اعمالٚ رسولأن 13 - کتاب مقدس به زبان گیلکی - گویش شرقی

بَرنابا و شائول سفر، انجیل پیغومِ به

¹ اَنطاكیه كلیسا دیرون، پیغمبرؤن و معلمؤن ایسابوئن: بَرنابا، شمعون معروف به نیجِر، لوكیوسِ قیرَوانی، مَنائِن که هیرودیس حاکیم ناتنی برأر بو و شائول.

² وختی که اوشون روزه داشتَن و خداوند پرستش کأدبؤن، روح‌القدس بوته: «بَرنابا و شائولِ او كار واسه که مو ایشؤنِ اونه بِه دوخُندم مِه بِه سیوا بکونین.»

³ بازین اوشؤن، بعد روزه و دعا، خوشونِ دستِ او دوته سر بنئن و ایشؤنِ سرادائن سفر.

بَرنابا و پولس، قبرس میئن

⁴ ایطوری او دونفری که روح‌القدس طرفای سرادا بوبؤبوئن، سِلوكیه بندر بوشؤئن و اورای، دریا راهَ جی قبرسِ برسئن.

⁵ وختی سَلامیس شهر دیرون بوشوئن، یهود عبادتگاأنِ میئن خدا كلامِ اعلوم بودن، ایشون، یوحنا معروف به مرقُس هم خوشونِ أمره ببورده بوئن تا ایشؤنِ کمک بکونی.

⁶ اوشؤن سرتاسرِ جزیره بگرسن تا پافوسِ شهرِ برسِئن. اوره یکته یهودی مرداک که باریشوع ایسم داشتِ بدِئن. او مردکای جادوگر و دروغی پیغمبر بو.

⁷ او رومی فرماندار ’سِرگیوس پولُس‘ ریفق بو. فرماندار که یکته عاقل مرداک بو، بَرنابا و شائولِ خو ورجه دوخُنده، چون خوأس خدا كلامِ بشتوئی.

⁸ اما او جادوگر که اینه ایسمِ معنی عالِم بو اوشونِ أمره مخالفت بوده و حقسعی بوده تا فرماندارِ نوگزاری که ایمؤن بأری.

⁹ ولی شائول، که اونه پولُس هم گوتن، روح‌القدسای پُورا بو، او مردکه چیشمِ چال بزه و بوته:

¹⁰ «تو ای ابلیس زأک، ای که همته خوبی أنِ دشمنی، ای که حیله و نیرنگَ جی پُورا گوده ایسّی! چرِء خداوند راستِ راهون كجَ كوئنی و ایی کارَ جی دست وینگینی؟

¹¹ اینه بودؤئن که خداوندِ دست تی ضید ایسّه. الؤن كورَ بنی و چنوخت منِئی آفتاؤ بَینی.» هو دم، همه جا اونه به تیره و تارَ بؤ، خو دور چرخَس و ینفر دومبال گرس که اونه دست بگیری و راه‌ِ اونه نیشون بدای.

¹² بازین بعد اونکه فرماندار ایی اتفاقِ بدِه، ایمؤن بأرده، چون او تعلیمَ جی که خداوند باره دَئن، ماتَ بؤبو.

پولُس و بَرنابا انطاكیه دیرون

¹³ پولُس و اوشونی که اینه أمره بوئن دریا راه میئنای پافوس شهرَ جی، پِرجه بوشؤئن که پامفیلیه منطقه درون هنه بو. اما اوره یوحنا معروف به مرقُس ایشؤنای سیوا بوبؤ و اورشلیم شهر وگرسه.

¹⁴ ولی اوشؤن پِرجه شهرَ جی ردَّ بوئن و اَنطاكیه شهر که پیسیدیه ولایت میئن هنه بو، برسئن. مقدس شنبه روز ، عبادتگاه دیرون بوشون و بنیشتن.

¹⁵ بعدِ اونکه تورات و پیغمبرؤن بنویشته أنِ بوخوندَن، عبادتگاه پیلترون ایشؤنه به پیغوم سرادائن و بوتَن: «برأرؤن، اگه گبی دئنین که مردم تشویقِ کوئنه، بوگوین.»

¹⁶ پولُس بیسَه و خو دستِ أمره اشاره بودِه، بوته: «ای یهود مرداکؤن و شمه ای خدا ترسون، گوش بدین!

¹⁷ ایی یهودِ قومِ خدا، اَمه پئرؤنِ انتخاب بودِه و اَمه قومِ، زمونی که مصر میئن غریب بوئن، اوشونِ سربلندَ گوده و پیله قوت أمره اوشونه او مملکتَ جی بیرون بأرده،

¹⁸ و دوروبرِ چهل سال ایشؤنِ رفتارِ بیابؤن میئن تحمل بوده.

¹⁹ او بعدِ اینکه هفتِ ملتِ که كنعان میئن ایسابون نابودَ گوده، اوشونه مملکتِ خوش مردومِ، به ارث بنه.

²⁰ ایشون همه دوروبرِ چهارصد و پنجاه سال طول بكشه. «بعدِ او، خدا، تا سموئیل پیغمبر زمؤن، داورؤن، ایشؤنِ هدأ.

²¹ بازین اوشؤن یکته پادشاه بخواستَن و خدا شائول، قیس ریکه، بنیامین قبیله جی، ایشؤنِ هدأ، که چهل سال حكومت بوده.

²² بعد ایکه شائول حکومتَ جی ویته بوبؤ، داوودِ انتخاب بوده که ایشؤنِ پادشاه ببی، و اونه باره ایطو گوایی بده بوته: ”مو، داوود، یِسا ریکه یکته مرداک بدِئم که خیلی می دیلِ میئن بنیشته؛ او تموم می خوأسته‌ أنِ انجوم دِئنه.“

²³ «خدا طبق خو وعده، هی مرداکِ نسلای، یهودِ مردم به یکته نجات دهنده یعنی عیسی، سرادا.

²⁴ قبل اینکه عیسی بای، یحیی تمومِ یهودِ مردم به، غسلِ تعمید گیتنِ توبه وسه، اعلوم گود.

²⁵ وختی یحیی خو خدمتِ تمنه کاده بو، بوته: ”فیکر کوئنین مو کی ایسّم؟مو او نیَم؛ بلكه او بعدِ مو هنه و مو حتی قابیل نی‌یم كه اونه چاروغِ بندِ بازَ کونم.“

²⁶ «ای برأرؤن، ای ابراهیم نسلِ زأکؤن، و ای خدا ترسونی که شیمه میئن دئنین! ایی نجات پیغؤم ، اَمه بِه سرادا بوبو.

²⁷ چونکه اورشلیم مردم و ایشؤنِ پیله ترؤن عیسی نشنأختن و پیغمبرؤن گبؤن که هرته مقدس شنبه روزونِ میئن بوخونده بنه نفهمسن، و اوشؤن، عیسی محکومَ گودنِ أمره پیغمبرونِ گبونِ به حقیقت برسونِئن.

²⁸ با اونکه هیچ تقصیری اونه كوشتن بِه نیاتّن، پیلاتُسای بخواستَن اونه بکوشی.

²⁹ وختی تموم اوچیزی که اونه باره بنویشته بوبؤ بو انجام بدَئن، اونه صلیبای جیر بأردَن، مقبره میئن بنائن.

³⁰ اما خدا عیسی، مُرده‌أنه اجی زنده بوده.

³¹ خیلی روزؤن عیسی خوشِ اوشؤنی به که اونه أمره جلیل طرف، اورشلیم سو بومه بوئن، ظاهیرَ گود. الونم، اوشون أمه مردومِ به، اونه شاهیدون ایسّن.

³² «الؤن أمه، ایی خوروم خبر شمره دِئنیم که خدا اوچیِ که اَمه پئرؤنِ وعده بده‌بو،

³³ عیسی زنده گودنِ أمره، اَمه‌ به که ایشؤنِ زأكؤنیم وفا بوده. هوطو که دومی مزمور میئن بنویشته‌ بوبؤ: «”تو می ریکاکی؛ امروز، مو تَه مولود بودَم.“

³⁴ «خدا اونه مُرده‌أن جی زنده بوده تا هرگی نپیسی هوطوكه خدا بوته: «”مو او مقدس و مطمئنِ برکاتِ که داوود وعده بده بوبؤ، شمره هَدِئنم.“

³⁵ و هیطو یکته مزمور دیگه میئن بنویشته بوبُؤ که: «”تو نوگزائنی اون که تی مقدس ایسه، بپیسی.“

³⁶ «داوود بعدِ اونکه طبق اراده خدا خو دوره مردمونِ خدمت بوده، بمورده و خو پئرؤنِ ورجه بوشو و بپیسه.

³⁷ ولی او كسی‌ که خدا اونه زنده بوده،نپیسه.

³⁸ «پس، ای برأرؤن، بودؤنین که بواسطه ای عیسی، گوناهؤنِ آمرزش شیمه به اعلوم بنه.

³⁹ هرکس عیسی ایمان بائره به واسطه ی اون، آزادَ بنه، هر اونچی دیرون که نتونستید بواسطه ی موسی شریعت، آزاد ببین.

⁴⁰ پس بپایین که پیغمبرؤن كتاب بنویشته شیمه سر نأی که گونه:

⁴¹ «” بَینین، ای شمه که روخشنهَ گینین حیرونَ بین و هلاك بین، چون شمه دورؤنِ دیرون كاری کوئنم، که هرچی اونه شمه به بوگوئن هرگی باور نوکؤنین.“»

⁴² وختی پولُس و بَرنابا عبادتگاهَ جی بیرون شوئدبون، مردم اوشونای خواهش بودن که ایی مقدس شنبه هم اَمئدره، ایی جور چیزونِ باره ایشؤنِ أمره گب بزنن.

⁴³ بعدِ اونکه جماعت، عبادتگاهَ جی بوشوئن، خیلی از یهودی أن و او خداپرست آدمؤن که یهودی بوبؤبوئن، پولُس و بَرنابا دومبال راه دكتن. پولس و بَرنابا ایشونِ أمره گب بزِئن و اوشونه تشویق بودن که خدا فیضِ دیرون ادامه بدِئن.

⁴⁴ او یکته مقدس شنبه که بما، تقریباً، تمؤم شهر مردم جومَه بوئن تا خداوند كلامِ بشتوئَن.

⁴⁵ وختی یهودی أن مردم شلوغیِ بدِئن، حسودی جی پُورا بؤئن و بی حرمتی همره پولُس گبؤنِ أمره مخالفت بودن.

⁴⁶ پولُس و بَرنابا شجاعت أمره بوتَن: «لازم بو خدا گبؤن پیشتر، شیمه به بوته ببی. اما چون اونه ردَّ گودین و شمره اَبدی زندگی قابیل نودؤنسین، پس الؤن أمه غیریهودی أنِ سو وگردنیم.

⁴⁷ چون خداوند اَمره ایطوری فرمون بده که: «” مو تَه غیر یهودی أنِ به نور چأگودم، تا نجاتِ چارگوشه دونیا، برسؤنی.“»

⁴⁸ وختی غیریهودی أن اینه بشتؤسَن، خوشحالَ بوئن و خداوند کلام احترؤم بوگذاشتن؛ و اوشؤنی که ابدی زندگی بِه معین بوبؤبوئن، ایمؤن بأردَن.

⁴⁹ ایطوری خداوند كلام سرتاسر او منطقه میئن پخش بوبو.

⁵⁰ ولی یهودی أن، متعصبُ سرشناس زنأكؤنی و مردَكؤنی که شهر دیرون رهبر بوئن کوکَ گودَن. اوشونم بَرنابا و پولُسِ اذیت و آزار بودَن و او منطقه جی بیرونَ گودَن.

⁵¹ پولس و بَرنابا هم، اوشهر خاکَ، خوشؤنِ پاأنِ جی ایشؤن ضید، فلاکنِئن و بوشؤن شهر قونیه.

⁵² شاگردؤن شادی و روح‌القدس جی پُر بوئن.