Psalm 112 - Edo Bible (E Baibol Ẹdo) Version 1996

Ọyẹnmwẹ Ọmwa Esi

¹ Wa rho e Nọyaẹnmwa! Afiangbe ọrọre ọghe iran ni ya ọghọ ne Nọyaẹnmwa, iran ne ẹko rhiẹnrhiẹn ye ne a gha mu uhi ẹre sẹ.

² Ivbi ọmwa esi gha mwẹ ẹtin vbe otọe nii; a gha fiangbe ivbi uniẹn ọnrẹn.

³ Ẹgbẹe ọre ghi gha re emwa ne emwi gue kevbe ni fe, agbọn gha wa ma rẹn rhinrin ẹdẹ.

⁴ Te uwanmwẹ ladian vbe uwu ebiebi ne ọmwa esi, ne iran ni mwẹ itọhan, ẹnina, kevbe ẹmwata.

⁵ Afiangbe ọrọre ọghe ne ọ zẹ emwi obọ vbekpa igho ne a rhie ne emwa mọmọ, ne ọ vbe ye ai ru ero do ẹki ẹre.

⁶ Ọmwa esi i gbe ihoi ẹdẹ, te a gha ye ẹre rre rhinrin ẹdẹ.

⁷ Afianma iyẹn dan i fian ẹẹn, iyayi ẹre deziẹn e Nọyaẹnmwa rẹn mu ẹtin yan.

⁸ Ẹ i hawa, ohan i muẹn; ọ rẹnrẹn ighe aro irẹn gha sẹ ọe, vbe obọ a rhanmwẹ avbe eghian rẹn.

⁹ Ọ gha rhie ne ne ẹ i mwẹ wọrhọwọrhọ itohan rẹn i vbe baku ọ gha mwẹ ẹtin, a ghi vbe gha ya ọghọ ne ẹẹn.

¹⁰ Emwa dan miẹn ọn, ohu kegha mu iran, ohu mu iran, egbe emwi hia wọ iran, idaehọ iran wirua fo fẹẹrẹ.