Psalm 2 - Edo Bible (E Baibol Ẹdo) Version 1996

Ọba Ne Osa Hannọ Zẹ

¹ Vbọzẹ ne avbe agbọn ẹvbo na si uma isọtẹ yi? Vbọzẹ ne emwa na vbe si uma akuọkan iran.

² Avbe ọba iran sọtẹ, ekhaẹmwẹ iran vbe si uma kugbe ghe Nọyaẹnmwa, kevbe ghe ọba ne irẹn zẹe.

³ Iran khare wẹẹ, “Wa gie ima wan egbe ima hin asẹ iran rre, wa gie a mu akhayan ọmwa iran fua.”

⁴ E Nọyaẹnmwa giee ke ẹkete ẹre vbe ẹrinmwi rre, ọ keghi vbe ya uma eghẹrẹ iran gbogiẹ.

⁵ Ọ ya ohu ya obọ sekhae ne iran ọ ya okuosu ẹre runran iran.

⁶ Ọ keghi kha wẹẹ, “Mẹ rhie ọba mwẹ ye ẹkete nẹ, vbe Zaiọn ne oke mwẹ ne ọ huanrẹn.”

⁷ Ọba khare wẹẹ, “Mẹ gha wewe ẹmwẹ ne Nọyaẹnmwa tama mwẹ. Rẹn khama mwẹ wẹẹ, ‘Wẹ ọrọre ovbi mwẹ, ẹrẹ ọ re imẹ khian erhaa.

⁸ Nọ vbe obọ mwẹ, mẹ gha viọ uhunmwu ẹvbo hia nuẹn. Otọ agbọn hia, gha vbe khian ọwuẹ.

⁹ U gha ya umọmọ rẹnkhẹn iran, u gha zagha iran kua ukhiọnmwẹ, zẹ vbe akhe.’ ”

¹⁰ Rhunmwuda ọnii, wa danmwehọ obọ ne a ya sekhae ne uwa na, wa ne ọba, wa vbe ruẹ iruẹmwi na, wa ni khaemwisẹ agbọn na.

¹¹ Wa ya ohan ga Nọyaẹnmwa, wa gha guọ,

¹² ne uwa vbe ya uhunmwu rhanmwẹ otọ ne ẹẹn. Ne uwa ghẹ gie ohu ya mu ẹẹn, wa ghi wulo uwu udomwurri. Afiangbe ọre ọghe iran hia, ni lẹgbinna ẹẹn.