لوقا 23 - کتاب مقدس به زبان گیلکی - گویش شرقی

محاکمه پیلاتُس و هیرودیس ورجه

¹ هوزمون همته شورا کسون، ویریسَئن و عیسی پیلاتُس ورجه بَبوردَن

² و اوناجی شکایت بودن و بوتَن: «اَمه ایی مَردکه مجریم بیاتیم. او امه قومَ گُمراهَ کأدره و اَمره نوگزانه امپراطور رومِ مالیات هدیم و ادعا کوئنه که مسیح موعود ایسّه یعنی یکته پادشاه.»

³ پیلاتُس عیسای بپورسه: «تو یهود پادشاه ایسّی؟» عیسی جواب بده: «تو ایطو بوتی!»

⁴ بازین پیلاتُس کاهینون سرؤن و جماعت بوته: «هیچ جرمی ایی مَردکه محکوم گودَن به نیاتم.»

⁵ امّا اوشون اصرار امره بوتَن: «او تموم یهودیه مِیئن جلیلای بیته حتی تا اِرَه، هرجا که شنه خو آموتن أمره مردم کوک کوئنه.»

⁶ هیطوکه پیلاتُس اینه بشتؤسه، خواسی بودونی او جلیل شی ایسّه.

⁷ و چونکه بفهمسه که هیرودیس حکمرؤنی منطقه شِه، عیسی، اونه ورجه سرا دا، چونکه هیرودیس او زمون اورشلیم میئن ایسَه بو.

⁸ هیرودیس هیطوکه عیسی بدِه، خیلی شاد بوُ، چونکه خیلی وخت بو اونه خواس بینی. پَس بنا به اوچیزیکه که درباره عیسی بشتؤسه بو، ناجه داشت یکته نیشؤنه اوناجی بَینی.

⁹ پَس عیساجی خیلی سؤال بوده، امّا عیسی اونه جواب ندَه.

¹⁰ کاهینون سرؤن و تورات معلمون که اوره ایسّه بُن، اونه خیلی بهتون زِئن.

¹¹ هیرودیس و اونه سربازؤن هم عیسی بی حرمتی گودَن و اونه رَوخشنَ گیتن. بازین یکته شاهؤنه ردا اونه بپوشونِئن و پیلاتُس ورجه وگاردوئنِئن.

¹² او روز میئن، هیرودیس و پیلاتُس همدیگره أمره ریفقَ بوئن، چونکه قبلا دُشمن بوئن.

¹³ هوموقع پیلاتُس کاهینون سرؤن و قوم پیله ترؤن و مَردم دوخونده

¹⁴ و اوشونه بوته: «شمه، ایی مَرداکاکه می ورجه بأردین و بوتین که مردوم گمراه کأدره. مو شیمه ورجه اونه بپورس دپورس بودم و او جرمؤنی که شمه اونه ضد گونین هیچی نیاتّم.

¹⁵ هیرودیس هم هیچی نیاته، چونکه اونه امه ورجه وگردوئنه. هیطو که اینین، کاری نُوده که مستحق موردَن ببی.

¹⁶ پَس اونه شَلاق زِئنم و سرا دِئنم.»

¹⁷ هر عید میئن، پیلاتُس باید یکته زندونیِ اوشونه به سرا دائبی.

¹⁸ امّا اوشون یکجایی فریاد بزئن: «اونه سربه نیستَ کون و بارْاباسَ اَمه به سرادی!»

¹⁹ بارْاَبّاس بخاطر شورشی که شهر میئن اتفاق دکته بو، و هم قتل واسه، زندونِ میئن ایسابو.

²⁰ پیلاتُس که خواسی عیسی سرا دای، یبار ده اوشون أمره گب بزِه.

²¹ امّا ایشون هیطو فریاد زِئن که: «اونه صلیب سر بَبَر! اونه صلیب سر بَبرَ!»

²² پیلاتس سُوم بار اوشونه بوته: «چرِه؟ چی بدی بوده؟ مو هیچ جرمی اونای نیاتّم که مستحق موردن ببی. پَس اونه شَلاق زِئنم و سرا دئنم.»

²³ امّا اوشون فریاد أمره اصرار بودَن که صلیب سر بشی. سرآخر اوشونه صدای بلند حریفَ بو

²⁴ و پیلاتُس او حُکمی که خواسّن، هَدَه.

²⁵ او مَرداکی که شورش و قتل واسه زندؤن میئن ایسابو و جماعت اونه آزادیِ خواستن ویلَه گوده و عیسی ایشونه هَدَه تا خوشونِ دیل بخواه اونه امره رفتار بکونَن.

عیسی صلیب سر بوردَن

²⁶ وختیکه عیسی بوردبؤن یکته مَردکای به ایسم شَمعون، که قیرَوانِ مردم جی بو و زمیناجی، شهر میئن امئدبو، بیتَن و صلیبِ اونه دوش سر بنَئن، و اونه مجبورَ گودن عیسی دومبالسر ببری.

²⁷ خیلی از مَردم، و زناکؤنی أم که خوشونِ سینه سر کوتّن و ونگ زئن، اونه دومبالسر راه دکتن.

²⁸ عیسی خو روئه وگردؤنه و اوشونه بُوته: «اَی اورشلیم لاکوکؤن، می واسه ونگ نزنین؛ خودتؤن به و شیمه زاکون به ونگ بزنین.

²⁹ چونکه او زمونی هنه که شمه گونین: ”خوشا به حال زناکونی که ایشونِ به زأک نبنه، خوشا به حال او شوکومؤنی که هَرگی شوکومانَیتن و سینه‌ئانی که هَرگی شیر ندائن!“

³⁰ هو زمون، کوهؤنِ گونن: که ”امه سر فگردین!“ و پوشته أن که: ”امره بپوشؤنین!“

³¹ چونکه اَگه تَر چوب امره ایطو بوُدَن، خشک چوب امره چه کوئنَن؟»

³² دو ته دیگه مَرداکاکم که هر دو جنایتکار بوئن، بوردبؤن تا عیسی أمره بکوشَن.

³³ وختی او جیگا که جمجمه ایسم داشت برسه ئن، اوره عیسی صلیب سر ببوردن و او دوته جنایتکار هم صلیب سر ببوردن، یکته اونه راست ور و اوته اونه چپ ور.

³⁴ عیسی بوته: «پئر، ایشونِ بَبَخش، چونکه نودُئنَن چی کأدرن.» هوموقع اوشون قرعه تؤدَن تا اونه رختؤنِ خوشونِ میئن سهم بکونن.

³⁵ مَردم نیگاه کائدبون و قوم پیله ترؤن هم روخشنَ گیتن گوتَن: «بقیه مردومِ نجات بَدَه! اَگه مسیح موعود ایسّه و خُدا انتخاب بوبوُ، بدار خوشِ نجات بدای.»

³⁶ سربازؤن هم اونه رُخشنَ گیتَن. ایشون عیسی ورجه بومئن، ترشَ بوُ شراب اونه هَدَن

³⁷ و گوتَن: «اَگه یهود پادشایی، تَه نجات بدی.»

³⁸ یکته بنویشته هم اونه سر جور بچسبونِئبون که ’ایی ایّسه یهودی أن پادشاه.‘

³⁹ یکته از او دوته جنایتکار که صلیب سر ببرده بوئن، بی احترؤمی أمره عیسی گوت: «مگر تو مسیح موعود نی یی؟ پَس اَمَره و خودته نجات بَدی!»

⁴⁰ امّا او یکته اونه تشر بزه و بوته: «خُدا جی نترسنی؟ تو هم هو حُکم دَئنی!

⁴¹ امه مجازات به حق ایسّه، چونکه سزای أمه اعمالِ. امّا ایی مَرداک هیچ خطایی نُوده.»

⁴² بازین بوته: «ای عیسی، وختیکه تی پادشاهیِ برسی، منم به‌یاد بأر.»

⁴³ عیسی جواب بَدَه: «راست راستِ، تَه گونَم، ایمرو می أمره بهشت میئن هنی.»

عیسی موردَن

⁴⁴ ساعت دور وَر دوازده ظهر بو که تاریکی سراسر او ولایت بیته و تا ساعت سه بعدظهر ادامه داشت،

⁴⁵ چونکه آفتاؤ ده فُنتوس. هی موقع بو که، محرابگاه پرده از وسط دوپاره بوبوُ.

⁴⁶ بازین عیسی ژگله أمره بوته: «پئر، می روحِ تی دَستؤن میئن نِئنَم.» اینه بوته و خوشِ آخرین نفسِ بَکشِه.

⁴⁷ سربازؤن فرمانده، ایی اتفاق دِئنِ أمره، خُدا ستایش بوده و بوته: «راست راستِ که ایی مَرداک بی‌گنُاه بو.»

⁴⁸ مَردمی هم که تماشا گودنِ به جومَه بؤبُن، هیطو اوچیزی که اتفاق دکته بو بدِئن، درحالی که خوشونه سینه سر کوتّن، وگرسن خوشونِ خونه.

⁴⁹ امّا همۀ اونه آشنایؤن، او زناکؤنی هم که جلیلای اونه دومبالسر بوما بُن، دور ایسابوئن، ایی چیزؤنِ نیگاه کادبون.

عیسی دفنَ گودن

⁵⁰ اوره یکته مردکای به ایسم یوسف ایسَه بو، یهودیه رامه شهرا جی. او شورا عضو بو، یوسف مَرداکی بو خُوروم و صالح،

⁵¹ و شورا تصمیم أمره موافق نبو. او خُدا پادشاهی ریفا ایسابو.

⁵² ایی مردکای پیلاتُس ورجه بُشو و عیسی جنازه بخواسّه.

⁵³ پَس عیسی جنازه جیر بأرده، کتؤن میئن فیبیته و یکته مقبره که سنگ میئن بتاشته بوبؤ بو بَنا که تا الؤن هیشکی اونه میئن بنا نوبُو بو.

⁵⁴ او روز، ’آماده بوئنِ روز‘، عیدِ به بو و هیچّی نوموُنسه بو تا مقدس شنبه روز شروع ببی.

⁵⁵ زناکؤنی که جلیلای عیسی دومبالسر بومه بُن، یوسف دُومبال بُشوئن و مزار جا و اینه که چوطو جنازه اوره بنائنّ بدِئن.

⁵⁶ بازین وگرسن خونه، حنوط و عطری جات چا گودَن و شَنبه روز میئن عین شریعت حکم استراحت بودن.