Psalm 91 - Edo Bible (E Baibol Ẹdo) Version 1996

Osanobua Ugue Mwa

¹ Ọmwaikọmwa ne ọ lẹ gbinna Nọyaẹnmwa, ọmwaikọmwa ne ọ mudia ye ototọ ugue ọghe Oghodua,

² gha sẹtin tama rẹn wẹẹ, “Wẹ ọrọre ne ọ gbinna mẹ kevbe ugue mwẹ wẹ ọrọre Osanobua mwẹ ọmwa ne I mu ẹtin mwẹ yan.”

³ Ogha degue ruẹ hin ẹbe ni rre ẹkhokho hia, kevbe hin obọ emianmwẹ hia.

⁴ Ọ gha ya ifuẹn ọnrẹn gue ruẹ, wẹ gha re ne ẹ i mwẹ ẹbe vbe ototọ ugue ẹre, ẹmwata ẹre gha degue ruẹ ọ gha vbe gbinna ne uẹn.

⁵ Wẹ i ra mu ohan ẹbe ke ẹbe vbe asọn, ra odekun udomwurri vbe avan.

⁶ Ra egboghogbogho ne ọ fi emwi vbe ebiebi ra emwi dan ne ọ gbe ọmwa vbe ogiavan.

⁷ Arriaisẹn sẹtin dele wu vbe ehe ne u ye arriaisẹn vbe ihe igbe lẹga ruẹ sokpan emwi rhọkpa i ra ru uwẹ.

⁸ Wẹ gha ghe ẹre, aro ruẹ ghi vbe miẹn vbe ne a rri emwa dan oya hẹ.

⁹ Wẹ ya e Nọyaẹnmwa ru e nọhuanrẹn ọwuẹ nẹ, ọmwa Ne ọ yo sẹẹ Ehia, ọrọre ne ọ degue ruẹ.

¹⁰ Rhunmwuda ọnii, ọkhọ rhọkpa i ra sunu vbe egbe ruẹ, ọfuan rhọkpa i ra vbe sikẹ owa ruẹ.

¹¹ Osanobua gha rhie ruẹ ne avbe odibo ẹre rhie mwẹ, ne iran gha degue ruẹ vbe ehe ne u rhirhi a yo.

¹² Iran gha tọn uwẹ mu mwẹ obọ, ne u ghẹ miẹn ehe na rrua owẹ vbe okuta.

¹³ Wẹ gha ye owẹ rrilo oduma kevbe ẹyẹn ginna otọ oduma ni khọ, kevbe ẹyẹn ni mwẹ obi.

¹⁴ Osanobua khare wẹẹ, “I gha miẹn iran ni ho ẹmwẹ mwẹ fan, I gha vbe degue iran ni rẹn mwẹ ye Nọyaẹnmwa.

¹⁵ Iran gha kpe tie mwẹ, I gha yaba iran vbe iran a gha rre uwu ibaro. I gha miẹn iran fan I gha vbe ye ọghọ ne iran.

¹⁶ I gha ya utọmwẹ san iran ẹse I gha miẹn iran fan.”