اوّل قرنتیان 6 - کتاب مقدس به زبان گیلکی - گویش شرقی

دعوا مرافعه ایماندارون میئن

¹ هردفه یه نفر شمرای یکته شکایت علیه یکته دیگه بداری، چوطو جرأت کوئنه اونه نه مقدسین ورجه، بلکه گناهکارونِ محکمه مئن ببوری؟

² مگر نودوئنین که مقدسین دونیا قضاوت کوئنن؟ پس شمه که قراره دنیا قضاوت بکونین چوطو منین ای کوشتای جریاناته داوری بکونین؟

³ مگه نودوئنین که أمه فرشته أنِ داوری کوئنیم؟ چی برسی به ایی زندگیِ جریانات داوری گودن.

⁴ پس چره وقتی ای جریانات شیمه میئن ایتفاق دکئنه، اوشون ورجه بئنین که کلیسا میئن به حساب نَئنن؟

⁵ اینه گونم تا شمره شرمنده بکونم. شیمه میئنِ یکته شخص اندی حکیم نبو که بتونی ای جریاناته برارون میئن حل و فصل بکونی؟

⁶ ولی برار علیه برار محکمه مئن شنه، اونم بی ایمونون ورجه؟!

⁷ اصلا ایجور دعوا مرافعه شیمه میئن، خودوش سرشکستگی ایسّه شیمه به. چره نخوائنین او بدیه قبول بکونین؟ چره حاضیر نین ضرر بکونین؟

⁸ ولی شمه خودتون بدی کوئنین و دیگرونِ ضرر رسونبئنین، حتی شیمه برارونِ.

⁹ مگه نودوئنین اوشونی که ظالیمن خدا پادشاهیه به ارث نبئنن؟ گول نخورین: بی حیائان، بت پرستون، زنا کارون، لواط کارون

¹⁰ دوزؤن، طمعکارون، عرق خورون، بددهنون و قاببازون، خدا پادشاهی به ایرث نبِئنن.

¹¹ بعضی از شمه قبلا ایطو بین، ولی عیسی مسیح خداوند ایسم میئن و به واسیطه أمه خدا روح بوشؤسه بوبوین، تقدیس بوبوین و صالح بحساب بوماین.

بی حیایی جی دربشین

¹² «همه چی مه به روا ایسه،» ولی همه چی فایده ندانه. «همه چی مه به روا ایسه» ولی نوگذانم هیچی ما حریفابی .

¹³ گونن غذا شوکوم شی ایسّه و شوکوم غذا شی، و خدا، هم اینه هم اونه از بین بئنه. تن بی حیایی شی نیه، بلکه خداوند شی ایسّه و خداوندم تن شی.

¹⁴ و خدا، خداونده بمردئان اجی زینده واگوده و اَمره هم خوش قوت همره زینده واکونه.

¹⁵ مگر نودوئنین که شیمه تن مسیحِ اوسم و اعضا ایسّه؟ یعنی مسیحِ اوسم و اعضا ویگیرم و اونه یکته فاحشه اوسم و اعضا مورسون چاکونم؟ هرگی!

¹⁶ مگه نودوئنین یک نفر فاحشه امره ببی، اونه أمره یکته بنه؟ چونکه تورات مئن بنویشته بوبؤ که: «او دو نفر یکته تن بنن.»

¹⁷ ولی اونی که خداوند أمره یکته ببی اونه أمره یکته روح ایسّه.

¹⁸ بی حیایی جی دربشین! هرته گناه دیگری که آدمی بکونی اونه تنَ جی بیرون ایسّه، ولی کسی که بی حیایی بکونی، نسبت به خو تن گناه کوئنه.

¹⁹ مگر نودوئنین که شیمه تن روح القدس معبد ایسّه که شیمه میئن دره و اونه خدا جی هَیتین؟شمه ده شیمه شی نیین.

²⁰ چونکی شیمه هئن ئبه بها هدا بوبو، پس خدا شیمه تنِ میئن جلال بدین.