1 MoaEtasolonika 2 - Ohwihwim Olehe

Otum ba Oblus osku ba Etasolonika

¹ Agimi anáŋ a mbo e sheŋ e yi ba oba-ba ba agi e ba okro bimi o wo otum ototno angyiŋ mbo.

² Agimi e yi eka ba moa a kpo gi ewu, nga moa a dzĩ gi osku ba Efilibi omba ba agi e ba okro bimi osku ba Etasolonika a wo mbo. Ambo Ahogbrẽ a shri oshye-esõ a shri a da gi okyku o da gi e lu Oshpaodzadzi la o zgi okro ba Ahogbrẽ e ygi gimi. Oklaodlo o wo ma egyagi a mbo agi e lu.

³ Ovevẽ ba agi e la e vẽ gimi he, o wo akpu angyiŋ mbo, nga o zgi aga abi angyiŋ mbo, nga agi e la e zga gble okyku o bile arekyeŋ angyiŋ mbo.

⁴ Ambo agi e lu odlo ombamba eka ba Ahogbrẽ a klo bi e lu angyiŋ, okyku eshi aŋa a bmi ka la gi nga a shri Oshpaodzadzi a shri a da gi. Agi e zga gble okyku o raŋ moarehwĩ angyiŋ esõ mbo, ambo okyku o raŋ Ahogbrẽ angyiŋ esõ. Aŋa a la a mbga aga esõ bi.

⁵ Agi e yi zhezheŋ ba agi e ba okro bimi la odlo la o raŋ o gno atuŋ ototno angyiŋ mbo. Nga agi e lu odlo okyku ekplo la e wo okyku ohwihwiŋ bi angyiŋ mbo. Ahogbrẽ angyiŋ a wo egŋe bi!

⁶ Agi e zga ayi ngre okyku o hwiŋ otsotsom okro ba arekyeŋ o mbo le okro bimi, o mbo le okro moahwõ mbo.

⁷ Ambo agi e wo la ozhẽ ma ba o klo okpoghwo okro bimi okyku eshi agi e wo moa la a nyum oshpa ba Ekristi angyiŋ. Ambo agi e pre esõ obiŋ omba ba agi e wo ka la gimi. Agi e dzu egi ble eka ba animoanwye a kpaŋ moanwye baŋ.

⁸ Okyku ba agi e wo la oklo ma okyku gimi, agi e wo la aga ba o pu Oshpaodzadzi la o zgi okro ba Ahogbrẽ o ba sha angyiŋ mbo, ambo agi e wo la aga ba o pu esõ bi a mbo ka la gimi. Agi e klo gimi nzenze!

⁹ Agimi anáŋ, e tne aga adzadzi eka ba agi e kpo otum nga e kpo ewu! Agi e kpo otum okyukyku ta la olulum, okyku o da gi e shri ewu ekplokyeŋ e zga eshri bimi mbo omba ba agi e la e nyum Oshpaodzadzi la o zgi okro ba Ahogbrẽ o ba.

¹⁰ Agimi angyiŋ e wo moaegŋe bi. Ahogbrẽ a mbo a wo egŋe bi. Ekployaŋ a mbo ba agi e kpo egi ayi bimi e wo kye, nga e wo shasha, nga akpu a wo ma mbo ku-ku.

¹¹ Agimi e yi ba agi e la e kpo ta la areyaŋ a mbo eshki bimi eka ba ada a la a kpo pa la moanwye baŋ.

¹² Agi e shri oshye-esõ e da gimi nga e la e gbu gimi esõ obiŋ. Agi e la e vẽ gimi okyku o da gimi e dzu la odzudzu ba Ahogbrẽ a gno oraŋ ta la alo. Aŋa angyiŋ a bzi gimi okyku o da gimi e ba e pu ka la ŋa Oreŋ baŋ ta la ekekʼpo baŋ.

¹³ Okyku okũ-okyeŋ nganga agi e vye la Ahogbrẽ ombamba pyeŋ. Omba ba agi e shri oshpa ba Ahogbrẽ e shri e ba, agimi e gno lo nga e yga lo. Agimi e yga lo eka ba oshpa ba arehwĩ angyiŋ mbo, ambo eka ba oshpa ba Ahogbrẽ angyiŋ. Adlidzi angyiŋ alo o wo oshpa ba Ahogbrẽ. Okyku eshi Ahogbrẽ a wo agʼbaha bimi la e bmi ba adlidzi ka la ŋa, nga a la a kpo otum baŋ eshki bimi.

¹⁴ Agimi anáŋ, moa a kpo gimi edgu ayakplo ba moa a kpo moaEklisiya ba Ahogbrẽ, la a wo moarehwĩ ba Ekristi Eyesu obiŋ ba Eyahuda angyiŋ. Edgu ewu ba moaEyahuda a kpo angyiŋ, agimi a mbo e kpo edgu ewu he lo abgo moanigimi.

¹⁵ MoaEyahuda he lo angyiŋ a bga Adigi-odne Eyesu pa la moarehwĩ ba Ahogbrẽ a hom mo otum, nga moa a kpo gi ewu. Ahogbrẽ a la a gno oraŋ pa la mo ku-ku mbo! Moa a wo la ofpu pa la moare pyeŋ!

¹⁶ Moa e mbi a zga gble okyku o tspi la gi okyku onyumoshpa o ygi moare la a wo moaEyahuda mbo. Oshpa he lo o shri oshla o kom mo. Odlobi he lo angyiŋ o wo anyuŋ odlobi ogagre ba amom-abgo ba moa a la a kpo. Ohuhuhi nga ma-me a mo, olom ba Ahogbrẽ o wo eshri mo!

Oblus a klo o bmre o yi o ka mo nganga

¹⁷ Agimi anáŋ, okro bi, omba ba moa a ngʼba gi a sku gimi okyku omba ple, moa a ngʼba aga bi a sku gimi ko mbo, ambo moa a ngʼba egʼba bi sha a sku gimi. Alo o vu gi olo o gre eshri, ambo agi e wo la ekhwo okyku o bla o ka gimi nganga!

¹⁸ Agi e klo e ba okro bimi nganga. Ame Oblus e klo e ba okro bimi engyi oshushku, ambo Eshitaŋ e nyom gi.

¹⁹ Ambo agimi angyiŋ, arekyeŋ angyiŋ mbo! Agimi e wo okayiozhẽ bi ta la ovye bi, ta la onyomegʼba bi okyku okpogre ba agi e kpo e gre egi ayi ba Adigi-odne Eyesu omba baŋ á ba a ba.

²⁰ Adlidzi angyiŋ, agimi angyiŋ e wo onyomegʼba bi ta la ovye bi!