi Ogbgaodzi esõ ayi mbo.

²⁰ E dzĩ oshpa ba Ogbgaodzi o tsa gimi mbo.

²¹ Agimi e mbga ekployaŋ a mbo e ka. E kpaŋ ekplo la e wo edzi,

²² nga e ngʼba e sku ekployaŋ a mbo la e wo ebi.

²³ Ahogbrẽ nga la a la a shri opyapyaŋ a shri a da gimi, aŋa á bmi á zhiŋ gimi á da gimi e dzu moarehwĩ baŋ ekpyemgbyeŋ nga á da odzudzu bimi pyeŋ, ta la esõ bimi, ta la ayaŋ ba esõ bimi, ta la egʼba bimi, é ngʼba é sku akpuyaŋ a mbo omba ba oba-ba ba Adigi-odne Eyesu Ekristi.

²⁴ Aŋa la a bzi gimi, aŋa á kpo lo, okyku eshi aŋa a wo a ba adlidzi!

²⁵ Agimi anáŋ e fa olu okyku gi a mbo.

²⁶ Nga e shko moanáŋ pyeŋ la oshko ba oklo.

²⁷ Ame e shĩ gimi okro ekʼpo ba Adigi-odne okyku o da gimi e tsi akpa he lo e ygi moanáŋ pyeŋ.

²⁸ Okpoghwo ba Adigi-odne Eyesu Ekristi o dzu ka la gimi.