اوّل قرنتیان 16 - کتاب مقدس به زبان گیلکی - گویش شرقی

پیشکشون مقدسین ئبه

¹ ایسه پیشکشون جومَه گودنِ باره مقدسینِ به: شمرم اوچیِ که غَلاطیه کلیسیاأنِ بوتم، انجوم بدین.

² هر هفته اولی روز، هرته از شمه خا خوشه درآمد اجی یکچی دیمه بنی و خوشه بداری، تا وختی که مو هنم، ده لازیم نبی کی پیشکشونه جیماکونین.

³ وختی فارسم، او افرادی که شمه اطمینؤن دئنین معرفی نؤمه أنی هدِئنم و اوشؤنِ شیمه پیشکشون هما اورشلیم شهر ور سرادِئنم.

⁴ اگه صلاح ببی که منم بوشؤم، ایطوری اوشؤنِ أمره شنم.

نقشه ئان سفر واسی

⁵ بعد ای کی مقدونیه ولایت جی بوگذشتم شیمه ورجه هنم، چونکه مقدونیه ولایت جی عبور کوئنم.

⁶ شاید اننی زمت شیمه ورجه بیسَم، و یا حتی زمستون شیمه أمره بوگذرونم، تا هر جیگه که شنم ما می سفر ئبه کومک بکونین.

⁷ چونکه نخوائنم ایسه رای مئن شمره بینم، بلکه اومید دانم اگه خدا بخای، چند وقت شیمه همره بیسم.

⁸ ولی تا پنتیکاست عید اَفِسوس شهر میئن ایسنم.

⁹ چونکه یکته پیله دروازه خدمت واسی مئبه بازَ بو که خیلی فایده دانه، و دوشمنونم زیادن.

¹⁰ وقتی تیموتائوس بما ، اونه امره جوری رفتار بکونین که شیمه میئن هیچ نگرونی نداری .چونکه اونم می مورسون خداوند کاره انجوم دادره ؛

¹¹ پس هیچ کس اونه کوشتای به حیساب ناری. اونه به سلامت سفر راهی بکونین تا می ورجه وگردی ؛ چونکه من و برارون اون ریفا ایسایم.

آخرته نصیحتون

¹² ایسه در مورد امه برار اپولوس ، اون اجی خیلی بخواسم که برارون دیگر امره شیمه ورجه بای ، ولی اصلا راضی نوبو که الون بای . هر وقت که فرصت بکونی هنه .

¹³ واخوب ببین، ایمون مئن پایدار بمونین ، مرد ببین و قوی ببین .

¹⁴ شیمه همته کارون محبت همرا ببی .

¹⁵ دوئنین که استفاناس خانواده اولین کسونی بوئن که اخاییه ولایت میئن ایمون بأردن، و اوشون خوشونه، مقدسین خدمت به وقف بودن. برارون، شمرای خواهش کوئنم

¹⁶ ایجور کسونه فرمونبر ببین و هیطورم هرکس دیگری که ایی خدمت میئن همکاری کوئنه و زحمت کشنه.

¹⁷ استفاناس، فورتوناتوس و اخائیکوس اَمَئن جی ذوق دانم، چونکه شیمه جای خالی پورا گودن.

¹⁸ چونکه اوشون می روح و شیمه روحِ تازه واگودن. ایجور کسون حرمته بدارین.

سلامؤن

¹⁹ آسیا کلیساأن شیمئه سلام برسونئن. آکیلا و پریسکیلا و کلیسایی هم که اوشونِ خونه میئن برپا بنه، شمره خداوند میئن گرمی همرأ سلام رسونئنن.

²⁰ همته برارؤنی که اِره ایسَئن شیمه به سلام سرادِئنن. مقدس موچی أمره همدیگرِ سلام بوگوین.

²¹ مو، پولس، می دست أمره ایی سلامِ شیمه به نویسنم.

²² لعنت به او کس که خداونده دوست ندَئنه. أمه خداوند، بیه!

²³ عیسی خداوند فیض شیمه أمره ببی.

²⁴ می محبت شمه همه ته امره مسیح عیسی میئن ببی. آمین.