لوقا 24 - کتاب مقدس به زبان گیلکی - گویش شرقی

عیسی زنده بوئن

¹ اولی روز هفته که یکشنبه بو، صوبه دَم، زناکؤن حنوطیِ که چاگوده بُن، خوشونه امره ویتَن و مقبره سو بُشوئن.

² بدِئن که مَقبره سنگ که درِ جُلُو هنّه بو، یکته کناری، گرادّا بوبوُ.

³ اما وختی که مقبره میئن بُشوئن، عیسی خُداوندِ جنازه نیاتّن.

⁴ ایی اتفاقوناجی غاغَه بؤن که یدفاری دو ته مَرداک، نورونی رخت امره ایشونه ورجه بَیسئن.

⁵ زاناکؤن تَرساجی خوشونِ سرؤنَ جیر تؤدَن؛ امّا او دوته مَرداک ایشونه بوتَن: «چرِه زندَه مُرده أن میئن وامُوجنین؟

⁶ او اِره نَیسه، بَلکه زنده بوبؤ! به‌یاد بأرین زمؤنی که جلیل میئن ایسابو، شمره چی بُوته.

⁷ بُوته که انسون ریکه باید گنُاهکارؤن دَس امره تسلیم ببی، صلیب سر هکشِه ببی و سوم روز میئن ویریسی.»

⁸ هوموقع زاناکؤن اونه گبؤن یاد بأردَن.

⁹ وختیکه مقبرای وگرسَن، ایی قضیه، او یازده ته رسول و بقیه أن به بوتَن.

¹⁰ زناکؤنی که ایی خبرِ رسولؤن بدَئن، مریمِ مَجْدَلیّه، یوآنّا، مریم یعقوب مَئر و زناکؤنی بوئن که ایشونِ همراهی گودن.

¹¹ امّا رسولؤن، خیال بودَن زناکون هذیون گوتدَرن و اوشونِ گبؤن باور نودَن.

¹² با ایی همه، پِطرُس ویرسَه و مَقبره سمت بدُوُسه و هچیمسه و نیگاه گوده، امّا جز کفن هیچّی ندِه. پَس از اوچیزیکه بَدِه بو حیرونَ بو، خؤنه سو وگرسه.

عمائوس راه میئن

¹³ هو روز میئن، دو ته از اوشون یکته دهات سو شوئدبون، به ایسمِ عِمائوس، که دوربر ده کیلومتری اورشلیم هنّه بو.

¹⁴ ایشون درباره همۀ اتفاقاتی که دکته بو، همدیگر أمره گب زِئدبون.

¹⁵ هیطو که گب زِئن سرگرم بُن، عیسی، خودوش، ایشون ورَجه بومه و ایشون امره همراه بوبوُ.

¹⁶ اما ایشون چیشمؤن دَوَسته بوبوُ بو تا عیسی نشناسَن.

¹⁷ عیسی اوشونای بپورسه: «راه میئن، چی باره گب زئدرین؟» اوشون غم ببارسه قیافه أمره، ساکت بِیسئَن.

¹⁸ بازین یکته از ایشون که کْلِئوپاس اینه ایسم بو، عیسی جواب میئن بوته: «مگه تو تنها غریبه ای ایسّی که اورشلیم میئن خبر ندائنی ایی روزؤن میئن چی اتفاقی دکته؟»

¹⁹ عیسی بپورسه: «کو اتفاق؟» اوشون بُوتن: «اوچیکه عیسای ناصری سر بومه. او یکته پیغمبر بو که خُدا دید میئن و همۀ مَردم ورجه، نفوذ کلام و کارؤن پرقدرتی داشت.

²⁰ و چوطؤ کاهینون سرؤن و امه پیله ترؤن اونه هدَئن تا موردنِ به محکومَ بی و اونه صلیب سر هکَشِه ئن.

²¹ امّا امه امید دَاشتیم که ایی هونی ببی که بایستی اسرائیل نجات بدی. علاوه بر ایی، الون سُوم روز میئن ایسایم که ایی اتفاقون دکته.

²² بعضی از زاناکؤن هم که امه میئن ایسان، اَمَره ماتَ گودن. اوشون ایمروز صوبه دَم مقبره ور بُشؤئن،

²³ امّا اونه جنازه نیاتّن. هوموقع وگرسن، اَمَره بوتَن فرشته ئانی رؤیا میئن بدِئن که ایشونه بوتَن عیسی زنده ایسّه.

²⁴ بعضی از امه ریفقؤن مقبره ور بُشوئن و جریون هوطو که زاناکؤن نقل بوده بُن، بیاتّن، امّا عیسی ندِئن.»

²⁵ هوموقع عیسی ایشونِ بوته: «چقدر شمه نادونین، چره هنی شیمه سخته که پیغمبرون گبونِ باور بکونین!

²⁶ مگه نباسّبی مسیح موعود ایی رنجؤن بَینه و بازین به خوشِ جلال برسی؟»

²⁷ عیسی، بازین از موسی و همۀ پیغمبرون شروع بوده و اوچیزی که تموم مُقدس کِتابؤن میئن درباره او بوته بوبوُ بو، ایشونِ به گب بزه.

²⁸ وختی او دهاتی که خواستن بوشوئن، رسئه دبون، عیسی وانُمود بوده که خوائنه دورتر بشی.

²⁹ اوشون اصرار بودَن و بوتَن: «امه أمره بِیس، چونکه هیچّی نوموُنسه تا روز تمنَه بی و شؤَ هم نزدیکه.» پَس عیسی دیرون بوشو تا ایشونه امره بیسه.

³⁰ وختی ایشونه اَمره سفره سر نیشته بو، نؤنِ ویته و شکر بوده، تیکه بوده و ایشونه هَدَه.

³¹ هو موقِع، ایشونه چیشمؤن بازه بوُ و عیسی بشناختن، امّا هو دَم ایشونه چیشم جلو غیبَ بو.

³² اوشون همدیگرِ بپورسه ئن: «مگه او زمؤنی که راه میئن امه امره گب زئدبو و مُقدس نویشته أنِ اَمه به تفسیر کائدبو، دیل امه سینه میئن نکّوتّ؟»

³³ پَس تاتأدی ویریسئن و اورشلیم سو وگرسَن. اوره او یازده ته رسول بیاتن که خوشونه ریفقؤن امره جومَه بؤ بُن،

³⁴ اوشون بوتَن: «ایی حقیقت دئنه که خُداوند زنده بوبؤ، چونکه شَمعون به ظاهیرَ بؤ.»

³⁵ بازین، او دو ته هم بوُتن که راه میئن چی اتفاقی دکته و چُطو عیسی نون تیکه گودنِ وخت بشناختن.

عیسی آشکارَ بوئن شاگردؤن به

³⁶ حله ایی اتفاق واسه، گب زئدبون که عیسی خودوش بومَه و ایشونه میئن بیسه و بوته: «سلام برشمه!»

³⁷ اما اوشون حیرون و ترسؤن، خیال بوُدَن که یکته روح دِئدرن.

³⁸ عیسی اوشونه بوته: «چرِه ایطو پریشؤنین؟ چرِه شک شیمه دیل میئن راه دِئنین؟

³⁹ می دَس و پا بَینین. خودم اِیسّم! مَه دَس بزنین و بینین؛ روح که گوشت و خاش ندئنه، امّا هیطو که دِئدرین مو دَئنم!»

⁴⁰ اینه بوته و خوشِ دَستؤن و پائانه ایشونه نیشون بَدَه.

⁴¹ اوشون ذوقای ماتَ بوئن و منیسن باور بکونَن. پَس عیسی ایشونه بوته: «هیچّی خوردن به دَئنین؟»

⁴² انِی ببیشته ماهی اونه هدئن.

⁴³ اونه هَیته و ایشونِ چیشمؤن جلو بُخورده.

⁴⁴ هوموقع عیسی ایشونه بوته: «ایی هو ایسّه که او زمون شیمه اَمرَه بوم گوتَم؛ ایی که تُمؤم اوچیزایی که موسی تورات و پیغمبرون کِتابون و مزامیر میئن درباره مو بنویشته بوبوُ، باید به انجوم برسی.»

⁴⁵ بازین، ایشونِ ذهنِ بازَ گوده تا بتؤنَن مقدس کیتابؤن بفهمَن.

⁴⁶ و عیسی ایشونِ بوته: «بنویشته بوبوُ که مسیح موعود رنج کشنه و سوم روز مرده أنِ جی ویریسنَه،

⁴⁷ و اونه ایسم امره توبه و گُناهؤن آمرزش همۀ قومؤن به موعظه بنه و اونه بنا اورشلیمَ جی ایسّه.

⁴⁸ شمه گوائون ایی اتفاقون ایسّین.

⁴⁹ مو می پئر موعودِ، شیمه به سرا دِئنَم؛ پَس شهر میئن بَیسین تا او زمونی که از اعلی، قدرت أمره پورا بین.»

عیسی، آسمون شنه

⁵⁰ بازین ایشونِ شهرای بیرون تا نزدیک بِیت‌عَنْیا بَبَرده و خوشِ دَستؤن درازَ گوده و، ایشونِ برکت بدَه؛

⁵¹ و هو موقع که ایشونِ برکت دائدبو اوشونای سیوا بوبؤ، به آسمؤن بَبَرده بوبوُ.

⁵² ایشونم اونه پرستش بوُدَن و یکته پیله شادی امره اورشلیم طرف وگرسَن.

⁵³ اوره همیشه معبد میئن ایسابؤن و خُدا شکر و سپاس گوتَن.