اوّل قرنتیان 11 - کتاب مقدس به زبان گیلکی - گویش شرقی

¹ پس، می جی سرمشق بگیرین، هوطو که مو مسیحَ جی سرمشق گینم.

سره پوشونئن

² ایسه شمراجی تعریف کونم که همه چی میئن مَه یاد اَبِئنین و حتی ای رسم و رسومون هوطو که شمره بسپوردَم، دَئنین.

³ ولی خوائنم بفهمین که هرته مرداکِ سر، مسیح ایسّه، زن سر مرده، و مسیحِ سر خدا ایسه.

⁴ هرته مرداک که خو سرِ بپوشوئنه و دعا یا نبوت بکونی، خو سرِ بی حرمت بوده.

⁵ ولی هرته زناک که خو سرِ نپوشوئنی و دوعا یا نبوت بکونی، خو سرِ بی حرمت بوده؛ اونه ایی کار، درست اینه موئنه که خو سرِ بتاشته بی.

⁶ چونکه اگه یکته زناک خو سر نپوشونی پس خا خو مؤ کوتاه بکونی؛ ولی اوره اجی که زنِ به باعث خجالت ایسّه که خو مؤ کوتاه بکونی یا بتاشی پس با خو سر بپوشونی .

⁷ مرد نباید خو سر بپوشونی ، چونکه او خدا شکل و شمایل و جلال ایسه ؛ولی زناک مرداک جلال ایسه .

⁸ چونکه مرد زن اجی به وجود نما ، بلکه زن مرد اجی به وجود بما ؛

⁹ و مرداک زناکه به خلق نبو ،بلکه زناک مرداکه به خلق ببو.

¹⁰ اینه واسه زن فرشتگون خاطیری با قدرت و اختیار نشونیه خو سر سر بداری.

¹¹ با ای همه، خداوند میئن نه زناک مرداک اجی سیوا ایسه نه مرداک زناک اجی.

¹² هوتو که زناک مرداک اجی بوجود بما مرداکم به واسطه زن بوجود هنه، و تموم ای چیئن خدا یاجی ایسه.

¹³ خودتون قضاوت بکونین : زناکهِ به درست ایسه که خو سر نپوشانی و خدا محضر مئن دعا بکنی ؟

¹⁴ مگه طبیعت خودش شمره ره یاد ندئنه که اگه یکته مرداک بلند مو بداری ، اونه به عاره ،

¹⁵ اما اگه یکته زناک بلند مو بداری ،اونه به افتخار ایسه؟ چونکه بلند مو، پوشونئن واسی زنه هدا ببو .

¹⁶ اگه ینفر بخوای خوشئه خو سازه بزنی، باید بوگوم که نه امئبه و نه خدا کلیسائان به ایجورچی داب نیه .

خداوند شؤم

¹⁷ ولی اوچی میئن که الؤن شمره حوکم کوئنم، اصلا شمره جی تعریف نوکوئنم، چونکه وقتی شمه کس کسون هما جومه بنین، فایده که ندانه هیچ، ضرر نی دانه.

¹⁸ اول اینکه ایشتوئنم، هو موقع که کلیسا به همدیگر همرا جومه بنین، شیمه میئن دودستگی دکِئنه، و اینه أننِی باور کوئنم.

¹⁹ چونکه ای دو دستگی خا شیمه میئن دبی تا ایطوری شیمه میئن اوشونی که راس راسه ایمون دانن معلوم ببون.

²⁰ وقتی که شمه یه جا کس کس امره جوما بنین ، خداوند شؤم خوردن واسه نیه .

²¹ چونکه هو موقع که شؤم خورده درین، هر که از شمه بدون اینکه او یکته رافا بیسی خوشئبه خو شؤمه خونه، جوری که یه نفر وشته مونه، و او یکته مستا بنه.

²² مگر خونه ندانین که اون مئن بخورین و وودوشین؟یا ایکه خدا کلیسا بی حرمتاکونین و ندارونه کوچیکاکونین؟ شمره چی بگوم؟ ای کار واسه شمراجی تعریف بکونم؟نه نکونم .

²³ چونکه مو او چی که شمره بسپردم خداوند جی هیتم ،که عیسی خداوند او شویی که اون دوشمن دس هدان، نون ویته

²⁴ و اونه شکر بوده وسی، پاره بوده و بوته: اینه می تن شیمه به. اینه می یاد ئبه بجا بارین .

²⁵ هیطوری ام ،بعد از شؤم، جؤم ویته بفرماسه :ای جؤم، جدید عهد ایسه می خون مئن. هر بار که اونه جی وودوشنین، می یاد واسی ایتو بکونین .

²⁶ چونکه هر وقت ای نون بخورین و ای جام اجی وودوشین خداوند مردنه اعلؤم کونین تا وقتی که وگردی.

²⁷ پس هرکس اوجور که درست نیه نون بخوری و خداوند جام جی وودوشی، عیسی خداوند خون وسه تقصیرکار بنه .

²⁸ هرکس قبل اینکه نون اجی بخوری و جام جی وودوشی، خوشِ ایمتحون بکونی.

²⁹ چونکه هرکس بدون اینکه خداوند تنه تشخیص بدی بخوری و وودوشی، در اصل خوشه محکومیته بوخورده و وودوشته.

³⁰ هینه وسه ایسه که خیلی از شمهَ أن ناخوش و ضعیف ایسیّن و دسته ای هم بموردین.

³¹ ولی اگه امه به حکم گودیم، امه سر حکم نبونابو.

³² اما هر زمت که خداوند امی سر حکم کونه ادب بنیم تا دونیا امره محکوما نبیم .

³³ پس می برارون، وقتی خوردن به همدیگره أمره جومه بنین، بقیه رافا بیسین.

³⁴ اگه یه نفر وشته ایسّه، خو خونه میئن غذا بخوری تا شیمه جومه بوئن همدیگر همره به محکومابون ختم نبی. بقیه چیزون باره هم وقتی شیمه ورجه بام، شمره گونم چی بوکونین.