عبرأنیأن 9 - کتاب مقدس به زبان گیلکی - گویش شرقی

عبادت، زمینی مقدس جیگه مئن

¹ ایسه حتی اولته عهد، یک سری قانون عیبادت گودن ئبه داشت و زمین سر نی یکته مقدس جیگه داشت،

² چونکه خیمه برپا بوبو، اولی قسمت چیراغدؤن، میز و مقدس نؤن بو. ائرهَ «قدس» گونن.

³ دومی پرده پوشت یکته قسمت دبو که اون نؤم «قدس الاقداس» بو.

⁴ ای قسمت مئن طلایی آتشدون هننأبو، بخور سوجؤنئن ئبه و عهد صندوق که هر طرف جی طلاکاری بوبؤبو و اون مئن یکته طلایی گوله هننأبو که «منّا» اون مئن دأشتن، هارون عصا که تیتی بوده بو و دوته سنگی لوح که عهد ده فرمون اون سر بنویشته بوبؤبو.

⁵ صندوق جؤر که اونه رحمت تخت دوخؤندن، «جلال» کروبی ئن فریشته ئان سایه تؤدأبون. الؤن ای چیزؤنه بأقأیده واشکاته مننیم.

⁶ بعد ای که ای چیزون ایطو حاضیرأبؤن، کاهینون دایم شون اولی قسمت مئن تا خوشون وظایفه انجؤم بدئن.

⁷ اما هچی پیله کاهین دومی قسمت مئن شنه و اونم هچی سالی یک دفأ، و خو همرأ قوربونی خونه بئنه تا خوشئبه و او گوناهون ئبه کی مردوم، نادونی خؤنی بودن، پیشکش بکونی.

⁸ و روح القدس ایطؤری نشؤن دئنه تا او زمت که اولی قسمت پابرجا، ألئه او راه که قدس الاقداس مئن شنه وأنبؤ.

⁹ که ای، ای دورون ئبه یکته نشؤنهَ. مطابق او، پیشکشون و قوربؤنی ئن که هدأ بنه، او کس وجدؤنه که عبادت کؤنه، کامیل پکأگوده مننئه.

¹⁰ بلکه اوشون هچی خوراکی ئن و نوشیدنی ئن و جورواجور غسلون و قانونونی ایسن که بدنه ربط دأنن و هچی تا او زمت که خدا، تازه ترتیبه بدی، اعتبار دأنن.

رهایی بواسیطه مسیح خون

¹¹ اما وقتی مسیح، پیله کاهن مقؤم مئن، خؤرمچی ئن ئبه بمأ که ایسه امئه نصیب بوبؤ، او یکته پیله تر و کاملتر خیمه مئن بمأ که دست جی چاگوده نوبو و ای خلقت شی نئه.

¹² او یک دفأ همیشک ئبه قدس الاقداس مئن بمأ، نه بوزؤن و گؤکولؤن خون همأ، بلکی خوشه خون همأ، و ایطؤ ابدی رهاییِ حاضیراگوده.

¹³ چون اگه بوزؤن و ورزه ئان خون، و ماده منده کورشه فودن، اوشون سر که ناپاکن، ایشؤنه تقدیس کؤنه تا جسم مئن پاک ببون،

¹⁴ چندی ویشتر مسیح خون که بواسیطه ابدی روح، خوشه بی عَیب خدای ئبه پیشکش بوده امئه وجدؤنه بیخودی کارون جی پکأکونه تا زینده خدا خدمت بوکونیم!

¹⁵ و مسیح یکته تازه عهد واسیطهَ، تا اوشونی که دعوت بوبؤن بوتؤنن او ابدی میراثه که خدا وعده بدأ بدست بأرن. چونکه یکته مرگ ایتفاق دکته که اوشونه او گونائان جی که اولی عهد مئن انجوم بوبؤ، رهایی دئنه.

¹⁶ چون یکته وصیت زمؤنی ایجرا بنه کی ثابیت ببی وصیت بوده کس بمرده.

¹⁷ چون وصیته بمرده وسی شأنه ایجرا گودن و تا او زمت که وصیت بوده کس زیندهَ، او وصیته ایجرا گوده نشأنه.

¹⁸ این وأسی حتی اولی عهد نی بی خون برقرار نبو.

¹⁹ چون او زمت که تموم شریعت حکمؤن بواسیطه موسی همه ته مردوم ئبه اعلؤم بوبو، او گؤکولؤن و بوزؤن خونه بیته و آؤ و سورخ پشم و زوفا همرأ، هم خود طومار سر و هم تمؤم مردوم سر بوشؤنده.

²⁰ و بوته: «اینه او خون عهد که خدا شیمئبه حکم بوده.»

²¹ و هوطؤ او خونه خیمه سر و همه ته ظرفؤن سر که پرستش ئبه بکار شو، بوشؤنده.

²² راس راسه مطابق شریعت تقریبا همه چی خون أجی پکأبنه و بی ای کی خون فوده ببی، گونائان آمرزش وجود ندأنه.

²³ پس خأ ای چیزؤن، که آسمؤنی چیزؤن جی یکته نمونه ایسن، ای قربؤنی ئن همرأ پکأبون، اما خود آسمؤنی چئن او قربونی ئن همأ که ایشون جی بهتره پکأبنن.

²⁴ چونکی مسیح او قدس الاقداس مئن که دست اجی چاگوده بوبؤ نوشؤ و فقط یکته نمونه ایسه او حقیقتی چیزؤن جی، بلکه خود آسمؤن ور بوشؤ تا امئه طرف جی خدای محضر مئن حاضیرأبی.

²⁵ و ایطؤ نئه که او خوشه تترج قوربؤنی بکونی، یکته پیله کاهین جور که هر سال قدس الاقداس مئن شنه، اونم او خون همأ که خودش خون نئه.

²⁶ چونکه ایطؤ مسیح خأسی او زمت جی که دونیا بنا بوبو تترج عذاب بکشی، اما ایطؤ نوبؤ. او ألؤن یک دفأ همیشک ئبه آخرته زمؤنؤن مئن بمأ تا خو قربؤنی گودن همره، گوناه از مئن ویگیری.

²⁷ و هوطو که تعیین بوبو که اینسون یک دفأ بمیری و بأزون داوری أنه،

²⁸ پس مسیحم که یک دفأ قوربؤنی بوبؤ تا خیلی ئن گوناهؤنه ویگیری، دومی بار ئبه هنه، ولی نه گوناهؤن ویتن ئبه، بلکه اوشؤن نجات وأسی که شوق همأ اون ئبه چوشم رافایی دأنن.