Psalm 27 - Edo Bible (E Baibol Ẹdo) Version 1996

Erhunmwu Urhomwẹ

¹ E Nọyaẹnmwa ọrọre uwanmwẹ mwẹ kevbe imiẹnfan mwẹ, de ọmwa ne ohan rẹn gha mu mwẹ? E Nọyaẹnmwa, ọ re ọ degue mwẹ, hin uwu ẹbe hia, afianma i ghi fianmwẹ.

² Ugbẹn vbe iran ne emwa dan, dekun mwẹ, iran keghi dele.

³ Ọ gha khọn rẹn wẹ, te okuo ghae ga mwẹ, afianma i ra fianmwẹ, ọ gha khọn avbe eghian, wẹ ne iran dekun mwẹ, te imẹ gha ye mu ẹtin yan Osanobua.

⁴ Emwi ọkpa, ọ re imẹ nọ Nọyaẹnmwa re, emwi ọkpa ni ọ re I vbe ho, ne imẹ gha rre uwu owa e Nọyaẹnmwa ẹdẹdẹmwẹdẹ. Ne I gha ye ọyunnuan ghe iwinna rẹn, ne ọ gha ma mwẹ odẹ.

⁵ Ọ gha degue mwẹ vbe ẹghẹ ibaro ọ gha rhie mwẹ lẹre vbe uwu Ọgua Osa ẹre, vbe ne ai na mwẹ ẹbe. Ọ ghi vbe gie ẹkun sẹ mwẹ otọ vbe uhunmwu okuta ne ọ yo.

⁶ Erriọ ọ re I gha na khọnmiotọ vbe uhunmwu avbe eghian mwẹ ni lẹga mwẹ. I gha ya urhu oghọghọ ne ọ la zọ ese vbe uwu Ọgua Osa ẹre. I gha so ihuan, I gha rho e Nọyaẹnmwa.

⁷ Họn ọghomwẹ Nọyaẹnmwa vbe I gha da tie ruẹ tohan mwẹ, ne u vbe zẹ ẹmwẹ wanniẹn mwẹ.

⁸ Ẹkpo ne uwẹ na kha wẹẹ, “Wa larre do gha ga mwẹ.” Mẹ keghi wanniẹn wẹẹ, “Nọyaẹnmwa, I gha rre.”

⁹ Ghẹ rhie egbe lẹre mẹ ghẹ muohu mwẹ, ghẹ khu ọguọmwadia ruẹ werriegbe, wẹ ọrọre ne ọ yọmwẹ obọ de ẹdẹ, ghẹ sẹ mwẹ rae, ghẹ fi iyeke gbe mwẹ, Osanobua ọmiọnmwafan mwẹ.

¹⁰ Erha mwẹ vbe iye mwẹ sẹtin he mwẹ yotọ, sokpan, e Nọyaẹnmwa gha gbe aro ghe mwẹ.

¹¹ E Nọyaẹnmwa, ma mwẹ emwi ne u ho ne I ru, ne u vbe rhie mwẹ la odẹ ne ẹbe i ye, rhunmwuda, eghian ne I mwẹ wa bun.

¹² Ghẹ sẹ mwẹ rae ne avbe eghian mwẹ, ni ya ohoghe kevbe a yan khẹ ọmwa gun mwẹ gbinna.

¹³ Mẹ rẹnrẹn i ghẹ I gha tọ miẹn ọma ọghe Nọyaẹnmwa vbe arria na.

¹⁴ Mu ẹtin yan e Nọyaẹnmwa, gha mwẹ iyayi ghẹ gie ẹtin fo uẹ mu ẹtin yan e Nọyaẹnmwa.