Psalm 28 - Edo Bible (E Baibol Ẹdo) Version 1996

Erhunmwu Iyobọ

¹ E Nọyaẹnmwa ugue mwẹ, mẹ tu tie ruẹ. Họn urhu eve mwẹ a deghẹ u ma zẹ yọ mwẹ re, mẹ gha do ye vbe iran ni tuorre rriẹ ẹvbo ne iran ni wulo nẹ ye.

² Họn urhu mwẹ vbe imẹ a gha tu tie ruẹ nọ iyobọ. Vbe I gha viọ obọ mwẹ da ukhunmwu ghe Ọgua Osa ruẹ ne ọ huanrẹn.

³ Ghẹ bu abe gbe mwẹ ba avbe emwa dan, ba iran ni ru emwi dan. Avbe iran ne akọn giẹ iwu rriara.

⁴ Rria iran ikhi ye emwi ne iran ru, kevbe emwi dan ne iran ru, rria iran ikhi ye emwi ne iran ru hia ru iran emwi ne ọ ma iran!

⁵ Iran i vbe zẹdẹ bẹghe iwinna Nọyaẹnmwa, ra emwi ne irẹn yi rhunmwuda ọnii, ọ gha rri iran oya, ọ ghi vbe fuẹn iran an ẹdẹdẹmwẹdẹ.

⁶ Wa rhie urhomwẹ ne Nọyaẹnmwa, ọ họn urhu mwẹ vbe I nọ iyobọ.

⁷ E Nọyaẹnmwa degue mwẹ, ọ vbe gbinna mẹ I mu ẹtin yan rẹn. Ọ yọmwẹ obọ, ọ keghi ya ọyẹnmwẹ sẹ mwẹ, I gha so ihuan oghọghọ rho ẹre.

⁸ E Nọyaẹnmwa degue emwa rẹn, ọ degue, ọ miẹn rẹn fan ighe ọba ne irẹn hannọzẹ.

⁹ Miẹn emwa ruẹn fan Nọyaẹnmwa ne u vbe fiangbe emwa ni re ọwuẹ. Gha re ọsuohuan iran, ne u vbe gha gbearoghe iran ẹdẹdẹmwẹdẹ.