متّی 15 - کتاب مقدس به زبان گیلکی - گویش شرقیپاکیِ دیرون 1 بازین یکته گروه از فریسی ان و تورات معلمون اورشلیمای عیسی ورجه بومئن و بوُتن: 2 «چرِء تی شاگردؤن، شیخون دأبِ زیرپا نِئنَن؟ چونکه اوشؤن قبلِ غذا خوردن خوشؤنِ دستؤنِ نوشؤنَن!» 3 عیسی جواب بده: «و شمه چرِء اینه واسه که شیمه دأبِ بدارین، خدا حُکمِ زیر پا نِئنین؟ 4 چونکه خدا بفرمأسّه: ”تی پئر و مئره احترؤم بدار“ و ”هرکی خو پئر یا خوشِ مئره فحش بدای، البته که باید اونه بکوشن.“ 5 امّا شمه گونین اگه ینفر خوشِ پئر و مَئر بوگوی: ”هر چیِ که بایستی کمک به، شمره هده بوم، خدا به وقف بودَم،“ 6 دِه اونه واجب نیه که ایطو خوشِ پئر و مئره احترؤم بنای. شمه هیطو شیمه داب واسه، خدا حوکمِ باطله کؤنین. 7 ای ریاکارؤن! اِشعیای پیغمبر شیمه واسه چقدر خوب پیشگویی بُوده، هوموقع که بوته: 8 «”ایی قوم خوشؤنِ زبونِ اَمره مه احترؤم نئنَن. امّا ایشؤنِ دیل از مو دوره. 9 اوشؤن مه هَچی عبادت کؤئنن، و اوشونِ تعلیمؤن هیچی جز حوکمون بشری نیه.“ 10 بازین عیسی جماعتِ خوشِ ورجه دوخنده و بوته: «گوش بدأین و بفهمین. 11 اوچیزی که آدمِ دهنِ میئن دیرون شنه، اونه نجسَ نوکؤئنه. بلکه اوچیزی که، اونه دهَنای بیرون هنه اونه که آدمیِ نجسَ کوئنه.» 12 هوموقع شاگردؤن اونه ورجه بومئن و بوُتن: « دؤنی که تی ایی گبؤن فریسی أنِ خیلی بر بوخورده؟» 13 عیسی جواب بده: «هر نهالیکه، می آسمؤنی پئر نکاری، بنَه جی بکنده بنه. 14 اوشونه وا بدین. اوشؤن کورِ راهنما ایسّن. هر وخت یکته کور، عصا کشِ یکته کوره دیگه ببی، هر دو ته چاه میِن کِئنَن.» 15 اما پطرس، عیسی بوته: «ایی حیکایت امه بِه ووئشکئن.» 16 عیسی جواب بده: «شَمَرَم حلِه نفَهمسین؟ 17 مگه نودونین که هر چی دهنای دیرون شنه، شُکم مِئن شنه و بعد دفع بنه؟ 18 امّا اوچی که دهنای بیرون هنه، دیلای سرچشمه گینه و ایی، اوچیزی ایسّه که آدمِ نجسَ کؤئنه. 19 چونکه دیلای ایسه که پلید فکرون، قتل، زنا، بیعفتی، دوزدی، دروغ گوایی و افترا سرچشمه گینه. 20 ایشؤنِ که آدمِ نجسَ کؤئنه، نه نوشُسته دستِ اَمره غذا خوردَن.» یکته کنعونی زناکِ ایمون 21 عیسی اورای بطرف منطقه‌ی صور صیدون بوشو. 22 یه روز یکته کنعانی زناک که اوراره شی بو، اونه ورجه بومَه و داد امره بوته: «آقا، ای داوودِ ریکای، مِه به رحم بکون! می لاکوی بدجور دیوبزه بوبُو.» 23 امّا عیسی هیچ جوابی ندا، تا اونکه اونه شاگردؤن پیش بومَئن و اونای خواهش بودَن و بوُتن: «اونه مُرخصَ کون، چونکه ژگله اَمره امه دومبالسر هنه.» 24 عیسی اوشون جواب بده: «مو فقط بنی اسراییل اَبیرَ بو گوسندؤنِ به سرادا بوبوم.» 25 امّا او زنکه بومَه و اونه جلو زانو بزه و بوته: «آقا مَه، یاری بدی!» 26 عیسی جواب بده: «زاکؤنِ نونِ هَیتن و سگؤنِ جلو تؤدَئن روا نیه.» 27 اما او زنکه بوته: «بله، آقا، امّا سگؤنم او خورده نونی که صابِ سفره سرای فبنه، خؤئنَن!» 28 هووخت عیسی بوته: «زناک، تی ایمؤن پیلّه ایسه، تی خواهش انجوم بنه!» هو دم اونه لاکو شفا بیته. عیسی خیلی أنِ شفا دئنه 29 عیسی اورای راه دکته و جلیلِ دریا کنارِ ور بوشؤ و یکته کوهِ برسه و اوره بنیشته. 30 جمعيتِ زیادی اونه ورجه بومَئن. اوشؤن خوشؤنِ اَمره شلؤن و کورؤن و فلجؤن و لالؤن و ناخوشؤنِ دیگه بأردن و عیسی پِا ورجه بنَئن و اونم ایشونه شفا بدا. 31 مردوم وختی بدئن که لالؤن گب زِئدَرَن، فلجؤن سالمَ بؤن، شلؤن راه شنئن، کورؤن دِئدَرن، حیرونَ بوئن و اسرائیلِ خدا ستایش بودَن. 32 عیسی خوشِ شاگردؤنِ دوخُنده و بوته: «می دیل ایی مردوم به سوجَنه، چونکه الؤن سه روزه که می أمره أن و هیچی خوردنِ بِه ندئنَن. نخوانَم ایشؤنه وشته سرا دئم. نبی که راه میئن ضعف بکونن.» 33 اونه شاگردؤن بوُتن: «ایی دور دکته جیگا میئن کورای تینیم نون، ایی جمعیته سیرَ گودنِ بِه فراهم بکونیم؟» 34 عیسی بپورسه: «چندته نون دئنین؟» بوُتن: «هفت ته نون و چندته کوشتای ماهی.» 35 عیسی مردومِ بفرمأسّه تا زمینِ سر بنیشَن. 36 هوموقع هفتته نون و چنته ماهی‌ِ ویته و بعد اونکه شکر بوده اوشونه تیکه تیکه بوده و خوشِ شاگردؤنِ هَدأ و اوشؤنم هدئن جماعتِ. 37 همه بوخوردَن و سیرَ بؤئن و شاگردؤن هفتِ زیبیل پور، زیاد بأرده غذا جَی جومَه گودَن. 38 اوشونی که غذا بوخُوردَن، به جز زناکؤن و زاکؤن چهار هزارته مرداک بؤئن. 39 بعد اونکه عیسی مردومِ سرادا. نوئِ سواره بوُ و مَجَدان منطقه بوشو. |
@ 2024 Korpu Company