رومیأن 15 - کتاب مقدس به زبان گیلکی - گویش شرقی1 امه كی قوی ایسیم، خا اوشونی کی ضعیف ایسن تحمل بوکونیم و امئه خوشحال گودن دومبال دنبيم. 2 هرته از امه خان هر خورم چی کی خوشه همسایه مئن اینه، هونِه باره اونَ خوشحالَ کونه، تا اونِ ایمونَ تقویت بوکونه. 3 چونکی مسیح خوشه خوشحال گودنِ دومبال دننئه بو، بلکی هُطوکی داوود مزمور مئن بنویشته بوبو: «سرکوفت اوشونی کی تأ سرکوفت بزئن، می سر بکته.» 4 چون هرچی کی قدیم روجون بنویشته بوبو امئه تعلیمِ واسی بو، تا مقاومت همرا و او دیلگرمی هما کی مقدّس بنویشته ئان امره هدئنه، اميد بداريم. 5 ببون کی، خُدا مقاومت و دیلگرمی هدئنه، شمره عطا بوکونه تا اوجور کی مسیح عیسی خواسته همرا جور ایسه همدیگر هما مدارا بوکونین، 6 تا کس کس اجی یکدیل و یک زبون، امئه خُداوند عیسی مسیح پئره، یعنی خُدا، پرستش بوکونیم. 7 پس هوطوكی مسيح شمره گرمی همرا قبول بوده، شمرام همديگره گرمی همرا قبول بوكونين تا خُدا جلال بگیره. 8 چون شمره گونم كی مسيح، ختنه بوبؤرؤن خدمتکار بوبؤ تا خُدا راستئه نشؤن بدئه، تا او وعده ئانه کی خدا امئه اجداده هدابو، تصدیق بوکونه. 9 و تا غيريهودئن، خدا اونِ رحمت واسی جلال بدئن. هوطو كی مقدس بنویشته ئان مئن بنويشته بوبو: «پس مو تأ غیرِیهودیئن مئن ستایش خوانم گودن، و تی نوم مئن آواز خونم.» 10 هنده گونه: «ای غیریهودئن، اون مردومِ همرا شادی بوکونین!» 11 و هندئرام مزمور کیتاب مئن گونه: «ای تموم غیریهودئن، خُداوندَ ستایش بوکونین! ببون کی تموم مردومون، اونَ جلال بدئن!» 12 و دومرته اِشعیا پیغمبرم گونه: «یسا بنه، خأ بأ، کسی کی ویریسا تا غیریهودئن سه حکمرؤنی بوکونه؛ غیریهودئن اون سَر امید دانن.» 13 ببون، خُدايی کی اميد هدئنه، شمره تموم شادی و صلح و سلامتی جی کی ایمون مئن دره، پُرَ کونه، اوجور کی روح القدس قوت همرا امید اجی لبالب پُر ببین. پولُسِ خدمت غير يهوديئنِ به 14 ای می برارون، مو خودم شمراجی خاطیر جمع ایسَم کی شمه خودتون خوبی جی پُر ایسین و کاملا دونایی جی پور ایسین و تینین کس کسه تعلیم بدین. 15 ولی خیلی جسارت بودم، چند ته جریون باره شیمئبه بنویشتم، تا اوشونَ شمره یاد بارم، چون خُدا ای فیضَ ما هدا، 16 کی مسیح عیسی نوکر، غیر یهودیئن ئبه ببوم و خُدا انجیل خدمت گودن واسی کاهینی بوکونم، تا غیر یهودیئن، خُدا حضور مئن پیشکشی قابیل قبول ببون کی بواسطه ی روح القدس تقدیس بوبو. 17 پس مو مسیح عیسی مئن ای خدمتی کی خُدای به کادرم واسی دلیل دَانم کی ایفتخار بوكونم. 18 چونکی جرأت نوکونَم یک چی اجی گب بزنم، جوز او چی کی مسيح بواسطه ی مو به انجوم برسونئه، تا غير يهوديئنه ایمون مطیع بوکونم، بواسطه ی می گبون و می کارون، 19 او اینه نشونه ئان و معجزاتِ نیروی همرا، يعنی خُدا روحِ نيرو همرا انجوم بدا، هوطوکی اورشلیم اجی تا ایلیریکومَ بوشؤم، مسیحِ انجیلِ خدمته تماما، انجوم بدام. 20 می ناجه همیشک ای بو که او جائی انجیلَ موعظه بوکونَم کی مسیح نومه نشتؤسه بی، تا نبون کی مو یگنفر دیگر پی سر بنایی چاکونم، 21 هوطوکی اشعیای پیغمبر کیتاب مئن بنویشته هننا: «اوشونی کی اون اجی بی خبر بون، اینن، و اوشونی کی نشتوسه بون، فهمنن.» 22 اینه واسی ایسه کی، چن دفا خواستم بام شیمئه وَر و نوبو. 23 ولی ایسه چونکی ای منطقه مئن، ده مئبه کاری نومونسه کی بوکونم، و اوره اجی کی خیلی ساله ذوق دانم شیمئه ورجه بام، 24 امید دَانم کی وقتی اسپانیا شؤدرم می راه سر شمره بینم، تا بعد اونکه اننی شمره بدئم، مأ اوره سفر ئبه یاری بوکونین. 25 ولی الون، خوانم اورشلیم شهر بوشوم تا اوره مقّدسین ئبه کمک مالی ببرَم، 26 چونکی مقدونیه و اَخائیه کلیسائان خوانن اورشلیمِ مقّدسینِ ندارون ئبه کمک مالی جیماکونن. 27 اوشون خودشون خواستن ای کاره بوکونن؛ و راس راسی اوشون اورشلیم ایموندارونِ مدیون بون. چون اگه غیر یهودیئن، برکات روحانی مئن یهودیئن همرا شریکابون، یهودیئنَم خأ برکات مالی مئن اوشونَ خدمت بوکونن. 28 پس وقتی ای کارَ تمناگودم و او چیَ کی جیمابو اوشون دست فارسونئم، شیمئه را یأجی اسپانیا سمت شنم. 29 دونم وقتی کی شیمئه ورجه بام، مسیح برکت همره کی فراوونه هنم. 30 ای برارون، امئه خُداوند عیسی مسیح واسی و محبتی کی روح القدس مئن هننا، شمراجی خواهش کونم کی همیشک خُدا حضور مئن مئه دعا بوکونین، ای کار هما می خدمت مئن شریک ببین. 31 تا یهودیه بی ایمونونِ دَس اجی، جون سالیم دَر ببرم و می خدمت، اورشلیم ئبه، مقدسین واسی قبول ببون. 32 بازین خُدا بخا ذوق همرا شیمئه ورجه بام و شیمئه همرأ جونی تازه بگیرم. 33 صلح و سلامتی خُدا شیمئه همته همرا ببون. آمین. |
@ 2024 Korpu Company