اعمالٚ رسولأن 14 - کتاب مقدس به زبان گیلکی - گویش شرقی

پولُس و بَرنابا قونیه میئن

¹ پولُس و بَرنابا قونیه شهر دیرون یهود عبادتگاه بوشؤئن و جوری گب بزِئن که خیلی از یهودی أن و یونانی أن ایمؤن بأردَن.

² اما او یهودی أنی که ایمؤن نأرده‌بوئن، غیر یهودی أنِ کوکَ گودَن و اوشونه فیکرِ برأرؤنِ ضید، مسمومَ گودن.

³ پس پولُس و بَرنابا خیلی زمت اوره بِیسَئن و شجاعت أمره خداوند بِه گب بزِئن، خداوندی که ایشؤنِ قدرت هدَای تا نیشونه أن و معجزات بأرن و ایطوری خوشه فیض پیغؤمِ تأئید گود.

⁴ ولی او شهر مردوم دو گروه بوبوئن؛ یکته گروه یهودی أن جی طرفداری گودَن و اویکته رسولؤنای طرفداری گودن.

⁵ وختی غیریهودی أن و یهودی أن خوشؤنِ پیلترونِ أمره خواسّن، پولُس و بَرنابا اذیت بکونن و اوشونِ سنگسار بکونَن،

⁶ پولس و بَرنابا، ایی جریونَ جی واخوبَ بوئن، لِستْره و دِرِبه سو، که لیكائونیه شهرؤن جی بو، و او اطراف فرار بودن.

⁷ اوشون اوره خوروم خبر اعلام گودن.

بَرنابا و پولُس لِستْره و دِرِبه میئن

⁸ لِستْره میئن یکته مردکای نیشته‌بو که منّیس خو پاأنِ توكؤن بدای و هرگی راه نوشؤبو، چون مادرزادی شَل بو.

⁹ وختی که پولُس گب زی، او مردکای گوش دَء. پولُس اونه چال بزه و بدِه که ایی ایمؤن دئنه که شفا بگیری.

¹⁰ پولس پیله صدا أمره اونه بوته: «تی پاأنِ سر بَیس!» او مردکای خوشه جا سرای بپّرسه راه دکته.

¹¹ وختی مردم او چیزی‌ که پولُس انجؤم بده‌ بدِئن، لیكائونی زبؤن أمره فریاد بزِئن: «خداأن آدم مورسون اَمه میئن جیر بومَئن!»

¹² اوشؤن بَرنابا ’زئوس‘ و پولُس اینه واسه که اصلی گب زن بو’هِرمِس‘ ایسم بنَئن.

¹³ زئوس كاهین که اونه معبد شهر دروازه بیرون هنه بو، چند‌ته گاو و چندته تاج گُل، شهرِ دروازه ورجه بأرده؛ زئوس و او جماعت خواسّن که اوشونه به قربؤنی بکونن.

¹⁴ اما وختی او دوته رسول، یعنی بَرنابا و پولُس، ایی کفرِ بشتؤسَن، خوشؤنِ لیباسؤنِ چاك بزِئن و تاتأدی مردم میئن بوشوئن، فریاد بزِئن که:

¹⁵ «ای مرداكؤن، چرِه ایطوری كؤنین؟ امَرَم شیمه مورسون، آدمیم. امه شمره خوروم خبر دئنیم که ایی بیخودِ کارونَ جی دست ویگیرین و خدای زنده ایمؤن بأرین که آسمؤن و زمین و دریا و هر چیزی که اوشونه میئن هَنّه، خلق بوده.

¹⁶ خدا، از قدیم نسلؤن غیریهودی أنِ قومون، همتَه ویلَه گوده که هرته خوشونِ راهؤنِ بوشوئن،

¹⁷ با ایی حال، او خوشِ بدونِ گوا ننَه؛ چونکه او آسمونای بارؤن سرادَه و پر بار فصلؤن بخشِئن أمره شیمه به خوبی بودِه، شمره خیلی غذا هدَه و شیمه دیلؤنِ شادی جی پورا کوئنه.»

¹⁸ حتی ایی گبؤنِ أمره، اوشون خیلی سخت بتؤنستَن مردمِ جلوئه بگیرَن که اوشونه به قربونی نکونَن.

¹⁹ ولی اَنطاكیه و قونیه جی یهودی أنی بومَئن و مردومِ خوشؤنِ أمره متحدَ گودَن، پولُسِ سنگسار بودن و به ایی خیال که بمورده، اونه شهرای بیرون هکشِئن.

²⁰ اما وختی شاگردؤن پولسُ دور جومَه بؤئن، او ویریسَه و وگرسه شهر. فردأیی، پولسُ بَرنابا، دِرِبه شهر سو بوشوئن.

²¹ بازین اوشؤن او شهر میئنم خوروم خبر اعلوم بودَن و خیلی‌أنِ عیسی شاگردؤن چأگودَن. بازین لِستْره و قونیه و اَنطاكیه وگَرسَن.

²² او شهرؤنِ دیرون شاگردؤنِ جؤنِ قوت دَئن، اوشونه تشویق گودن که خوشونِ ایمؤن دیرون بَیسَن و نصیحت بودن که: «خدا پادشاهیِ دیرون شوئنِ به بأء خیلی سختی‌أنِ تحمل بکونیم.»

²³ اوشون هرته از كلیساأن ایماندارؤنِ سرِ جؤر شیخؤنی بنئن و اوشونه دعا و روزه أمره او خداوندیِ که اونه ایمؤن بارده بوئن، بسپوردَن.

²⁴ بازین پیسیدیه ولایت جی بوگذشتن و پامفیلیه‌ ولایت بوشو‌ئن،

²⁵ بعد اونکه اوشون پِرجه شهر میئن خدا كلام موعظه بودن، اوراجی بندرِ آتّالیه سو بومَئن.

²⁶ آتّالیه جی كشتی أمره، اَنطاكیه شهرِ وگرسن، هوجایی که ایماندارون، پولس و برنابا خدا فیضِ بسپورده بوئن تا او كاریِ بکونن که الون اونه انجوم بده بوئن.

²⁷ وختی پولس و برنابا اورَه برسئن، كلیسا آدمؤنِ جومَه گودَن، تعریف بودَن که خدا بواسطه اوشؤن چی کارؤنی بودِه و چوطو ایمؤنِ دَرِ غیریهودی أنِ بِه بازَ گوده.

²⁸ اوشؤن خیلی زمت، شاگردؤنِ أمره اوره بیسَئن.