متّی 27 - کتاب مقدس به زبان گیلکی - گویش شرقی

یهودا خودکشی

¹ صوبه دم، همه کاهینون سرون و قوم شیخون جومَه بوئن، همدیگره اَمره مشورت بودَن که عیسی بکوشَن.

² پس اونه دست دوسّه ببوردَن و پیلاتوس فرماندارِ تحویل بدَئن.

³ وختی یهودا، اونه تسلیم کننده بدِه که عیسی محکومَ گودَن، خو کارای پشیمونَ بوُ و سی‌ته سکّه نقره​، کاهینون سرون و شیخون وگاردوئنه و بوته:

⁴ «گوناه بودَم و باعث بوبوم یکته بی‌گوناهِ خون فبی.» امّا اوشؤن جواب بدَئن: «به اَمه چی؟ خودت دؤنی!»

⁵ هوموقع یهودا، سکّه​أنِ معبد میئن زمینِ سر فوده و بوشو و خوشِ دار بزه.

⁶ کاهینون سرون سکّه​أن زمینای جومَه گودَن و بوُتن: «ایی سکّه​أنِ معبدِ خزؤنه میئن تؤدَئن شرعاً درست نیه، چونکه خون‌بها ایسه.»

⁷ بعدِ اونکه صلاح مشورت بودَن، او پولِ اَمره، کوزه​گر زمینِ بَهیِن تا اونه غریبه أن قبرستؤن چاکونَن.

⁸ هینه وسه او محل تا امروز به ’زمین خون‘ معروفه.

⁹ ایطو بوبؤ که، اِرِمیای پیغمبر پیشگویی حقیقت پیدا گوده که، بوته بو: «اوشؤن سی سکه نقرهَ ویتَن، یعنی قیمتی که بنی اسرائیل اونه سر بنَئن،

¹⁰ و اونه اَمره کوزه​گره زمین بهیِن، جوری که خداوند مَه اَمر بفرمأسّه بو.»

محاکمه پیلاتوسِ ورجه

¹¹ امّا عیسی، پیلاتس، فرماندار روم جلو بیسَه. فرماندار عیسی جی بپورسه: «تو یهودِ پادشاه ایسّی؟» عیسی جواب بده: «تو ایطو بوتی!»

¹² امّا وختی که کاهینون سرون و شیخون اونه افترا بزئن، عیسی هیچ جوابی ندَه.

¹³ پس پیلاتوس عیسی جی بپورسه: «نشتؤنی چنی چی تی ضد گوائی دِئنَن؟»

¹⁴ امّا عیسی حتّی یکته ایی افترائنَم جواب نده. جوری که فرماندار ماتَ بو.

¹⁵ فرماندار رسم ایی بو که عیدِ موقع یکته زندؤنیِ که مردوم خواستنِ آزادَ کونی.

¹⁶ او زمؤن یکته مردکای به ایسمِ باراباس زندؤن ایسابو که مردوم اونه شناختن.

¹⁷ پس وختی که مردوم جومَه بوبُوئن، پیلاتوس اوشؤنای بپورسه: «کیه خوانین که، شیمه بِه ویلَه کونم، باراباس یا عیسی نامدار به مسیح‌ِ؟»

¹⁸ اینه، هینه واسه بوته که دؤنس عیسی، حسادتای اونه دست هَدَئن.

¹⁹ وختی که پیلاتوس داوری تخت سر نیشته​بو، اونه زن یکته پیغوم اونه بِه سرا دا که بنویشته هنه بو: «ایی صالح مرداکِ اَمره کار ندار، چونکه امروز یکته خوؤ اونه باره بدِئم​که، خیلی مه اذیت بوده.»

²⁰ امّا کاهینؤن سرون و شیخون، مردومِ واداشتن تا باراباس آزادی و عیسی مرگِ بخوان.

²¹ پس وختی فرماندار بپورسه: « ایی دوتای، کویکتَه شیمه بِه ویلَه کونم؟» جواب بدَئن: «باراباسِ».

²² پیلاتوس بپورسه: «پس عیسی نامدار به مسیحِ اَمره چی​بکونم؟» همته بوُتن: «صلیب سر هکش!»

²³ پیلاتوس بپورسه: «چرأ؟ چی بدی بُوده؟» امّا اوشؤن بلندتر فریاد بزِئن: «صلیب سر هکش!»

²⁴ پس پیلاتوس بدِه که اینه حقسعی فایده ندئنه، و حتی بده که شورش بودره، آؤ بخواسّه و خوشِ دستؤنِ مردومِ جلو بوشوسته و بوته: «ایی مرداک خون می گردن نیه. خودتؤن دؤنین!»

²⁵ مردوم همه جواب بدئن و بوتن: «اونه خون امه گردن و امه زاکؤنِ گردن ببی!»

²⁶ هوموقع پیلاتُس، باراباسِ اوشونه بِه ویلَه گوده و عیسی شلاق بزه و هده تا صلیب سر هکشَن.

عیسی رُخشنَیتن

²⁷ پیلاتوسِ سربازؤن، عیسی، فرماندار كاخِ صاراکی میئن ببوردَن و تمؤمِ سربازؤن اونه دور جومَه بون.

²⁸ اوشؤن عیسی لُختَ گودَن، یکته ارغوؤنی رخت اونه دودَن.

²⁹ و یکته تاج، تیفاجی ببافتن و اونه سر بنَئن و یکته شَترکه اونه راستِ دست هدئن. بازین اونه جلو زانو بزِئن و روخشنِ أمره بوتَن: «سلام بر یهودِ پادشاه!»

³⁰ و اونه سر فیلی فودَن. شَترکه اونه دستای هیتَن و اونه سر زِئن.

³¹ بعد از اونکه اونه روخشنه گیتَن، ارغوونی ردا اونه تناجی بیرون بأردن و خوشِ رختِ اونه دودَن. بازین عیسی بیرون ببوردَن تا صلیب سر هَکشن.

صلیب سر هکشِئنه عیسی

³² وختی که بیرون شوئودبون، یکته مردکه قیروؤن اهالی جی به ایسم شمعون بدِئن و اونه واداشتَن که عیسی صلیبِ ببوری.

³³ وختی او جایی که جُلجُتا ایسم داشت که اونه معنی جمجمه ایسّه، برسئن،

³⁴ عیسی، شرابی که زرخِ آؤه اَمره قاطی بوُ، هدَئن. وختی عیسی اونه وچیشته، نخواسّ دِه وودوشی.

³⁵ وختی که اونه صلیب سر هکشِئن، اونه رختِ تقسيم گودنِ بِه، خوشؤنِ میئن قرعه تؤدَن.

³⁶ بازین بنیشتن و عیسی بپاسّتَن.

³⁷ یکته حوکم هم ایطوری یکته تخته سر بنویشتَن و اونه‌سره جور بزِئن: «ایی ایسه عیسی، یهودِ پادشاه!»

³⁸ دوته راهزنم اونه اَمره صلیب سر هکشه بوبؤئن یکته راست طرف و اوته اونه چپِ طرف.

³⁹ اوشونی که اورای شوئدبون خوشونِ سرِ تکون دئن و فحش دئن

⁴⁰ گوتَن: «اَی تو، که خوأستی معبده فگردنی و سه روزه اونه چأکونی! تَه نجات بدی! اگر خدا ریکاکی، صلیب سَرای جیر بیأ!»

⁴¹ کاهینون سرون و تورات معلمون و شیخون هم اونه روخشنه گیتن و گوتَن:

⁴² «دیگرؤنِ نجات بدا، خوشِ منئه نجات بدای! اگه اسرائیلِ پادشاه​ایسه، الؤن صلیبای جیر بائ تا اونه ایمؤن بأریم.

⁴³ او، خدا توکّل دئنه. پس اگه خدا اونه دوست دَئنه، الؤن اونه نجات بدای. چون ادّعا گود که، خدا ریکاکه!»

⁴⁴ او دوته راهزنم که اونه اَمره صلیب سر هکشه بوبؤبُن، هیطوری اونه توهین گودَن.

عیسی موردَن

⁴⁵ از ساعت دوازده ظهر تا ساعت سه بعدظهر، تاریکی تموم او ولایت بَیته.

⁴⁶ دوروبرِ ساعت سه بعدظهر، عیسی ژگله بزه: «ایلی، ایلی، لمّا سَبَقتَنی؟» یعنی «می خدا، می خدا، چرِء مه ویلَه گودی؟»

⁴⁷ بعضی از اوشونی که اوره ایسابون وختی اینه بشتؤسَن، بوُتن: «ایلیا دوخُبِئنه.»

⁴⁸ یکته از اوشؤن درجا بودؤسه و یکته اَبر بارده، اونه تُرشَ بوُ شرابِ میئن فورو گوده و یکته چوبه سر بَنه و عیسی دَهنِ ورجه ببورده تا وودوشی.

⁴⁹ امّا بقیّه بوُتن: «اونه به خوشِ حال بنی تا بَینیم ایلیا اونه نجات دَئنه بِه هَنه؟»

⁵⁰ عیسی یبار دیگه ژگله بزه و خوشِ روحِ تسلیمَ گوده.

⁵¹ هو وخت میئن، معبد پرده از جؤر تا جیر دوپاره بوبُو. زمین بلرزه و سنگؤن بشکافتَن.

⁵² قبرؤن بازه بوئن و خیلی از مُقدسؤنِ جنازه أن که بمورده بوئن، زنده بوبوئن.

⁵³ اوشؤن قبرؤنای بیرون بومئن و بعد از اینکه عیسی زنده بوبو، مقدّس شهرِ میئن بوشوُئن و خوشؤنِ خیلی از مردومونِ نیشون بدئِن.

⁵⁴ وختی سربأزؤنِ فرمؤنده و اونه نفرات که ماموریت نگهبؤنی عیسی جیِ داشتن، زمین لرزه و ایی همه اتفاقون بدئن، خیلی بترسِئن و بوُتن: «راست راستِ او خدا ریکه بو.»

⁵⁵ خیلی از زنأکؤنم اوره ایسأبون و از دور نیگاه کائدبُون. اوشؤن جلیلای عیسی دومبالسر راه دکتبون تا اونه به خدمت بکونَن.

⁵⁶ اوشونه میئن مریم مجدلیّه و مریم، یعقوب و یوسف مَئر و زبدی ریکاکونِ مَئرم ایسأبُوئن.

عیسی دفنَ گودن

⁵⁷ غروب دمی، یکته دارا مرداک که رامه شی بو، به ایسم یوسف که، خودوش عیسی شاگرد بوبُو بو،

⁵⁸ پیلاتوس ورجه بوشو و عیسی جنازه بخواسّه. پیلاتوس دستور بدا اونه هَدِئن.

⁵⁹ یوسف، جنازه ویته، یکته تمیز کتونِ میئن فیبیته

⁶⁰ و یکته مقبره میئن که تازه خوشِ به صخره میئن بتاشته بو، بَنه و یکته پیله سنگ مقبره دهنه جلو گرادَه و بوشو.

⁶¹ مریم مجدلیّه و اوته مریم اوره مقبره جلو نیشته بُوئن.

مقبره نیگَهبونؤن

⁶² فردایی، که بعد از ’روزِ آماده بوئن عیدِ‘ بو، کاهینون سرون و فریسی ان فرقه عالمون پیلاتُسِ ورجه جومَه بوئن و بوُتن:

⁶³ «آقا! أمره یاد دره که، وختی ایی فریبکار زنده بو، گوت که ”سه روز بعد ویریسنَم.“

⁶⁴ پس دستور بدین مقبره​، تا سه روز بپائن، نبی اونه شاگردؤن بَئن و اونه جنازه بدوزدَن و مردومِ بوگون که او مُرده​أنای ویریسا، که ایطوری، ایی آخری کلک، از اوّلی کلکَم بدتر بنه.»

⁶⁵ پیلاتوس جواب بده: «شمه خودتؤن سربازون، پاستنِ دَئنین. بشین و اونه اوجور که صلاح دؤنین، بپاین.»

⁶⁶ پس بوشوُئن و مقبره سنگِ مُهر و موم بودَن و چنته سرباز اوره بنَئن تا مقبره بپائن.