اعمالٚ رسولأن 19 - کتاب مقدس به زبان گیلکی - گویش شرقی

پولُس اَفِسُس دیرون

¹ وختی که آپولُس قُرنتُس شهر دیرون ایسا بو، پولُس او ولایت راه اجی که خشکی بو ردّ بو، افِسُس شهر برسه. اوره چند ته شاگرد بیأته

² پولس ایشؤنَ جی بپورسه:«وختی که ایمؤن بأردین، روح القدس بیتین؟» اوشون بوتن:« نه، امه حتی نشتؤسیم که روح القدس هم وجود دئنه.»

³ پولس ایشؤنِ بوته: «پس، چی طو غسل تعمید بیتین؟» اوشون بوتن: «یحیی تعمیده.»

⁴ پولُس بوته: «یحیی تعمید، توبه تعمید بو. او قومِ گوت، اونیِ که بعدِ او هنه ایمؤن بأرَن، یعنی عیسی.»

⁵ اوشون وقتی اینه بشتؤسَن، به ایسم عیسی خداوند غسل تعمید بیتَن.

⁶ وختی که پولُس اوشونه سر دست بنه، روح القدس ایشؤنه سر قرار بیته، اوشون دیگر زبونون أمره گب زئن و نبوت گودن.

⁷ او مردکؤن، حدود دوازده نفر بوئن.

⁸ بازین پولُس یهودیونه عبادتگاه بوشو، اوره سه ماه جرأت أمره گب زئ و دلیل آبرد و خدا پادشاهی باره، اوشون قانع اگود.

⁹ ولی بعضی أن، زیر بار نوشون و ایمؤن نأردن و همکس چشم جلو، ’اهل طریقت‘ یعنی ایمون دارون بد گوتن. پولُس اوشونِ ندئه بو گیت و شاگردؤنِ خوش أمره ویت، همته روز تیرانوس مدرسه دیرون گب زی و دلیل أبرد.

¹⁰ دو سال ایطوری بوگذشته و ایی مدت میئن، تمام آسیا ولایت مردمون چی یهودی و چی یونانی، خداوندِ کلام بشتؤسَن.

اسکیوا پسرون

¹¹ خدا پولُس دست أمره عجایب غرایب معجزه أن آشکار گود،

¹² جوری که مردم دستمال و پیشبندؤنی که اونه تنِ برخورد، ناخوشونِ بِه بوردَن، و اوشونه ناخوشی خوبَ بو دبو و پلید ارواح ایشؤنای بیرون شو.

¹³ پس چند ته دورَه گرد جن گیر که یهودی بوئن، حق سعی بودن عیسای خداوند ایسم کسونی بِه که پلید ارواح دأشتَن، بخونن. اوشؤن گوتن:«به او عیسایی که پولُس اونای موعظه کوئنه شمره قسم دِئنیم!»

¹⁴ اوشونی کی ایطو گودَن، اِسکیوا هفتِ ریکه بوئن که یکته از پیله کاهنون یهود بو.

¹⁵ ولی پلید روح اوشؤن جواب بدَه بو: «عیسی شناسم، پولُسم شناسم، ولی شمه کی ایسّین؟»

¹⁶ او مردکای که پلید روح داشت اوشونِ سر واز بوده، اوشونه همته حریفَ بو. او طوری اوشونه بزه که لُخت و زخمی او خونه جی فرار بودن.

¹⁷ اَفِسُس مردمون همته، چی یهودی و چی یونانی، ایی اتفاقَ جی واخوبَ بوُئن، همته بترسِئن، طوری که بعد اون عیسی خداوند ایسمِ خیلی احترؤم نائن.

¹⁸ و خیلی کسؤن که ایمؤن بارده بونم، جلو بومَئن، و همه کس چشم جلو خوشونِ کارؤنِ اعتراف بودَن.

¹⁹ خیلی أنم که پیشتر جادوگری گودَن، خوشؤنِ کیتابؤنِ بأردَن و همه کس جلو بسوجوئنِن. وختی او کیتابؤن قیمت حساب بودَن، پنجاه هزار نقره سکه بو.

²⁰ ایطوری بوبو که خداوندِ کلام پخشَ بو و قوّت گیت.

²¹ بعد ایی اتفاقون، پولُس، خدا روح أمره هدایت بوبو که مقدونیه و اَخائیه راهَ جی، اورشلیم وگرده. پولس بوته: «بعد از اینکه اوره بوشوئم، بأیستی روم شهر بینَم.»

²² بازین دو ته خوشه همکارون، تیموتائوس و اِراستوس مقدونیه سرا دا و خودش یه مدت آسیا میئن بِیسه.

بلوا افِسُس دیرون

²³ هی میئنه، ضد اهل ’طریقت‘ یعنی ایمون دارون، یکته پیله بلوا برپا بوبؤ.

²⁴ یکته نقره کار که اینه ایسم دیمیتریوس بو، نقره ای چیزونِ آرتمیسِ معبد به چاگود و ایی راهَ جی صنعتگرونِ به خیلی درآمد کسب بُوده بو.

²⁵ دیمیتریوس صنعتکارؤن و ای جور کارونه صاحبؤنِ جومَه گوده و اوشونه بوته: «ای آقاأن، دؤنین که امی درآمد ای راه اجی ایسه .

²⁶ امّا هیطوکه اینین و ایشتؤنین، ایی پولُس نه فقط افسُس شهر دیرون بلکه تقریباً سرتاسر آسیا میئن، خیلی از مردمونه قانع و گمراه بُوده. او گونه خداأنی که آدم دست أمره چاگوده بوبؤ، خداأن نین.

²⁷ و ایی خطر هنه که نه فقط اَمه کاسبی رونق جی دَکای، بلکه اَمه معبد پیله الهه آرتمیسم هیچ ببی و حتی خو عظمت از دست بدی. الهه ای که سرتاسر آسیا و دنیا میئن پرستش کوئنن.»

²⁸ وختی اوشون اینه بیشتوسَن، خیلی عصبؤنی بوبوئن، داد بزئن که«پیله ایسه افسُسیان آرتمیس!»

²⁹ تموم شهر دیرون بلوا بوبؤ! مردم همدیگر أمره همدست بوبوئن و میدون مسابقه سو حمله بودَن. اوشن، گایوس و آریستاخوس که مقدونیه شی بوئن و پولُس همراهی گودَن، هکش هکش خوشؤنِ أمره ببوردَن.

³⁰ پولُس خوأس جماعت دیرون بشی، امّا شاگردؤن نوگذاشتن.

³¹ حتی بعضی از آسیا ولایت حاکمون که پولُس ریفق بوئن، اونه بِه پیغؤم سرا دئن، خوأهش بودن که خو پا میدؤنِ مسابقه میئن ننای.

³² جماعت دیرون غوغا بوبو و مردم گیجا بوئن. همه داد زئن و هر کس یه چی گوت و بیشتر مردم نودؤنسَن چی بِه جومَه بوئن.

³³ بعضیون، گمان گودن که اسکندر مسئول ایسه چونکه یهودیان اسکندر پیش تؤوده بون، و بعضی أن جماعت میئنَ جی اونه دستورؤنی دئن. اسکندر خوش دست توکون بده، مردم جی بخواسّه ساکت بوئن و حقسعی بُوده تا خوشه جی دفاع بکونی.

³⁴ ولی وختی مردم بفهمسن که یهودی ایسّه، همته یکصدا، حدود دو ساعت فریاد زئن:«پیله ایسه افسُسیان آرتمیس»

³⁵ داروغه شهر مردم آرؤم گوده و بوته:«ای افِسُس مردَکؤن، کیسه که نودؤنی افِسُس شهر، پیله آرتمیسِ معبد نگهبؤنه؟ کیسه که ندوئنه افسس شهر، مقدس سنگ نگهبون ایسه که آسمون جی جیر بکته؟

³⁶ پس وختی که نبنه ایی چیزون حاشا گودن، بأیستی آرؤم ببین و تاتادی کار نکونین.

³⁷ چونکه شمه ای مردَکؤنِ که اِره بأردین، نه اَمه معبد بی حرمتی بودَن و نه اَمه الهه کفر بوتَن.

³⁸ پس اگه دیمیتریوس و صنعتگرونی که اونه همکارن، از کسی شکایت دئنَن، محکمه أنِ در بازِ و فرماندارونم حاضرن. تینن خوشؤنِ شکایتِ اوره ببورن.

³⁹ ولی اگه شکایت دیگه ایی دئنین، بأیستی اونه شهر انجمن دیرون حل و فصل بکونین.

⁴⁰ چون راس راسه ای خطر دیرون ایسایم که امروز جریونون واسه متهم به شورش ببیم. اگه ایطوری ببی، ای بلوا واسه منیم دلیلی بأریم.»

⁴¹ وقتی که داروغه این بوته، مردمِ پخش گوده.