کولسیان 2 - کتاب مقدس به زبان گیلکی - گویش شرقی

¹ خأنم بودؤنین کی شیمئه وأسی و اوشؤن وأسی کی لائودیکیه مئن ایسأن، و همه ته اوشؤن وأسی کی تا ایسه مأ ندئن، چوطؤ تقلا کؤنم،

² تا دیلگرم ببون و هوطؤ کی محبت مئن کس کس همرأ متحدن، او ایطمینؤن کامل و بی حد و حیساب پوری کی فهم أجی بدست هنه بهره ببرن و هی را یأجی خدا راز، یعنی مسیحه، بشناسن،

³ اون مئن کی تمؤم حیکمت و دؤنایی گنجؤن دخوته هننأن.

⁴ اینه گونم تا هیکس شمره او دلیلؤن أجی کی قانع کؤنه، فیتأندئه.

⁵ چون هرچند جسما شیمئه ور نیسأم، اما روح مئن شیمئه همرأ ایسأم و شیمئه نظم و قورص ایمؤنیه کی مسیحه دأنین اینم، خوشحالم.

مسیح مئن زینده

⁶ پس هوجور کی مسیح عیسای خداونده قبول بودین، اونه مئن زیندگی بوکونین،

⁷ اون مئن بنه بوکونین و رشد بوکونین، و ایمؤن مئن قایم ببین، و هوطؤ کی یاد بیتین، شکر گودن أجی پور ببین.

⁸ واخوب ببین تا هیکس شمره فلسفه و پوچ فریب همأ گیرفتارأنوکونه، کی نه مسیح سر، بلکه آدمؤن رسم و رسومات و ای دونیای اصول سر پابرجا ایسه.

⁹ چون ذات الهی پوری همه ذره جسم جور مسیح مئن هننأ،

¹⁰ و شمرأم مسیح مئن، که همه ته قدرتؤن و رئیسؤن سره، پورأبؤین.

¹¹ و مسیح مئن ختنه نی بوبؤین، یکته ختنه کی دست أجی أنجؤم نیته، بلکی جسمؤنی تن بیرین أردن همرأ، بواسیطه مسيح ختنه أنجؤم بوبؤ.

¹² غسل تعمید مئن اون همرأ گیلأبؤین و بواسیطه ایمؤن به خدا قدرت، که عمل کؤنه و مسیحه بمرده ئان أجی زینده واگوده، اون همرأ زینده وابؤین.

¹³ و خدا شمره کی شیمئه گونائان و شیمئه ختنه نوبؤ جسم مئن بمرده‌بین، مسیح همأ زینده وأگوده. او أمئه همه ته خطائانه ببخشئه

¹⁴ و او قرضؤن سنده کی بواسیطه قوانین أمئه ضید بنویشته بوبؤ باطیلأگوده و از بین ببرده، و صلیب سر میخکوبأگوده.

¹⁵ او، رئیسؤن و قدرتؤنه سلاحؤنه هیته، و صلیب أجی اوشؤنه بسر بوبؤ و اوشؤنه همه کس جلؤ رسوا بوده.

¹⁶ پس نوگذأرین هیکس راجع به او چی کی خؤنین و واخؤنین، یا راجع به عید و تازه ماه و مقدس شنبه روز، شمره قضاوت بوکونه.

¹⁷ ایشؤن او چئن سایه ایسه که هنه، ولی اوشؤن اصل مسیح شئه.

¹⁸ نوگذأرین کسی شمره محروماکونه ای ایصرار همرأ کی تنه خأ خوب دأشتن و فریشته ئانه پرستش گودن. ایجور آدم هچی خوشه رؤیائانه تکیه کؤنه و بی ای کی دلیلی بدأره، خوشه پوچ فیکرؤن همرأ مغرورأبنه.

¹⁹ ایجور آدم د سره دنچکسه، او سر کی تمؤم تن اون همرأ جؤن گینه و بواسیطه مفصلؤن و بندؤن همدیگر همرأ بدأشته بنه، و اوجور کی خدا خأنه رشد کؤنه.

²⁰ أگه شمه مسیح همرأ نسبت به ای دونیای اصول بمردین، چره اوشؤن مورسؤن کی بخألئه حلئه ای دونیا شی ایسن، اون قانونؤنه عمل کؤنین، او قانونؤن کی گونه:

²¹ « دست نزن! وأنچیش، لمس نوکون!»؟

²² ایشؤن همه مربوط به چیزؤنی ایسه کی ایستفاده گودن همرأ أز بین شنن، و آدمی دستورات و تعلیم سر بنا بوبؤ.

²³ هرچند وقتی کی ای خودساخته دین أجی و تن ریاضت و تنه سخت گیتن أجی گب زئنین، حکیمؤنه نظر رسنه، اما ایشؤن این مئن که هوا و هوس جلؤ بگیرن، هیچ کاری ایشؤن دست أجی بر نأنه.