Psalm 70 - Edo Bible (E Baibol Ẹdo) Version 1996

Erhunmwu Iyobọ

¹ Osanobua, miẹn mwẹ fan! Nọyaẹnmwa yọmwẹ obọ nian!

² Te obọ gha vba iran ni ho ne iran gbe mwẹ uan ne iro han iran. Iran ni ghọghọ ye ọlọghọmwa mwẹ, te a gha khu iran werriegbe ne a fa iran an.

³ Te obọ gha vba iran ni ya mwẹ gbogiẹ, ne iran bu aro ua.

⁴ Gie ẹko gha sẹ iran ni bu ruẹ rre ọyẹnmwẹ ne iran vbe gha ghọghọ. Te iran ni kpọnmwẹ ye imienfan ruẹn gha kha vbe ẹghẹ hia wẹẹ, “U miẹn vbe Osanobua kpọlọ hẹ!”

⁵ Nọ ma wegbe kevbe ne ẹ i mwẹ ẹtin, ọ re imẹ khin. Zẹgiẹgiẹ rrọ mwẹ rre Osanobua, wẹ ọrọre ọmiọnmwafan mwẹ kevbe Nọyaẹnmwẹ zẹgiẹgiẹ do yọmwẹ obọ!