دوم قرنتیان 5 - کتاب مقدس به زبان گیلکی - گویش شرقی

امئه آسمونی خونه

¹ ایسه دونیم هر وقت ای خیمه یعنی امئه زمینی خونه که اون مئن زیندگی کادریم فگرده، خدا یاجی یکته عیمارت دانیم، یکته خونه کی دس اجی چاگوده نوبو و آسمون مئن ابدی ایسه.

² حقیقتا کی ای خیمه مئن آه کشنیم، چونکی اون مشتاقیم که امئه آسمونی خونهَ یکته رخت مورسون دوکونیم

³ اگر که راس راسه اون دودن هما دئه لوخت نبنیم.

⁴ چون تا او زمت کی ای خیمه مئن ایسایم سنگین بار همرا آه کشنیم، نه این واسئه کی لوخت بنیم، بلکی ویشته بپوشونئه بنیم، تا زیندگی او چئه کی فانی‌ئه فبره.

⁵ خدا ایسه که امره ای منظور واسی آماده بوده و روح القدسه بیعونه مورسون امره هدا.

⁶ پس همیشک امئه دیل گرمه. امه دونیم تا او زمت کی ای تن مئن خونه دانیم، خداوند اجی دوریم،

⁷ چونکی ایمون همرا زیندگی کونیم، نه او چی همرا کی اينیم.

⁸ بله، امئه دیل حیسابی گرمه و بهتر دونیم ای تن اجی دورابیم خونه مئن خداوند همره زیندگی بوکونیم.

⁹ پس چی تن مئن زیندگی بوکونیم و چی اون اجی دور ببیم، امئه نیت اینه که اونه راضی بوکونیم.

¹⁰ چونکی تموم امه خا مسیح داوری تخت جلو حاضیرابیم، تا هرکس بنا به خوب یا بد اعمال کی خوشه تن مئن زیندگی گود انجوم بدا، سزا بینه.

خدمت آشتی

¹¹ پس چونکی دونیم خداوند ترس معنی چیسه، مردومه قانع کونیم. ولی او چی کی ایسیم خدای ئبه آشکاره و امید دانم کی شیمئه وجدون ئبه ام آشکار ببون‌.

¹² امه نخانیم هنده امئه باره تعریف بوکونیم، بلکی خانیم دلیلی باریم که امره ایفتخار بوکونین، تا بوتونین اوشون جوابه بدین کی ظاهیر سر ایفتخار کونن، نه او چی سر کی دیل مئن هننا.

¹³ چونکه اگر امئه عقله از دست بدایم، خدای واسئه؛ و اگر عاقیلیم، شیمئه واسئه.

¹⁴ چون مسیح محبت امره کنترل کونه، چونکی بفهمسیم: که یک نفر همه ته واسی بمرده پس همه بمردن.

¹⁵ و او همه ته خاطیری بمرده تا اوشون ده خوشون واسی زیندگی نوکونن، بلکه اون ئبه زیندگی بوکونن که اوشون ئبه بمرده و زینده وابو.

¹⁶ پس امه ده بعد ای هیکسه مطابق جسم نشناسنیم. هرچند پیشته مسيحه مطابق جسم شناختیم، ایسه ده ایطو نئه.

¹⁷ پس اگر یگنفر مسیح مئن بیسا، یکته تازه خلقته. هرچی کی کهنه بو ده تمنابو؛ الون همه چی تازه وابو.

¹⁸ تموم ایشون خدا جی ایسه کی بواسیطه مسیح امره خوشه همرا اشتی بدا و اشتی خدمته امره بسپارده.

¹⁹ یعنی، خدا مسیح مئن دونیا خوشه همرا اشتی دأ و مردوم تقصیراته اوشون حیساب ننا و آشتی خدمته امره بسپارده‌.

²⁰ پس امه مسیح سفیرون ایسیم، خدا خوشه خواستهَ امئه طریق اجی انجوم دئنه. امه مسیح طرف اجی شمراجی تمنّا کونیم کی خدا هما اشتی بوکونین.

²¹ خدا او کسه کی گوناهه نشناخته، امئبه گوناه چاگوده، تا امه اون مئن خدا صالحی ببیم.