اوّل قرنتیان 3 - کتاب مقدس به زبان گیلکی - گویش شرقیجدایی کلیسا مئن 1 ولی برارؤن، مو نتونسم اوشون مورسؤن گب بزنم که خدا روح ایشون مئن دره، بلکه اوشون مورسؤن که جسمونئن گب زئدرم، یعنی اوشونی مورسؤن که مسیح میئن ترزاکن. 2 مو شمره شیر هَدَم نه گوشت، چونکه اونه به حاضیر نبین و هندئرم نین، 3 چره که حله جسمونی چئن دومبال درین. وختی شیمه میئن حسودی و دعوا مرافعه هنّه، مگه هی نیشون ندِئنه که جسمونی چیزون دومبال درین و بشری رای میئن کردوکار کوئنین؟ 4 چونکه وختی ینفر گونه: «مو پولس دومباله رو ایسّم،» و اوکته گونه: «مو آپلوس دومباله رو ایسّم»، مگر بقیه ادمون مورسون نین؟ 5 مگه آپولوس کی ایسّه؟ پولس کی ایسّه؟ اوشون فقط خدمتکارونی ایسّن که خدا هرته یکته وظیفه هدَه تا شمه به واسطه اوشؤن ایمون بأرین. 6 مو دنَه بکاشتم و آپولوس اونه آؤ بده، اما خدا بو که اونه سبزاگوده. 7 پس نه اونی که کارنه چیزی حیساب هنه و نه اونی که آؤ دئنه، بلکه فقط خدا که اونه سبزاکونه. 8 اونی که کارنه و اونی که آؤ دِئنه، هر دو یکته ایسن و هر ته هو اندازه موزد هگینن کی زحمت کشنن. 9 چونکه أمه خدا همکارون ایسیم. شمه خدا کشت کار زمین و خدا عمارت ایسیّن. 10 او فیض هما که خدا مه هدا، اوسسه معمار مورسؤن پی بکندم و یک نفر دیگه او پی سر عمارت چاکونه. هرکس باید مواظب ببی که چوطؤ چاکونه. 11 چونکه هیشکس منئه به غیر او پی که بکنده بوبؤ یعنی عیسی مسیح یکته پی دیگر بکنی. 12 ایسه اگه یه نفر ایی پیِ سر او عمارته طلا و نقره یا گرؤن قیمت سنگون یا چوب یا علف یا کلوشَ جی بسازی، 13 همه کس کار آشکارَ بنه، چرِه که او ’روز‘ مئن همه چیِ آشکارَ کوئنه، چونکه آتش کارِ نتیجه نمایوناگوده، و آتش هر رقم کار که ادمون بودن امتحون کوئنه. 14 اگه کاری که او پیِ سر چاگوده ببی، بومونه او ادم خوشه موزده هگینه. 15 اگه ینفر ِکار تشاگیره، ضرر کوئنه؛ هرچند که خودوش نجات پیدا کوئنه، ولی کسی مورسؤن بنه که بلایته آتش میئنای جون بدر ببوردبی. 16 مگر نودوئنین که شمه خدا معبد ایسیّن و خدا روح شیمه میئن دره؟ 17 اگه ینفر خدا معبده فگردونی، خدا اونه نابودَ کوئنه؛ چونکه خدا معبد مقدس ایسّه و شمه او معبد ایسیّن. 18 هیکس خوشه گول نزئنه. اگه ینفر شمرَه جی فیکر بکونی ایی دوره زمونه مئن حکیم ادمه، بوگذار نادون ببی تا شاید حکیم ببی. 19 چونکه ایی دونیا حکمت خدا نظرِ میئن نادونی ایسّه. هوطو که ایوب کیتاب مئن بنویشته بوبؤ که: « حکیم آدمؤنِ خوشؤنِ حیله همرا گیرفتارَ کوئنه.» 20 و هنده مزمور کتاب مئن بنویشته بوبؤ که: « خداوند حکیم آدمؤنِ فیکرونَ جی واخوب ایسّه و دوئنه که او فیکرون پوچه.» 21 پس ده هیشکس آدمؤن واسی گولاز نکونی. چونکه همه چی شیمه شئه، 22 چی پولس ببی، چی آپولس، چی کیفا ببی، چی دنیا، چی زیندگی ببی، چی مردن، چی زمون حال ببی و چی آینده زمت، تموم ایشون شیمه شی ایسّه 23 و شمه مسیح شی ایسّین و مسیحم خدا شئه. |
@ 2024 Korpu Company