1 MoaEtasolonika 1 - Ohwihwim Olehe

¹ Akpa he lo a zgi abgo ba Oblus ta la Esila, ta la Etimoti. A wo okyku moarehwĩ ba Eklisiya ba osku ba Etasolonika la a wo moarehwĩ ba Ahogbrẽ la a wo Adigi, ta la Adigi-odne Eyesu Ekristi. Okpoghwo ta la opyapyaŋ o dzu ka la gimi.

Odzudzu ta la obmi ba adlidzi ba moaEtasolonika

² Agi e vye la Ahogbrẽ ombamba pyeŋ okyku gimi mvye, nga e tsi etku bimi olu bi e fa ombamba pyeŋ.

³ Agi nga, agi e tne aga e ka egi ayi ba Ahogbrẽ bi la a wo Adigi, eka bimi e la e kpo otum ta la obmi ba adlidzi bimi, nga okyku oklo bimi agimi e kpo otum la osheshye, nga agimi e tspi gaŋ ibu ba okayiozhẽ bimi okro ba Adigi-odne Eyesu Ekristi.

⁴ Agi e yi ba Ahogbrẽ a klo gimi anáŋ, nga baŋ a sla gimi okyku o da gimi e dzu moarehwĩ baŋ.

⁵ Okyku eshi agi e shri Oshpaodzadzi he lo e ba e kom gimi la anyu sha mbo, ambo agi e shri lo la ekʼpo, ta la Ogbgaodzi, ta la obibmi ba adlidzi ba oshpa lo bubgu. Agimi e yi eka ba agi e dzu omba ba agi e wo ka la gimi. Alo o wo okyku o kpo o ghwo la gimi angyiŋ.

⁶ Agimi e mbili gi ta la Adigi-odne. Ambo eka ba agi e kpo ewu egyagi a mbo, agimi e yga oshpa lo la ovyevye la o zgi okro ba Ogbgaodzi angyiŋ o ba.

⁷ Okyku eka he nga agimi e zhiŋ e dzu egŋe okyku moa la a bmi ba adlidzi la a wo Amasidoniya ta la Egrise.

⁸ Okyku eshi oshpa ba Adigi-odne he lo o zgi okro bimi o gre okro moare la a wo Amasidoniya ta la Egrise sha mbo. Ambo oshpa ba obmi ba adlidzi bimi o ngla o tsu o gre yoŋ. Okyku eka he ekplokyeŋ e ra ma ba agi é lu nga mbo.

⁹ Moare lo pyeŋ a la a lu odlo eka ba agimi e yga gi omba bi e ba okyku o kpre gimi e ka, nga moa a sa a lu odlo eka ba agimi e kyu o lu okpko abgo nga e lu Ahogbrẽ ma ohuhuhi, okyku o hlu Ahogbrẽ la a wo adlidzi, nga la a wo esõ ma eshko,

¹⁰ nga okyku o dzu o bli oba-ba ba Anwye baŋ á zgi Ongyeŋ á ba. Anwye baŋ lo angyiŋ a wo Eyesu baŋ a kso ŋa a sku eku. Eyesu angyiŋ aŋa á shla gi abgo olom ba Ahogbrẽ la ó ba o ba.