Psalm 142 - Edo Bible (E Baibol Ẹdo) Version 1996

Erhunmwu Iyobọ

¹ I kpe tie Nọyaẹnmwa wẹ ne ọ yọmwẹ obọ; I kakabọ rinmwian ẹẹn.

² I gui ẹzọ mwẹ hia ma rẹn, I talọ emwi ne ọ ru mwẹ hia ma rẹn.

³ Ọ gha kẹ ekherhe ne I wa fọrhiọn, rẹn rẹn emwi ne I gha ru. Avbe eghian mwẹ khuẹn ifi khẹ mwẹ, vbe odẹ ne I la khian.

⁴ I gha ghe lẹga egbe mwẹ, I ghi miẹn wẹ, ọmwa ne ọ gha yọmwẹ obọ i rrọọ, ọmwa rhọkpa i zẹ yọmwẹ re.

⁵ Nọyaẹnmwa, I kpe tie ruẹ ne u yọmwẹ obọ, wẹ, e Nọyaẹnmwa, ọrọre ne ọ rhie mwẹ lẹre, wẹ ọrọre emwi okpa ne I ho vbe agbọn na.

⁶ Rhie ehọ ye eve ne I viẹ ya nọ iyobọ, isonrhiọn i ghi rrọ mwẹ re hiehiere. Miẹn mwẹ fan hin obọ avbe eghian mwẹ rre, iran wegbe sẹ mwẹ gbe.

⁷ Yuo mwẹ hin uwu irhiaẹko mwẹ rre, ẹghẹ nii, mẹ gha rho ruẹ, vbe uwu iko avbe emwa ruẹn, rhunmwuda ẹse ne u ru mẹ.