Nọmbas 6 - Edo Bible (E Baibol Ẹdo) Version 1996

Ilele Avbe Agbihiagha

¹ E Nọyaẹnmwa keghi tama e Mosis,

² ne ọ rhie igiodẹ na ma ivbi Izrẹl, “Ọ re okpia ra okhuo nọ ne ọ ru eyan ighẹ rẹn khian gha re agbihiagha, ọ na vbe ye egbe ẹre fi ohan ne Nọyaẹnmwa,

³ ọ ghi zobọ vbe ayọn ke ebiẹ, ẹi ra vbe da ayọn ne a ye ọmọ erhan ayọn nọbaa ne a kae hin rre ru.

⁴ Vbe uwu ẹghẹ ne ọ gha ya gha re Agbihiagha, ọ ghẹ danmwẹ emwikemwi ne ọ ke egbe erhan ayọn nọbaa rre, ọ re ikpẹ ra ikpakpa erhan ayọn nọbaa nọ.

⁵ “Vbe ẹghẹ ne a na miẹn wẹẹ uwu eyan Agbihiagha ọ re ọ ye, wẹ ne ọ ghẹ gbe eto ra ne ọ zẹ ẹtu. Eyan Agbihiagha ne ọ ru nii ye muẹn la inu ẹghẹ ne a ya ẹe fi ohan ne Nọyaẹnmwa la, ọ ghi gie eto kevbe ẹtu ẹre gha sọn.

^6-7 Wẹ ne ọ ghẹ sikẹ ikun orinmwi. A gha rhe wẹ ọghe erha ẹe nọ ra iye ẹe, ọtiọnrẹn ne okpia ra ọtiọnrẹn ne okhuo. We ne ọ ghẹ ya sikẹ orinmwi ne ọ ghẹ ya hẹ awua, rhunmwuda eto ẹre nii ọrọre ama ne a ya rẹn ighẹ te a ya ẹe fi ohan ne Nọyaẹnmwa.

⁸ Ẹghẹ ne ọ rhirhi ya gha re Agbihiagha, a ya ẹe fi ohan ne Nọyaẹnmwa.

⁹ “A deghẹ ọmwa wa wu vbe udomwurri vbe ehe ne agbihiagha ye ighẹ ọ mu awua ye ọre eto ne ọ ya fi ohan, ọ ghi ziengbe la ikpẹdẹ ihinrọn, ọ ghi khiokhio eto kevbe ẹtu, ẹghẹ nii, ọ ghi do gha re ne ẹi mwẹ awua.

¹⁰ Vbe ikpẹdẹ nogierẹnrẹn, ọ ghi viọ; idu eva ra elikhukhu eva bu ohẹn vbe onurho Owa Ukpon Ile.

¹¹ Ohẹn ghi ya ọkpa zọ ese ye orukhọ, ọ ghi ye nọkpa zọ ese na giẹn uan, odẹ vberriọ ọ gha ru iruemwi akpehuan ne ẹẹn, rhunmwuda ne ọ na ya egbe kan orinmwi. Vbe ẹdẹ ọkpa nii, ọmwa nii ghi dọlegbe ya uhunmwu ẹnrẹn fi ohan.

¹² Ọ ghi vbe dọlegbe ya ẹghẹ ọre fi ohan zẹ vbe Agbihiagha. A i ghi ka ẹghẹ ne ọ ka ruẹ la yọ rhunmwuda, awua la eto nọ te ka ya fi ohan. Ọ ghi mu ivbi ohuan ne ọ rre ukpo ọkpa rre do ya zọ ese ahaewerriegbe.

¹³ “Agbihiagha gha lo ẹghẹ eyan ne ọ yan rẹn fo nẹ, ọ ghi do ru avbe emwi na. Ọ ghi gha rrie onurho Owa Ukpon Ile.

¹⁴ Ọ ghi viọ aranmwẹ ne ẹi mwẹ okan eha gie Nọyaẹnmwa ogho ne ẹi mwẹ okan, ne ọ he rre ukpo ọkpa ọghe ese ne a giẹn uan ovbi ohuan amwẹ ne ọ he rre ukpo ọkpa, ọ ghe ese orukhọ, kevbe ogho ọghe isara.

¹⁵ Ọ ghi mu okhuae ọkpa ọghe ebrẹd ne a ma ya eyist le rre: ududu ebrẹd ne a ya irhuarhua ne a ya ofigbọn oliv gbe le, kevbe ebrẹd ne fẹrhẹfẹrhẹ ne a ya ofigbọn oliv lọọ, do deba inu ọka kevbe ayọn izẹọhẹ ne a ghi mwa yọ.

¹⁶ “Ohẹn ghi viọ ẹre bu e Nọyaẹnmwa gha dee, ọ ghi zọ ese orukhọ kevbe ese na giẹn uan.

¹⁷ Ọ ghi ya ogho nọ rrọọ zọ ese ghe Nọyaẹnmwa zẹ vbe isara, ke ẹe kevbe okhuae ebrẹd nii, ọ ghi vbe ya avbe ọka kevbe ayọn ni rrọọ yo imuohan.

¹⁸ Agbihiagha nii ghi khiokhio eto ẹre vbe onurho Owa Ukpọn Ile, ọ ghi ya hẹ ọre ku erhẹn ne a na giẹn emwi ne a ya si isara.

¹⁹ A gha ghi le ogho nii nẹ, ohẹn ghi mu izabọ ẹre, kevbe ududu ebrẹd ọkpa kevbe ebrẹd ne fẹrhẹfẹrhẹ ọkpa vbe okhuae nii, Ọ ghi viọ ẹre ye Agbihiagha nii obọ.

²⁰ Iyekọnii, ohẹn ghi ya ẹe zẹ ọhẹ kpataki gie Nọyaẹnmwa, izẹọhẹ ne ọ huanrẹn, ọghe ohẹn nọ, do deba ẹwẹe kevbe owẹ ogho nii, ne a wa rẹn wẹ ọghe ohẹn nọ. Iyeke ọnii, Agbihiagha nii sẹtin da ayọn.

²¹ “Ilele ọghe avbe Agbihiagha ọre onii khin; sokpan, a deghẹ ọkpa vbe uwu iran ghi vbe yan ye emwi gberra ne a mwa yọ wẹ ne Agbihiagha gha zẹ, ọ ghi wa mu ẹẹn sẹ zẹ vbe ne ọ yan rẹn.”

Erhunmwu Afiangbe Ne Avbe Ohẹn Na Ne Emwa

²² E Nọyaẹnmwa keghi tama e Mosis,

²³ Ne ọ tama Errọn kevbe ivbi ẹre ne iran gha ya vbenian fiangbe ivbi Izrẹl.

²⁴ “Te Nọyaẹnmwa gha fiangbe uwa ne ọ gha gbe aro ghe uwa.

²⁵ Te Nọyaẹnmwa gha tohan uwa ne ọ vbe gha ru uwa ẹse.

²⁶ Te Nọyaẹnmwa gha ye aro nọmaa ghe uwa, ne ọ rhie ọfumwegbe ne uwa.”

²⁷ E Nọyaẹnmwa keghi kha wẹẹ, “Iran gha so enii mwẹ ya na erhunmwu na vbe iran gha na erhunmwu ne ivbi Izrẹl, I gha fiangbe iran.”