یوحنا 13 - کتاب مقدس به زبان گیلکی - گویش شرقی

عیسی خو شاگردؤن پَائنه شوئنه

¹ قبل از عید پِسَخ، عیسی دؤنس که اونه وخت برسه که ایی دونیا جَی، آسمونی پئر ورجه بشی، شاگردونیم که ایی دونیا میئن دوست داشت، تا آخر محبّت بُوده.

² شؤم وخت بو. ابلیس قبلترَی یهودا اَسْخَریوطی، شمعون ریکه، دیل میئن بَنه بو که عیسی دشمن دست هدای.

³ عیسی که دؤنس پئر همه چیِ اونه دست بسپورده و خدا ورجای بومه و اونه ورجه شؤدره،

⁴ شؤم سرای ویریسا و خوشِ ردا بکنده و یکته حوله‌ ویته و خوشِ کمرِ دوَسّه.

⁵ بازین یکته لگنِ میئن آؤ دؤوده و شروع بُوده شاگردؤنِ پَا شستن و او حوله أمره که خو کمره دور دوسّبو، اوشونِ پائنه خوشکَ گوده.

⁶ وختی شمعون پطرسِ برسه، عیسی بوته: «آقا، تو می پَا شوئنی؟»

⁷ عیسی جواب بدا: «الؤن منی بفهمی چی کأدرم، امّا دیرتر فَهمنی.

⁸ پطرس، عیسی بوته: «هرگی نوگزانم می پائنه بوشوری!» عیسی جواب بدا: «تا تَه نوشورم، می أمره سهمی ندَئنی.»

⁹ شمعون پطرس بوته: «آقا، نه فقط می پئنِه، بلکه می دستون و می سرم بوشُؤر!»

¹⁰ عیسی جواب بدا: «اونی که حمّؤم بُوده، سرتاپا تمیزِ، ده شستن احتیاج ندَئنه، بجز اونه پَئأن. شمه پاک ایسّین، ولی نه همته.»

¹¹ چونکه دؤنس کیسه که اونه تسلیمَ کوئنِه، هینه وسه بوته: «شمه همته پاک نیئین.»

¹² بعد اونکه عیسی اوشونه پأئنه بوشوسته، خوشِ ردا دؤوده و دومَرته شؤم سفره​سر بنیشته. بازین اوشؤنای بپورسه: «بفهمسین چی شیمه بودَم؟»

¹³ شمه مه اوستاد و شیمه آقا دوخُوبِنین، و درستم گونین، چونکه مو ایسّم.

¹⁴ پس اگه مو که شیمه اوستاد و آقام، شیمه پأئنه بوشوستم، شَمَرَم بأء همدیگره پأئنه بوشورین.

¹⁵ مو ایی کار أمره شمره نیشون بدَئم تا شَمَرَم هیطو رفتار بکونین که مو شیمه أمره بودَم.

¹⁶ راست راستِ، شمره گونم، نه نوکر خوش اربابای پیلتره، نه سرا دأ، خوش سرادئن کسای.

¹⁷ الؤن که ایشؤنِ دؤنین، خوش بحال شمه اگه ایشؤنِ انجؤم بدین.

¹⁸ اوچیزی که گونَم شیمه همته​باره نیه. مو اوشؤنی که انتخاب بُودم، شنأسنم. امّا مقدس کیتابونِ ایی گب، بأء به انجوم برسی که «اونی که می نؤنِ خؤئنه می أمره دشمنی کوئنه.»

¹⁹ الؤن قبل اینکه اتّفاقی دکای، شمره گونم تا زمؤنی که اتفاق دکای، ایمؤن بأرین که مو هو ایسّم.

²⁰ راست راستِ، شمره گونم، هر کس می سرا دا کسِ قبول بکونی، مه قبول بُوده، و هر کس مه قبول بکونی، می سرا دا کس قبول بُوده.»

یکته از شمه مَه دشمن دست هدِئنه

²¹ عیسی بعد اینکه اینه بوته، روح میئن پریشونَ بوُ و آشکارا بوته: «راست راستِ، شمره گونم، یکته از شمه مه دشمن دست هدِئنه.»

²² شاگردؤن همدیگرِ نیگاه گودَن و مطمئن نوبوئن که اینه، کی باره گوتدره.

²³ یکته از شاگردؤن که عیسی اونه دوست داشت، سفره سر اونه ورجه لم بدابو.

²⁴ شمعون پطرس اِشاره أمره اونای بخواسّه تا عیسی جَی بپورسی اونه منظور کی​ایسّه؟

²⁵ او شاگرد هوطو که لم بدابو، خوشِ بیشتر عیسی نزدیکَ گوده و بپورسه: «آقا، او کی​ایسّه؟»

²⁶ عیسی جواب بدا: «او هونی ایسّه که ایی لقمه نون بعدِ اونکه کاسه میئن زِئنَم اونه هَدِنَم.» و هو موقع، یه لقمه نون کاسه میئن بزه و اونه یهودا، شمعون اَسْخَریوطی ریکه هَدأ.

²⁷ یهودا وختی لقمه هَیته، هو لحظه شیطؤن اونه میئن بوشؤ. بازین عیسی اونه بوته: «او کاری که خؤائنی انجؤم بدیِ، زودتر انجوم بدی.»

²⁸ امّا هیته از اوشونی که سفره​سر نیشت بوئن نفمسَن که عیسی چره ایی گبِ یهودا بزه.

²⁹ یسری أن فکر گودن چونکه یهودا دخل و خرج کیسه دَئنه، عیسی اونه گونه که، اوچیزی که عیدِ بِه لازم ایسّه بَین، یا اینکه ندارونِ یچی هدی.

³⁰ بعد اونکه یهودا لقمَه هَیته، تاتأدی بیرون بوشو. و شؤ بو.

یکته تازه حکم

³¹ بعد اونکه یهودا بیرون بوشو، عیسی بوته: «الؤن انسون ریکه جلال بیاتّه، و خدا اونه میئن جلال بیاته.

³² اگه خدا اونه میئن جلال بیاته، پس خداهم اونه میئن خوشِ جلال دِئنه و اونه هودَم جلال دِئنه.

³³ عزیز زأکؤن، اَنی ده شیمه اَمره ایسَئم. می دومبال گردنین، هوطو که یهودی أنِ بوُتم، الؤنم شمره گونم که اوجایی که مو شوئدرم، شمه منیئن باین.

³⁴ یکته تازه حکم شمره هَدِنَم، و او اینه که همدیگره دوست بدارین، هیطو که مو شمره دوست داشتم، شَمَرَم بأء همدیگر دوست بدارین.

³⁵ اگه همدیگرِ دوست بدارین، همته مردوم فَهمنن که شمه می شاگردونین.

³⁶ شمعون پطرس بوته: «آقا، کوره شوئدری؟» عیسی جواب بدا: «تو الؤن او جایی که مو شوئودرم منِئی مي دومبال بأی. امّا بعداً می دومبال هَنی».

³⁷ پطرس بوته: «آقا، چرِء الؤن منِّم تی دومبال بأم؟ مو می جونِ تی راهِ میئن نِئنَم.»

³⁸ عیسی بوته: «می راه میئن تي جونه هَدِئنی؟ راست راستِ، تَه گونم، پیشتر از اونکه تله اوئی بکونی، تو مه سه بار حشا کوئنی.»