1 Ebitru 3 - Ohwihwim Olehe

Agimi ashe pa la arealom

¹ Nga ekakahelo o raŋ o gre ba agimi ashe e fa olbi e da moarealom bimi, okyku o wo ba moakyeŋ eshki mo a bmi ba adlidzi ta la odlo ba Ahogbrẽ mbo le, okyku o da edgu odzudzu bimi e zhiŋ mo. Ambo ó dzu gimi omgbybi ba agimi e lu akplokyeŋ nga mbo,

² okyku eshi moa á kpo á gbu ba moa á ka okyekye bimi ta la odzudzu bimi la o wo zhezheŋ.

³ O raŋ o gre ba agimi e kpo otum ta la anzho okyku o ta egimi ozba mbo, ozhẽ ba agimi e la e kpo ta la amasẽ eshri bimi, o mbo le ozhẽ ba agimi e ta ashrowa, o mbo le ozhẽ ba agimi e ygi aknye.

⁴ Ambo o raŋ o gre ba agimi e da odzudzu bimi ba egi eshyẽ ba adlidzi angyiŋ o dzu ozba bimi. Ozba he lo ó khwo ku-ku nga mbo. Alo o dzu ble, nga o dzu la esõ la e wo shu. O wo owlama okro ba Ahogbrẽ o gre eshri.

⁵ Okyku eshi, moashe la a kpo otum ba adlidzi ayga, nga ba moa a shri okayiozhẽ mo a zga okro ba Ahogbrẽ, moa a la a ta emo ozba eka he lo angyiŋ. Moa a fa olbi a da moarealom mo.

⁶ Asaratu a wo eka he lo angyiŋ. Aŋa a fa olbi a da Ebrahim nga Asaratu a nyuŋ ŋa a lu mi le, Adaŋ-odne me. Agimi e wo moanwye-alashle baŋ angyiŋ o wo ba agimi e la e kpo ayakplo shasha nga e kpo eyli ba ekplokyeŋ mbo.

⁷ Agimi arealom nga, eshri odzudzu bimi pa la moashe bimi, o raŋ o gre ba agimi e ka e bmye ba moa a wo oshye eka bimi mbo. Okyku okũ he lo, o raŋ o gre ba agimi e kom mo la olbi. Okyku eshi agimi pa la mo, agimi é hwiŋ esõ ba Ahogbrẽ á shri á di ototno otsotse angyiŋ. E kpo eka he lo okyku o da ekplokyeŋ é ba e bme egŋe ta la olu bimi mbo.

O kpo ewu okyku otum ba odlodzi

⁸ Ekplo ba amom-abgo, o raŋ o gre ba agimi e dzu la aga ta la okoka okyekyeŋ angyiŋ e ma. Agimi e la e klo egimi eka moanáŋ. Nga e la e kpo e ghwo la egimi, nga e kpo ohe-heŋ angyiŋ ta la egimi.

⁹ Ambo o wo ba arekyeŋ a tra ŋo ezhim le, aŋo o tra ŋa ambgu. Nga agimi e ta anyuabi angyiŋ e ygi are la a ta anyuabi a ygi gimi mbo, ambo e fa anyuadzi angyiŋ, okyku eshi Ahogbrẽ, omba baŋ a bzi gimi, a hwim baŋ á ba a fa anyuadzi angyiŋ á ygi.

¹⁰ Odlo Ahogbrẽ o lu mi le, Areyaŋ a mbo la a klo o gno oraŋ ta la odzudzu nga okyku o daŋ a wo la omba la o gbu esõ obiŋ le, O raŋ o gre baŋ a lu odlo la o wo obi mbo, nga baŋ a kyu osheŋ akpro abgo.

¹¹ O raŋ o gre baŋ a ngʼba a sku ayakplo la a wo abi nga a kpo ekplo la e wo shasha. O raŋ o gre baŋ a klo opyapyaŋ nga a zga gble ta la alo.

¹² Okyku eshi Ahogbrẽ a la a shri ayi baŋ a zga egʼba moarehwĩ ba odlodzi angyiŋ. Nga a la a ngli atuŋ a gno olu mo ombamba pyeŋ. Ambo aŋa a la a kpo ayiwlu pa la moa la a kpo ayakplobi.

¹³ Ayi angyiŋ á ba a ta gimi etsa o wo ba agimi e wo la esõ ba o kpo ekplo la e wo shasha?

¹⁴ Ambo o wo ba agimi e la e kpo ewu okyku o kpo ayakplo la a wo shasha, agimi e dzu la oraŋ nzenze! E kpo eyli ba moarehwĩ mbo. Nga agimi e da esõ e ngʼba gimi mbo.

¹⁵ Ambo o raŋ o gre ba agimi e fa olbi e da Ekristi esõ bimi. Nga agimi e daŋ a dzu Adigi-odne. Nga agimi e dzu la aga ombamba pyeŋ okyku o wre ayakplo o da areyaŋ a mbo la a zhĩ gimi ekplokyeŋ eshri okayiozhẽ ba agimi e wo la alo ma.

¹⁶ Ambo e kpo lo la esõ ble-ble, nga e fa olbi e shri e di. Agimi e da esõ bimi e dzu kye, okyku o da moa la a dzĩ gimi nga a lu odlo ba ototno eshri ba odzudzu ba odlodzi bimi arehwĩ la e wo moarehwĩ ba Ekristi, okyku o da mo a gbu anzi pa la ayakplo moa a la a lu.

¹⁷ Okyku eshi o raŋ o gre ba are a kpo ewu okyku otum la o wo shasha, o wo ba Ahogbrẽ a hwim a zga eka he angyiŋ le. O raŋ o gre eka he lo o sku ba are a kpo ewu okyku ekplo la e wo ebi.

¹⁸ Okyku eshi Ekristi ababgo baŋ a mbo a kpu okyku gimi. Okyku okpyemgbyeŋ a mo angyiŋ a kpu okyku odlobi. Okpu-kpu baŋ he lo, o wo odgo okyekyeŋ sha. Are ba odlodzi angyiŋ a kpu okyku moarehwĩ ba odlobi. A kpo eka he lo okyku o daŋ a shri gimi a shri a yi okro ba Ahogbrẽ. Moa a daŋ a kpu eku ba egʼba, ambo moa a sa a daŋ a hwiŋ odzudzu ba esõ.

¹⁹ Omba baŋ a wo la edgu egʼba ba ogbga angyiŋ, aŋa a gre a yi a nyum oshpa a ygi egbga ba moarehwĩ ba moa a klu mo a ta aku.

²⁰ Egbga he lo e wo egbga ba moarehwĩ la a sheŋ a shye eshri ta la Ahogbrẽ omba baŋ a la a dzu a bli, omba ba Onuhu a la a mbdzi amgblami. Moare ple sha a gre amgblami he lo. Moarehwĩ afote angyiŋ moa a gro okyku ami.

²¹ Amihĩ lo a wo ekplo la e wo egŋe ba abaptisma, nga alo angyiŋ a shla gimi ohuhuhi. Ohe lo o kpo ozhẽ ba agimi e ndza erum ba egʼba bimi angyiŋ mbo, ambo ozhẽ ba ohwihwim ba agimi e hwim la enzi ba esõ la e wo edzi ta la Ahogbrẽ. Ozhẽ ba oksongybi ba Eyesu Ekristi he lo angyiŋ, abaptisma a shri oshla a shri a da gimi.

²² Eyesu Ekristi a sheŋ a gre Ongyeŋ bgu, nga ohuhuhi aŋa a wo egbaŋ ba obgori ba Ahogbrẽ a mo. Nga aŋa a la a ri ekʼpo eshri moanwyeadga ba Ongyeŋ pyeŋ, pa la moa la a ri ekʼpo Ongyeŋ, ta la edgu ekʼpo nzenze la e wo Ongyeŋ.