متّی 4 - کتاب مقدس به زبان گیلکی - گویش شرقی

عیسی امتحون بنه

¹ بازین روح القدس، عیسی بیابؤن میئن راهنمایی بُوده تا ابلیس اونه امتحؤن بکونی.

² عیسی بعد اونکه چهل شبنده​روز، روزه بو، وَشتَه بو.

³ هو وخت ابلیس اینه ورجه بومَه و بوته: «اگه خدا ریکه ایسّی، ایی سنگؤنِ بگو نون ببی!»

⁴ عیسی اونه جواب میئن بوته: «تورات میئن بنویشته بوبُو که: «”آدمی فقط نؤن أمره زنده نیه، بلکه هر کلامی أمره که، خدا دهنای بیرون هنه.“»

⁵ بازین ابلیس اونه مقدّس شهرِ سو ببرده و معبدِ گوف سر بنه

⁶ و عیسی بوته: «اگه خدا ریکاکی، تَه جیر تؤدی، چونکه کتابِ زبور میئن بنویشته بوبُو که: «”تی وسه خوشِ فرشته أنِ فرمؤن دئنه و اوشؤن تَه خوشؤن دستؤن سر گینَن نبی که تی پا یکته سنگ بزنی.“»

⁷ عیسی اونه جواب بده: «اینم تورات میئن بنویشته بوبُو که: «”خداوندْ تی خُدا امتحؤن نکون.“»

⁸ یبار ده ابلیس اونه یکته پیله کوه گوف سر ببورده و تمؤم دنیا ممالک با تموم اوشون شکوه و جلال، عیسی نیشون بده

⁹ و بوته: «اگه می جلو خاک سر بکّای و مَه پرستش بکونی، ایشون هَمَه تَه هدئنم.»

¹⁰ عیسی اونه بوته: «دورَه بو، ای شیطون! چونکه توراتِ میئن بنویشته بوبؤ: «”خداوندْ تی خُدا، پرستش بکون و فقط اونه عیبادت بکون.“»

¹¹ بازین ابلیس اونه ویلَه گوده و فرشته أن بومئن و اونه خدمت بودَن.

عیسی خدمت شروع کوئنه

¹² هیطو که عیسی بشتؤسه یحیی گرفتارَ بؤ، جلیل سو وگرسه.

¹³ بازین ناصره شهرای بوشؤ کفرناحوم سو و اوره بیسَه. کفرناحوم جلیل دریا ور بو و زِبولون و نفتالی سامؤن میئن هنّه بو.

¹⁴ ایی اتفاق دکته تا اِشعیای پیغمبر کلام به انجوم برسی که، بوته بو:

¹⁵ «زبولون سامؤن و نفتالی سامؤن، شمه ایی که دریا راه سر، اوطرفِ اُردن ایسائین، جلیل ملتؤن؛

¹⁶ مردومی که ظلمات میئن ایسابون، پیله روشنایی بدِئن، و اوشؤنیِ که، مرگ سایه میئن زیندیگی گودَن، روشنایی فتؤسه.»

¹⁷ او زمؤنَ جی عیسی بنا بُوده، موعظه گودن و گوت: «توبه بکونین، چونکه آسمؤنِ پادشاهی نزدیکَ بؤ!»

عیسی اوّلی شاگردؤن

¹⁸ وختی عیسی جلیل دریا کنار راه شوءدبو، دو ته برأره بدِه به ایسم شمعون نامدار به پطرس و اونه برار آندریاس که، آؤ میئن سالی زِدبوئن، چونکه صیاد بوئن.

¹⁹ عیسی ایشؤنه بوته: «می دومبالسر باین که مو شمره مردوم صیّاد چأکونم.»

²⁰ اوشؤن درجا خوشؤنِ سالیِ أنِ ویلَه گودَن و اونه دومبالسر تاتأدی راه دکتن.

²¹ هیطو که خوشِ راه شوئدبو، دوته برأر دیگرم یعنی یعقوب، زِبِدی ریکای و اونه برأر یوحنا بدِه که، خوشؤن پئر زبدی اَمره نوء میئن ایسأ بُن و خوشؤنِ سالی أنِ حاضیرَ کادبُون. اوشؤنم دوخنده؛

²² ایشونَم درجا نوء و خوشؤن پئره ویله گودَن و اونه دومبالسر بوشوُن.

ناخوشون شفا

²³ ایطو بوکه، عیسی سرتاسر جلیل گَرس و ایشونه عبادتگاه أنِ میئن آموتی و خدا پادشاهی خوروم خبرِ اعلؤم گود و هر جور درد و ناخوشی مردومِ شه، شفا بخشی.

²⁴ پس عیسی آوازه تمؤم سوریه میئن فیبیته و مردوم همه‌ء ناخوشؤنِ که، هرجور مرض و ناخوشی داشتن، و اوشؤنی که دیو بزه بوئن و غشّی أن و فلوجؤن اونه ورجه اَردَن و عیسی اوشونه شفا دائ.

²⁵ پس یکته پیله جماعت جلیل و دکاپولیساجی، اورشلیم و یهودیّه و اُردن اوطرف، اونه دومبالسر راه دکتن.