Psalm 41 - Edo Bible (E Baibol Ẹdo) Version 1996

Erhunmwu Ọmwa Ne Egbe Ma Rran

¹ Afiangbe nọ ne ọmwa ne ọ mu ọghe ovbiogue ro; e Nọyaẹnmwa gha ye iran obọ vbe ẹghẹ ibaro.

² E Nọyaẹnmwa gha degue iran vbe rhie ẹdagbọn iran lẹre. Ọ gha ya ekhọe iran gha rhiẹnrhiẹn vbe otọe nii rẹn i ra vbe sẹ iran rae ye obọ ẹtin avbe eghian iran.

³ Nọyaẹnmwa gha rhie iran lẹre vbe ẹghẹ egbe ne ọ ma rran ọ ghi vbe mu iran egbe rran.

⁴ Mẹ khare wẹẹ, “Nọyaẹnmwa mẹ rukhọ ghe ruẹ nẹ tohan mwẹ ne u mu mwẹ egbe rran.”

⁵ Avbe eghian mwẹ wa guan ẹmwẹ dan vbe ekpa mwẹ; iran ho ne I wu kevbe ne I vbe khian ne a mianmiaẹn.

⁶ Iran ne ọ do gha tuẹ mwẹ i vbe re emwa ekhọe esi. Iran gha do ye ehọ viọ iyẹn dan nẹ vbe ekpa mwẹ, iran ghi ladian ya vẹvẹ ọe gba ehe hia.

⁷ Iran ni khuiwu mwẹ hia gha ta ewẹwẹwẹ ma egbe vbe ekpa mwẹ iro dan ne ọ ghi rhia sẹ ọ re iran zẹ vbe ekpa mwẹ.

⁸ Iran ghi wẹẹ, “Emianmwẹ uwu ọ re ọ khuọnmwi na, ẹ i ghi kpaegbe vbe ukpo ni ọvbehe.”

⁹ Uhin wẹ osẹ mwẹ ne ọ sikẹ mwẹ sẹẹ, ọmwa ne I mu ẹtin yan sẹẹ ọmwa ne ọ re vbe evbare mwẹ te ọ ghi mu aro da mwẹ.

¹⁰ Nọyaẹnmwa, tohan mwẹ, ne u mu mwẹ egbe rran, mẹ gha ha ẹre werriegbe ne avbe eghian mwẹ.

¹¹ Obọ iran i ra ke ukhunmwu mẹ, ẹghẹ nii, me ghi rẹn wẹ, ẹko ruẹ rhiẹnrhiẹn ghe mwẹ.

¹² U gha yọmwẹ obọ rhunmwuda, emwi ne ọ gbae ọ re imẹ ru. U gha rhie mwẹ ye ehe ne u ye ẹdẹdẹmwẹdẹ.

¹³ Wa rho e Nọyaẹnmwa, ne Osanobua Izrẹl. Rho ẹre nian kevbe ẹdẹdẹmwẹdẹ. Isẹ! Isẹ!