اعمالٚ رسولأن 2 - کتاب مقدس به زبان گیلکی - گویش شرقی

روح‌القدس هنه

¹ وختی پِنتیكاست روز برسه، همه یکدیل یه جا جومَه بوبوئن

² که یدفاری یکته صدا تندِ باد مورسون آسمونَ جی بومَه و تمام او خونه ای که اونه میئن نیشته بوئن، پُورَه گوده.

³ هووخت، یه چی بدئن که آتش بلِ مورسون تقسیم بوبؤ و هرته سر بنیشته.

⁴ بازین همته روح‌القدسَ جی پورا بوئن و بینا بودَن به زبؤنؤنِ دیگه گب زِئن درست اوجوری که روح القدس ایشؤنِ قوت بدَه.

⁵ او روزؤن میئن، دیندار یهودی أن، از همه مملکتون که آسمون جیر هنه بو، اورشلیم شهر دیرون ایسا بوئن.

⁶ وختی ایی صدا بلند بوبوء، یکته جمعیت جومَه بوئن و ایشؤن مات بخوشته، چون ایشون هرته ایشتؤسَن که اوشؤن، اون زبؤن أمره گب زِئدرن.

⁷ پس مات و حیرون، بوتَن: «مگه همه ایشون که گب زِئدرن جلیل شی نییَن؟

⁸ پس چوطو امه هر كس ایشتؤنیم که به اَمه مَئری زبؤن گب زِئدرن؟»

⁹ پارتؤن و مادؤن و عیلامی أن، بین‌النهرین مردمؤن و یهودیه، كاپادوكیه و پونتوس، آسیا

¹⁰ و فْریجیه، پامفیلیه و مصر و لیبی سامؤن سر که قیرَوانِ شی بو، و رومی زائرؤن

¹¹ چی یهودی و چی اوشنی که یهود دینَ قبول بوده بوئن؛ و هیتو كْرتِ مردمؤن و عربستان - همه ته ایشتؤنیم، که ایشون به اَمه زبؤن أمره خدا پرقدرت کارونَ جی گب زئدرَن.»

¹² پس همته حیرؤن و سرگردون همدیگرِ گوتن: «ایی اتفاق معنی چی‌ایسه؟»

¹³ اما بعضی أنم روشخنیتن و گوتن: «ایشون تازه شرابَ أمره مست بوبوئن!»

پطرس پیغؤم پنطیکاس دیرون

¹⁴ بازین پطرس او یازده ته رسول أمره ویریسَه و خو صدا جؤر بأرده، اوشونه بوته: «ای یهودی أن و ای همه کسونی که اورشلیم دیرون زیندگی کأدرین، اینه بفهمین و اوچیِ که گونم دقّت أمره گوش بدین!

¹⁵ ایی مرداکؤن، اوجور که شمه فكر کوئنین مست نیئن، چون حلِه ساعت نُه صبح ایسه!

¹⁶ بلكه ایی هونه که یوئیلِ پیغمبر اونه باره ایطو پیشگویی بودِه بو که:

¹⁷ «”خدا گونه: آخری روزؤنِ میئن می روحَ جی تموم مردوم سر فوکؤنم. شیمه ریکاکؤن و لاکوکؤن نبوت کوئنن، شیمه جوؤنؤن رویاأنی اینن و شیمه موسندون خوئؤنی اینن.

¹⁸ و او روزؤن میئن، حتی غلامؤن و كلفتؤن سرم می روح فوکؤنم و اوشؤن نبوت کوئنن.

¹⁹ جؤر، آسمؤنون میئن، عجایب چی أن، و جیر، زمین سر، نشؤنه‌أنی آشكارَ کوئنَم، خون و آتش و دودَ جی.

²⁰ پیش از اونکه خداوندِ روز برسی، او باشکوه و پیله روز ، آفتاؤ تاریک بنه و ماه رنگ خون مورسون بنه.

²¹ و ایطو بنه که هر کس خداوندِ ایسم دوخؤنی نجات پیدا کوئنه.“

²² «ای یهودی مردوم، ای گبون بشتوئین: هوطو که خودتون دؤنین، عیسای ناصری یکته مرداک بو که خدا، معجزه أن و عجایب چیون أمره و نشؤنه‌أنی که اونه دست أمره شیمه میئن آشكار گود، گوایی بدَه که او حّقیقت ایسّه.

²³ هی عیسی، طبق خدا اراده و نقشه، شیمه دست تسلیم بوبؤ و شمه شریر آدمون دستون أمره، اونه صلیب سر هکشِیئن و بکوشتین.

²⁴ خدا اونه مرگ عذابؤنای نجات بدا، زنده بوده، چون غیر ممكن بو که مرگ بتؤنی اونه خوشِ چیکال میئن بدأری.

²⁵ هوطو که داوود پادشاه عیسی باره گونه: «”خداوندِ همیشه می جلو بدِئم، چون او می راست دست ور ایسا تا نلرزم.

²⁶ هینه وَسه می دیل شاد و می زبؤنم خوشحال؛ می تن أم امید میئن موئنه.

²⁷ چون که می جونِ مُرده‌أن دنیا میئن ویلَه نوکوئنی، و نوگزانی که تی انتخاب بوبؤکه تن بپیسی.

²⁸ تو زیندگی راهونِ مَه باموتی، و تو تی حضور أمره مَه شادی جی پورا کوئنی.

²⁹ «ای برأرؤن، تینم اطمینون أمره شمره بوگوم که أمه جد داوود هم بمورده و هم دفنَ بو و اونه مقبره تا امروز اَمه ورجه هَنّه.

³⁰ داوود یکته پیغمبر بو و دؤنس که خدا اونه بِه قسم بوخورده که یه نفرِ اونه نسلای اونه سلطنت تختِ سر نیشونبئنه.

³¹ داوود که پیشتر آینده‌َ بدِه بو، مسیح زنده بوئن باره بوته که اونه جؤن مُرده‌أنِ دنیا میئن نوموئنه و اونه تنم نپیسنه.

³² خدا هی عیسی زنده بوده و أمه همه‌ اونه شاهدونیم.

³³ عیسی خدا راست دستِ ور جؤر ببورده بوبؤ و او آسمونی پئرای، روح‌القدسِ موعودِ هیته و أمه سر فوده، هینی که الؤن اینین و ایشتؤنین.

³⁴ چون داوود خودوش به آسمونؤن جؤر نوشؤ، ولی خودوش بوته: «”خداوند، می خداوندِ بوته: ’می راست دست ور بنیش

³⁵ تا اوزمونی که تی دشمنؤنِ تی پا جیر توئدنم.“‘

³⁶ «پس یهود قوم، همته‌ حتم بودوئنن که خدا، ایی عیسی که شمه اونه صلیب سر هکشِئین، هم خداوند و هم مسیح موعود بوئده.»

³⁷ وختی اوشؤن اینه بشتؤسَن، اینه مورسون بو که ایشون دیلِ میئن خنجر فوقاسَن و پطرس و بقیه رسولؤن بوتَن: «ای برأرؤن، الون چی بکونیم؟»

³⁸ پطرس ایشؤنِ بوته: «توبه بکونین و هركدؤم از شمه، شمه گناهون ببخشه بوئن به، عیسی مسیح ایسم أمره غسل تعمید هگیرین که روح‌القدس هدیه هگینین.

³⁹ چون ایی وعده شیمه بِه و شیمه زأكؤن بِه و تموم كسؤنی بِه ایسّه که دور ایسَئن، یعنی هر کی که اَمه خداوند خدا اونه خو ورجه دوخُوئنی.»

⁴⁰ پطرس خیلی گبؤن دیگرِ أمره گوایی بده و اوشونه تشویق بودِه، بوته: «شمره ایی نسلِ جی که کج راه میئن شوئدرن نجات بدین!»

⁴¹ پس اوشونی که پطرسِ پیغؤم قبول بودن، غسل تعمید هیتن. هو روز میئن حدود سه هزار نفر، ایشؤنِ اضافه بوبوئن.

ایماندارون زیندگی

⁴² اوشؤن خوشؤنِ، وقف تعلیم گیتن رسولؤن جی و وقف مشارکت دیگر ایماندارونِ أمره و نون پَئره گودن و دعا بودن.

⁴³ همته حیرونَ بوبوئن، چون خیلی عجایب چیزون و نیشونه أن رسولؤنِ دستَ جی آشكارَ بوی.

⁴⁴ ایماندارون همته همدیگر أمره یکدل بوئن و همه چی میئن شریك بوئن.

⁴⁵ خوشؤنِ مال و مینالِ فورتن و اونه پولِ هركسِ نیاز قد، همته میئن سهم گودن.

⁴⁶ ایشون هر روز، معبد میئن همدیگرِ أمره جومَه بوئن و خوشؤنِ خونه أنِ میئنم نون پئرَه گودن و دست دلبازی و شادی أمره غذا خوردن

⁴⁷ و خدا ستایش گودن. تموم مردم ایشؤنِ احترومِ داشتن؛ و خداوند هر روز اوشونی که نجات گیتنِ، ایشؤنِ جمعِ میئن اضافه گود.