Psalm 31 - Edo Bible (E Baibol Ẹdo) Version 1996

Erhunmwu A Mu Ẹtin Yan Osanobua

¹ I rre do lẹ gbinna an Nọyaẹnmwa ghẹ gie obọ gba mwẹ ẹdẹ. Osanobua ẹmwata wẹ khin lahọ miẹn mwẹ fan.

² Họn urhu mwẹ, miẹn mwẹ fan nian. Gha re ugue, ne ọ gha degue mwẹ. Ọmwa ne ọ gbinna mẹ, ne ọ ra miẹn mwẹ fan.

³ Wẹ ọrọre ugue kevbe ne ọ gbinna mẹ. Dia mwẹ ne u vbe gha su mwẹ khian, zẹ vbene u yan rẹn.

⁴ Degue mwẹ hin obọ ifi ne a rhuẹ ye otọ khẹ mwẹ tan ifuẹn gue mwẹ hin ẹbe rre.

⁵ Wẹ ọ re I lẹ gbinna u ghi miẹn mwẹ fan Nọyaẹnmwa, Osanobua ne ọ gie a mu ẹtin yan, ọ re uwẹ khin.

⁶ Wẹ khuiwu iran ni ga ẹbọ ohoghe sokpan mẹ mu ẹtin yan ruẹn.

⁷ I gha sẹ ọyẹnmwẹ, I ghi vbe gha ghọghọ rhunmwuda ahoẹmwọmwa ruẹn ne ẹi beghe. U miẹn oya ne I re, u rẹn ọlọghọmwa mwẹ.

⁸ U ma gie obọ eghian mwẹ gba mwẹ. U rhie ẹtin mẹ, ne I khian sẹ ehe ne ọ khọn mwẹ.

⁹ Tohan mwẹ Nọyaẹnmwa, rhunmwuda mẹ rre uwu ibaro; te aro mwẹ ghi viẹn ba ẹmwẹ eve ne I viẹ, te I ghi wa luẹluẹ.

¹⁰ Egbe wọ mwẹ rhunmwuda akhiẹ. Eve fian ẹdẹ mwẹ kanmwa. Olọghọ ne I ye guọghọ mwẹ egbe ye otọ. Te avbe ugboloko mwẹ ghi rẹnhuan.

¹¹ Te avbe eghian mwẹ hia, kpataki avbe ẹdogbo mwẹ, ghi sọnnọ mwẹ. Te ohan mwẹ ghi mu iran ni rẹn mwẹ; iran gha dekun mwẹ vbe ore, iran ghi lẹẹ.

¹² Te emwa hia ghi mianmian mwẹ, zẹ vbe ọmwa ne ọ wu nẹ, I ye vbe emwi ne a fi fua.

¹³ I họn ewẹwẹwẹ, ne avbe eghian mwẹ ta; iran wa khuan khẹ mwẹ iran gha si uma ne iran gbe mwẹ uan.

¹⁴ Sokpan, Nọyaẹnmwa, wẹ ọ re I mu ẹtin yan. Wẹ ọrọre Osanobua mwẹ,

¹⁵ wẹ ọ re ọ gbe aro ghe mwẹ vbe ẹghẹ hia. Miẹn mwẹ fan vbe obọ avbe eghian mwẹ, kevbe obọ iran ni kpokpo mwẹ.

¹⁶ Ye aro itohan ghe ọguọmwadia ruẹ, ye ahoẹmwọmwa ruẹn ne ẹi beghe miẹn mwẹ fan.

¹⁷ I tu tie ruẹ Nọyaẹnmwa ghẹ gie iran fa mwẹ uan. Efaa ọ re ọ gha rruan ọmwa dan, te iran gha do gha rriẹ ẹvbo emwa ni wulo nẹ.

¹⁸ Gue avbe ọhọn ohoghe ni unu iran ni tọn egbe mu kevbe ni hio. Iran ni ye ukpe iran sakan avbe emwa ẹmwata.

¹⁹ Umiẹn vbe ehia mose hẹ ighe avbe emwi esi ne u hẹ ye otọ, khẹ iran ni ya ọghọ ne uẹn. Agbọn hia rẹnrẹn vbene u ma hẹ. A miẹn vbe u viọ iran ni mu ẹtin yan ruẹn lẹre hẹ khuankhuan an khuan.

²⁰ U viọ iran lẹre ye ẹbe fo, ọghe ehe ne uwẹ ye hin uma ne emwa si rre. U viọ iran lẹre ye irhu ne ẹi mwẹ ẹbe hin ihẹn ne avbe eghian iran tie rre.

²¹ Wa rho e Nọyaẹnmwa, u miẹn vbe ọ rhie ahoẹmwọmwa ne ọ mwẹ ghe mwẹ ma hẹ vbe ọyunnuan, vbe iran ghae ga mwẹ, gha gun mwẹ gbinna.

²² Afianma te gha fian mwẹ I keghi te ro wẹ ọ khu mwẹ fua hin ehe ne irẹn ye rre nẹ. Sokpan, ọ họn utumwẹ mwẹ, vbe I kpe tie ẹre nọ iyobọ.

²³ Wa ho ẹmwẹ e Nọyaẹnmwa, wa ne emwa rẹn, ni gie a mu ẹtin yan hia, e Nọyaẹnmwa ọ re ọ degue ọmwa ne ọ gie a mu ẹtin yan, sokpan, ọ ghi rri iran ni tọn egbe mu oya zẹ vbene ọ ma iran.

²⁴ Wa wegbe, ne uwa vbe din, wa hia ni mwẹ idaehọ vbe ehe ne Nọyaẹnmwa ye.