عبرأنیأن 6 - کتاب مقدس به زبان گیلکی - گویش شرقی

¹ پس باین مسیح اولته درسونه پوشتِ سر بنیم و بالیغأبؤن سمت جلو بشیم. امه نخأ دومرته اولته درسونه بنیم توبه و بیخودی کارون و ایمون به خدا،

² و غسل تعمیدونه یاد دأن، دستگذاری ئن، بمرده ئان زینده وابؤن و ابدی داوری به.

³ اگه خدا ایجازه بدی ایی کارم کوئنیم.

⁴ چون اوشونی که یک دفأ نورؤنی بوبؤن، اوشون که آسمونی پیشکش مزهَ واچیشتن و روح القدس مئن شریکأبؤن،

⁵ و خدا کلؤم خوبی مزه و آینده دورون قوتون مزهَ واچیشتن،

⁶ و بأزون ایمون جی بکئن، د نشأنه ایشونه هنده توبه سمت أردن، چره که اوشون هنده به ضرر خودشون خدا پسره صلیب سر بئنن و اونه همه کس جلو بی حرمت کؤنن.

⁷ اگر یکته زمین، او وارشه که ویشتر اوقات اون سر وارنه به خودش بگیری و اوشون واسی کی ایشون ئبه بکاشته بوبؤ خؤرم محصول به بار بأری، خدا جی برکت گینه.

⁸ اما اگر تیف و تموش به بار بأری، بی ارزش زمینه و نزدیکه که لعنت ببی و سرأخره بسوجؤنئه بنه.

⁹ ای عزیزؤن، هرچند ایطو گب زِئنیم، اما شیمه باره حتم دأنیم که خیلی بهتر چی ئن، که نجات شئه، شمره نصیب بنه.

¹⁰ چونکه خدا بی انصاف نیه که شیمه کار و محبتیِ که اون ایسم واسه مقدسین خدمت مئن نشون بداین یاداکونی هوطو که هندئرأم کأدرین.

¹¹ امئه آرزو ای بو که هرته از شمه تا آخر هو غیرته نوشون بدین تا شیمه امید تموم و کمال آشکار ببی.

¹² تا تنبل نبین، بلکه شیمه سرمشق اوشؤنی ببون که ایمؤن و صبر امره وعده ئانه به ارث بئنن.

خدا وعده ئان حتمی ایسن

¹³ وختی که خدا ابراهیمه وعده بدأ، چونکه هیکس اون جی پیله تر نیسأبو که اون سر قسم بوخوری، پس خودش سر قسم بوخورده

¹⁴ و بوته: «حتم بدار که تَه برکت دِئنم و تهَ زیاداکونم.»

¹⁵ و ایطوری، ابراهیم بعد از اونکه صبر امره رافا بیسأ، وعدهَ بدست بارده.

¹⁶ چون مردوم او کس سر قسم خوئنَن که اوشؤن جی پیله تره، و تموم اوشون جر و بحثون مئن یکته قسم هننأ که سرأخره اوشون گبونه ثابیت کونه.

¹⁷ پس او زمت که خدا خاس ویشتر نشون بدی که اون وعده، واریثون ئبه عوضأنبنه، اونه قسم همأ ضمانت بوده.

¹⁸ تا بواسیطه دوته چی که عوضأنبنه، و امکون ندأنه خدا اون باره دورؤغ بوگؤ، امه که پناه أردن ئبه در بوشؤیم، خیلی دیلگرمی دأشتیم تا او امیدیِ که امئه جلو بنأ بوبؤ، قایم بدأریم.

¹⁹ ای امید امئه جؤن ئبه یکته لنگره مؤنه که قورص و مطمئنه، امیدی که او طرف خیمه پرده شنه، به او دورینی جیگه، به قدس الاقداس،

²⁰ او جیگه که عیسی أمرأجی جلوتر و امئه وأسی دورین بوشؤ، و تا ابد پیله کاهین بوبُو، ملکیصدق موقؤم مئن.