اوّل یوحنا 5 - کتاب مقدس به زبان گیلکی - گویش شرقی

دونیا حریف بوئن

¹ هرکس ایمؤن دَئنه که عیسی هو مسیح موعوده، خدا جی بزاسه ببو؛ هرکس پئر دوست دَئنه اونه زاکم دوست دَئنه.

² اره جی دونیم خدا زاکون دوست دائنیم، که خدا دوست بداریم و اونه حُکمؤنَ اطاعت بکونیم.

³ چونکه خدا محبت گودن اینه که اون حوکمونِ بجا بئریم و اونِ حُکمؤن سنگین بار نیه.

⁴ چونکه هر کس خدا جی بزاسه بوبوبی، دنیا سر حریفَ بنه و امی ایمون او پیروزی ایسه که دنیا حریفَ بنه.

⁵ کی ایسه اونی که دنیا سر حریفَ بی جز اونی که ایمؤن دئنه عیسی خدا ریکه ایسه؟

⁶ اون که آؤ و خونِ أمره بومه، یعنی عیسی مسیح. نه فقط آؤ أمره، بلکه آؤ و خونِ أمره؛ و روح ایسّه که گواهی دِئنه، چونکه روح حقیقتِ.

⁷ چونکه ای سُه ته ایسّن که گواهی دئنن:

⁸ خدا روح و آؤ و خون؛ و ایی سُه ته یکته ایسّن.

⁹ اگه أمه آدمی گوایی قبول کوئنیم، خدا گوایی خیلی پیله تر ایسّه، چونکه گوایی ای ایسّه که خدا خودش خو ریکه باره بدَه.

¹⁰ هرکس خدا ریکه ایمؤن دئنه، ایی گوایی خوشِ میئن دَئنه. ولی اونی که خدا گواییِ باور نوکوئنه، اونه دروغگو دوئنه، چون او گوایی ای که خدا خوشه ریکه باره بده، باور نوئده.

¹¹ و او گوایی، ایی ایسّه که خدا اَمره، اَبدی زندگی ببخشه، و ایی زندگی اونه ریکه میئن هنّه.

¹² اونی که ریکه دَئنه، زندگی دَئنه و اونی که خدا ریکه ندَئنه، زندگی ندَئنه.

سرآخر

¹³ ای چیزونه شمه به بنویشتم که به ایسم خدا ریکه ایمؤن دئنین، تا بودوئنین که ابدی زندگیِ دئنین.

¹⁴ ایی، او اطمینونی ایسّه که اونه حضور میئن دَئنیم که هروخت یچی طبق اون اراده درخواست بکونیم، اَمه صدا ایشتوئنه.

¹⁵ و اگه دوئنیم هرچی که اونه جی درخواست بکونیم امی صدا ایشتوئنه، پس اطمینؤن دَئنیم که اوچی که اون جی بخواستیم، هَیتیم.

¹⁶ اگه یه نفر بینی اینه برار یکته گناه کائدره که موردَنِ ختم نبنه، دعا بکونی و خدا اونه زندگی هدِئنه. اینه کسی باره گونم که اونه گناه، موردَنِ ختم نَبَنه. گناهی هنّه که موردَنِ ختم بنه، ای جور گناهِ باره نگونم که باء دعا گودن.

¹⁷ همتهِ نادرستِ کارون گناه ایسّه، ولی گناهی هم هنّه که به موردن ختم نبنه.

¹⁸ أمه دوئنیم که هرکه خدا جی بزاسه بوبؤ، گناه میئن ادامه ندئنه، بلکه عیسی که ’خدا جی بزاسه بوبؤ‘ اونه جی محافظت کوئنه و او شریرِ دست اونه نرسنه.

¹⁹ أمه دوئنیم که خدا جی ایسّیم، و تموم دنیا او شریرِ قدرت جیر هنّه.

²⁰ و اینم دوئنیم که خدا ریکه بومه و اَمه فهم بدا، تا اون که حقیقت ایسه بشناسیم، و أمه اونه میئن که حقیقت ایسه ایسایم، یعنی اونه ریکه عیسی مسیح میئن. او ایسه حقیقتی خدا و ابدی زیندگی.

²¹ ای زاکؤن، خودتونِ بوتؤن جی دور بدارین.