متّی 20 - کتاب مقدس به زبان گیلکی - گویش شرقیانگورباغِ کارگرؤن حیکایت 1 «آسمونِ پادشاهی، صاب باغییه مؤنه که صوبه دم بیرون بوشو تا خوشِ انگورباغِ بِه روزمزد کارگر بگیری. 2 صاب باغ، اوشونه اَمره طی بُوده که، روزی یک دینار کار واسه انگور باغِ میئن هرته از اوشؤن هدأی. بازین ایشؤنِ خوشِ انگورباغ میئن سرا دا. 3 صوباین ساعت نُه، دومَرته بیرون بوشو و یسریِه، میدونِ سر بده که بیکار ایسابؤن. 4 اوشونم بوته: ”شَمَرَم می انگور باغ میئن بشین و اوچیکه شیمه حقِّ، شمره هَدِئنَم.“ 5 پس اوشؤنَم بوشوُئن. هنده ظُهر و ساعت سه بعدظهر بیرون بوشو و هیطو بُوده. 6 ساعت پنج بیرون بوشو و هنده چند نفر دیگره که بیکار ایسابون، بدِه و اوشأنای بپورسه: ”چرِء تمومِ روز إرِه بیکار ایسأین؟“ 7 جواب بدَئن: ”چون هیشکس اَمره کار هَندَه.“ اوشؤنَم بوته: ”شَمَرَم می انگورباغ میئن بشین.“ 8 غروب دمی، انگور باغِ صاب خوشِ مباشِره بوته: ”کارگرؤنِ دوخُوئن و اوشونه مُزدِ هَدی و آخری جی شروع بکون تا اوّل.“ 9 کارگرؤنی که حدود ساعت پنج بعدظهر کارِ سر بومأبون، هرته یک دینار هَیتَن. 10 وختی اوشونِ نوبت برسه که، پیشتر از همه بومأبون، فکر بودَن که دیگرؤن جی بیشتر هَگینن. امّا هرته از اوشؤنَم یک دینار هَیتن. 11 هیطوکه خوشؤنِ مُزدِ هَیتَن، میسمیره بودَن و صاب باغِ بوُتن: 12 ”ایشون که سرآخر بومئن، فقط یک ساعت کار بودَن و تو اوشونه، امه اَمره که تموم روز آفتاؤه جیر گورشَه بویم و زحمت بکشیم برابر چاگودی!“ 13 صاب باغ، یکته از اوشؤنه وگرسه و بوته: ”ریفق، مو ته به ظلم نودَم. مگر امه قرار یک دینار نبو؟ 14 تی حقِ هگیر و بشو! مو خوأنَم ایی آخریِ تی مورسون مُزد هَدِم. 15 یعنی حق ندئنَم می مالِ اَمره اوچیزی که خوائنم بکونم؟ چیشم ندَئنی می دست و دیل بازیِ بَینی؟ 16 پس، اوشؤنی که آخر ایسّن، اوّل بنن، و اوشؤنی که اوّلن، آخر!“ عیسی سوّمین پیشگویی در مورده خوشِ مرگ و زنده بوئن 17 وختی که عیسی اورشلیم سو شوءدبو، راه میئن خوشِ دوازدهته شاگردِ یکته گوشه ببرده و ایشؤنِ بوته: 18 «الؤن اورشلیم شوئدریم. اوره انسون ریکه کاهینون سرون و تورات معلمونِ تسلیمَ کوئنَن و اوشؤن، اونه موردن به محکومَ کوئنَن. 19 و غیر یهودی أن دست هدِئنن تا روخشنایته ببی و شلاق بوخوری و صلیب سر هکشِئه ببی. اما سومی روز میئن ویریسنَه.» یکته مَئرِ خواسته 20 هووخت زِبِدی ریکاکؤنِ مَئر خوشِ دو ته ریکه اَمره عیسی ورجه بومَه و اونه جلو زانو بزه و عیسی جی بخواسّه که اونه ناجَه برآورده بکونی. 21 عیسی بپورسه: «تی ناجه چی ایسّه؟» اوشون مَئر بوته: «بفرما که، می ایی دوته ریکه تی پادشاهی میئن، یکته تی راستِ طرف و اوته تی چپِ طرف بنیشَن.» 22 عیسی جواب بده: «شمه نودُنین چی خوائنین! یعنی تینین او جامی که مو باید وودوشَم، وودوشین؟» او دوته برار جواب بدئن: «بله، تینیم!» 23 عیسی بوته: «او جامَ جی که مو وودوشَنَم، وودوشنین. امّا بدونین که، نیشتَنِ می راستِ طرف و چپِ طرف، می اختیار نیه تا اونه ینفرِ ببخشم. ایی جیگا اوشونی شی ایسه که، می پئر اوشونِ بِه حاضرِ گوُده.» 24 وختی او ده ته شاگردِ دیگه اینه بشتؤسَن، او دوته برأر سر غیضایتن. 25 اما عیسی ایشؤنِ دوخونده و بوته: «شمه دؤنین که، حاکمؤنِ دیگر قومؤن اوشونِ سر آقایی کؤئنن و اوشونِ پیله کسون، اوشونِ دستور دِئنَن. 26 امّا شیمه میئن ایطؤ نَبنه، هر کس بخوای شیمه میئن پیلّه ببی، باید شیمه خدمتکار ببی. 27 و هر کس خوأنه شیمه میئن اوّل ببی، باید شیمه نوکر ببی. 28 حتی انسونِ ریکه هم نومَه که تا اونه بِه خدمت بکونَن، بلکه بومَه خدمت بکونی و خوش جؤنِ خیلیین آزادی واسه هَدای.» عیسی دوته کورِ شفا دِئنه 29 وختی که عیسی و اونه شاگردؤن اَریحا شهرَ جی شوئدبون، خیلی ان اونه دومبالسر راه دکتَن. 30 راه سر، دو ته کوره مردأک نیشته بُوئن. وختی بشتؤسَن که، عیسی اورای شؤدره، فریاد بزِئن: «آقا، داوودِ ریکه، اَمه‌به رحم بکون!» 31 جمعیت اوشونه تشر بزِئن و بخواسَن که تام بزنن، امّا ایشون، بیشتر فریاد زئن که: «آقا، داوودِ ریکه، اَمه‌به رحم بکون!» 32 عیسی بیسه و او دو ته مرداکِ دوخونده و بپورسه: «چی خوانین شیمه بِه بکونم؟» 33 اوشون جواب بدَئن: «آقا، خوائنیم امه چیشمون بَینی.» 34 عیسی دلسوجی اَمره اوشونِ چیشمونِ سر دست بکشه و هو دم خوشؤنِ بیناییِ هَیتَن و اونه دومبالسر راه دکتن. |
@ 2024 Korpu Company