عبرأنیأن 13 - کتاب مقدس به زبان گیلکی - گویش شرقی

او قوربؤنی ئن که خدا پسند کونه

¹ برارونه محبت شیمئه مئن برقرار ببی.

² این جی که نسبت به غریبه ئان مهموندوست ببین غافیلأنبین، چون ای کار همأ بعضئن بی ای که بودونن، فریشته ئان جی پذیرایی بودن.

³ زیندؤن دبؤرؤنه یاد بدارین، یک جور که بخألئه شمرم اوشون همره زیندون مئن ایسأین و اوشونیِ که عذاب کشنن یاد بدأرین، چونکه شمرم او تن مئن عذاب کشنین.

⁴ بوگذارین ایزدواج همه کس مئنه احترؤم بدأری و زنأک و مردأک رابیطه پاک بداشته ببی، چون خدا بی عیفتون و زیناکارونه داوری کؤنه.

⁵ شیمئه زیندگیِ پولدوستی جی دور بدارین و هو چی همرأ که دأنین قانع ببین. چون خدا بوته: «هرگی تأ ویلأنوکؤنم، و تأ تسک و تنها ننئنم.»

⁶ پس امه ایطمینون همره تینیم گوتن که: «خداوند می یاوره، نترسنم. آدم می همره چی تینه گودن؟»

⁷ شیمئه رهبرونه خاطیر بارین، اوشون که خدا کلؤمه شمره بوتن. اوشون آخرعاقبت و زیندگی راه ثمرهَ نیگا بکونین و اوشون ایمون جی سرمشق بگیرین.

⁸ عیسی مسیح دیروز و ایمروز و تا ابد هونه.

⁹ جورواجور و عجایب غرایب تعلیمون همأ از راه بدر نبین، چون ای خوبه که آدمی دیل، فیض همره قوت بگیری، نه او خوراکون همره که اوشون ئبه که ایشون دومبال بوشون هیچ نفعی ندأشت.

¹⁰ امه یکته قربونگاه دأنیم که او خیمه خادیمون حق ندانن اون جی بوخؤرن.

¹¹ پیله کاهین او حَیوؤنؤن خونه گوناه قربونی واسی قدس الاقداس مئن بئنه، اما اوشون جنازه ئان اردوگاه بیرین بسوجونئه بنه.

¹² هیطؤ عیسی نی شهر دروازه بیرین عذاب بکشئه تا بواسیطه خوشه خون مردومه تقدیس بکونی.

¹³ پس بأین امرم ای اردوگاه جی بیرین بأیم و اون ورجه بشیم و اون ننگ و خواری مئن شریک ببیم.

¹⁴ چونکه امه ائره شهری ندأنیم که بجا بومؤنی، بلکه شوق همأ او شهر رافا ایسأیم که خأ بأی.

¹⁵ پس باین بواسیطه عیسی، هیطو تترج شکر گودن قوربؤنیِ، خدا به پیشکش بکونیم. ای قوربؤنی او مچه ئان ثمرهَ که اونه اعتراف کونن.

¹⁶ خوبی گودن جی و دیگرونه شریک گودن جی او چی مئن که دأنین، غافیل نبین. چون خدا ایجور قربونی ئن جی راضی ایسه.

¹⁷ شیمئه رهبرونه ایطاعت بکونین و اوشون تسلیم ببین، چون اوشون شیمئه جؤنؤن جی حیفاظت کونن و هخأن حیساب پس بدئن. بوگذأرین ای کاره شادی همره بکونن و نه آه و ناله همره، چونکه ای شیمئه نفع نئه.

¹⁸ امئبه دعا بکونین، چون اطمینون دانیم که امئه وجدون پاکه و خأنیم هر طرف جی سربولند ببیم.

¹⁹ شمرجی ویشتر و ویشتر خأنم که دعا بکونین تا زودتر شیمئه ور وگردم.

²⁰ الؤن که صلح و سلامتی خدا، بواسیطه او ابدی عهد خون، امئه خداوند عیسی بمرده ئان جی زینده واگوده، یعنی گوسندؤن پیله گالش،

²¹ هو خدا شمره هر خورمچی همره مجهز بکونی تا اون ارادهَ بجا بأرین، تا او چی که خدا راضی کؤنه بواسیطه عیسی مسیح امئه مئن به عمل بأری. هو عیسی مسیح که جلال تا ابد و تا ابد اون همره ببی. آمین.

²² برأرؤن، شمرجی خأنم می گبه که پند و نصیحته تاب بارین، چونکه خلاصه شیمئبه بنویشتم.

²³ خأ بودؤنین که امئه برأر تیموتائوس، آزادأبؤ. اگر او زود بأی، اون همأ هنم و شمره اینم.

²⁴ شیمئه همه ته رهبرون و همه ته مقدسین ئبه سلام برسؤنین. اوشونی که ایتالیا شی ایسن شیمئبه سلام رسؤنئنن.

²⁵ فیض شمه همه ته همرأ ببی.