عبرأنیأن 8 - کتاب مقدس به زبان گیلکی - گویش شرقی

یکته بهتر عهدِ پیله کاهین

¹ الون اصل مطلبی که امه گوتدریم اینه که امه ایجور پیله کاهین دَئنیم که خدای متعال تخت راست دست ور، آسمون مئن نیشته،

² مقدس جائان خدمتکار، او حقیقتی خیمه که خداوند برپا بوده، نه اینسؤن.

³ چون هرته پیله کاهین تعیین بنه تا پیشکشون و قوربؤنی ئن هَدی، پس ای کاهینم خأ یه چی پیشکش گودن ئبه بداری.

⁴ ایسه اگر او زمین سر ایسابی، هرگی کاهن نوبؤنأبو، چونکه کاهنؤنی ایسأن که بنا به شریعت حکم، پیشکشؤن هدئنن.

⁵ اوشون آسمونی چیزونه نمونه و سایه کونن. هینه واسه، چون او زمت که موسی خاس خیمهَ برپا بکونی، خدا اونه حکم بوده و بوته: «تی حواس هننأبی که همه چئه عَین او نمونه که کوه مئن تأ نشؤن بدأ بوبؤ چاکونی.»

⁶ اما ایسه خدمتی که مسیح بدست بأرده، به مراتیب او قدیم خدمت جی جؤرتر دره، چون او عهد که او اون ئبه واسیطه گری کونه بهتره، او عهد که وعده ئان بهتر سر بنا بوبؤ.

⁷ چونکه اگر او اولته عهد بی عَیب بو، د لازیم نبو که دومته عهد دومبال دبیم.

⁸ اما خدا اوشؤن جی یکته عَیب یاجنه و گونه: «خداوند گونه، ایسه روزؤنی هنه، که مو اسراییل خاندون و یهودا خاندون همره یکته تازه عهد دبدنم»

⁹ نه او عهدِ مورسؤن که اوشؤن پئرؤن همره دبستم، او روز که اوشؤن دستِ بیتم تا اوشونه مصر ولایت جی بیرین بأرم؛ چون خداوند گونه که اوشون او عهد سر کی می همأ دبستن نیسأن پس مو می رؤ اوشون جی وگردونئم

¹⁰ چونکه خداوند گونه: اینه او عهد که او روزؤن پسی اسراییل خاندؤن امره دبدنم: می شریعته اوشؤن فیکر مئن نئنم، و اوشؤن دیلؤن سر نیویسنم. و مو اوشؤن خدا بنم، و اوشؤن می مردوم.

¹¹ و هیکس خوشه همسایهَ تعلیم ندئنه وهیکس خوشه برأره نگونه «خداونده بشناس!» چونکه همه ته، پیلدنه تا کوشتأی، مَه شناسنن،

¹² چونکه مو نسبت به اوشون خطائان رحم کونم، و اوشؤن گونائانه هرگی یاد نأبئنم.»

¹³ خدا یکته جدید عهد گب زِئن همرأ، او اولته عهده بی اعتبار دؤنه، و او چیزی که اعتبار جی کئنه، کهنه بنه و آمادهَ که از بین بشی.