Psalm 147 - Edo Bible (E Baibol Ẹdo) Version 1996

Ne Urhomwẹ Osanobua Ne Oghodua

¹ Wa rho e Nọyaẹnmwa! Ọ kere ne a gha so ihuan urhomwẹ ghe Osanobua mwa; ọ rhiẹnrhiẹn, ọ vbe kei ne a rho ẹre.

² E Nọyaẹnmwa ra dọlegbe rhie Jerusalẹm ye ukpo ẹre, ọ ra viọ iran ni rre iwe dọlegbe rre.

³ Ọ mu iran ne ekhọe ẹre rhiae egbe rran, ọ keghi vbe gbalọ iran ẹwẹn.

⁴ Ọ ta inu ne avbe orhọnmwẹ ra gha khin nẹ, ọ na he dọmwadẹ ọghọe eni.

⁵ Nọkhua ke ne ọ mwẹ ẹtin ọ re Osanobua mwa khin; ai sẹtin gie ẹwaẹn ẹnrẹn.

⁶ Ọ ghi tọn omwa ne ọ mu egherriotọ mu, sokpan, ọ ghi rẹnkhẹn ọmwa dan mu otọ.

⁷ Wa so ihuan urhomwẹ ghe Nọyaẹnmwa, wa kpe akpata ne ọ rhiẹnrhiẹn ne Osanobua mwa.

⁸ Ọ tan okuku amẹ gue iso, ọ gie amẹ rhọ ye otọ, ọ keghi gie avbe irunmwu zọ vbe avbe uhunmwu oke.

⁹ Ọ rhie evbare ne avbe aranmwẹ oha, ọ keghi vbe koko ivbi ahianmwẹ, vbe iran a rre.

¹⁰ Ẹ i re avbe ẹsin ni mwẹ ẹtin ọ re ẹko rhiẹnrhiẹn yi, ra ne ọyẹnmwẹ gha sẹ ọe ye ẹmwẹ avbe ivbiyokuo ni wegbe.

¹¹ Sokpan iran ni ya ọghọ ne ẹẹn ọ re ọ ye ẹko rhiẹnrhiẹn ọẹn iran ni mu ẹtin van aho ẹmwẹ ọmwa rẹn ne ẹ i beghe.

¹² Jerusalẹm wa rho e Nọyaẹnmwa! E Zaiọn, wa rho Osanobua uwa!

¹³ Rẹn ruẹe ne onurho uwa wegbe; ọ fiangbe emwa ruẹn.

¹⁴ Ọ ruẹe ne ẹbe fo la ehe ne otọe uwa lae, ọ keghi vbe ye ọka ne ọ maa sẹẹ vuọn uwa ẹko.

¹⁵ Ọ gu otọe guan, ẹgiẹgiẹ ọ re a ru emwi ne ọ tae.

¹⁶ Ọ wa esia ye otọ zẹ vbe igbu ukpọn, ọ keghi vbe wawa amẹ ne ọ zeze zẹ vbe ebubẹ.

¹⁷ Ọ gie ikpamẹ ne ọ zeze zẹvbe ikpokuta rre, a i miẹn ọmwa ne egbe ẹre gha sẹtin rrọ ọnii ne ọ zẹ rre!

¹⁸ Ọ guanrẹn, avbe esia nii keghi ranran; ọ gie ẹhoho rre, avbe amẹ keghi gha lẹ.

¹⁹ Ọ gie uhunmwu gie emwa rẹn, igiodẹ ọre ke uhi ẹre ne ivbi Izrẹl.

²⁰ Ọ ma vbe he ru ọna ne ẹvbo ọvbehe; iran na rẹn uhi ẹre. Wa rho e Nọyaẹnmwa!