Nọmbas 30 - Edo Bible (E Baibol Ẹdo) Version 1996

Ilele Vbekpa Eyan

¹ E Mosis keghi ru igiodẹ na ne avbe ekaolotu avbe ẹwae Izrẹl.

² Ọmwa gha ve emwi wẹ rẹn gha rhie emwi ne Nọyaẹnmwa, ra te ọ vẹn ihẹn wẹ rẹn gha zobọ vbe emwi eso, ọ ghẹ rhie obọ gberra eyan ne ọ yan rẹn nii, sokpan ọ ghi ru emwi hia vbene ọ kha re wẹ rẹn ra gha ru.

³ Uvbi ne ọ he rre owa erha ẹe gha ve emwi ne ọ wẹ rẹn gha rhie ne Nọyaẹnmwa ra ne ọ zobọ vbe emwi eso,

⁴ ọ ghi wa ru emwi hia zẹ vbene ọ ve, ra ne ọ yan rẹn, sokpan a ma wẹ erhae ma kue yọ vbe ọ họẹn.

⁵ Erha ẹe gha wẹ ne ọ ghẹ ha emwi ne ọ ve nii vbe ọ họẹn, a i ghi vbe wẹ sokpan ọ ru ẹe. E Nọyaẹnmwa gha ya bọ ẹe, rhunmwuda erha ẹe ma kue yọ wẹ ne ọ ru ẹe.

⁶ A deghẹ okhuo ne ọ ma rọnmwẹ ọdọ ve emwi, ọ re te ọ yan ru ẹe ra ọ ma rẹn vbe ọ ru ẹe, ra te ọ yan rẹn wẹ rẹn gha zobọ vbe emwi eso, ọ na ghi ya rọnmwẹ ọdọ,

⁷ te ọ gha ha emwi hia ne ọ ve, ra ne ọ ru emwi hia ne ọ yan rẹn, sokpan amawẹ te ọdọ ẹre wẹ hẹn vbe ẹghẹ vbe ọ họn ẹẹn.

⁸ Sokpan adeghẹ ọdọ ẹre wẹ rẹn i kue yọ vbe ẹghẹ vbe ọ họn ẹẹn, wẹ ne ọ ghẹ ru ẹe, a i ghi vbe wẹ ne ọ ru ẹe. E Nọyaẹnmwa gha ya bọe.

⁹ Ẹgbẹ ra okhuo ne ọ sẹ ọdọ ẹre rae gha ve emwi ra te ọ yan rẹn ne irẹn sẹ emwi eso rae, te ọ gha mu ehia sẹ.

¹⁰ Okhuo ne ọ rre owa ọdọ gha ve emwi ra te ọ wẹ rẹn gha zobọ vbe emwi eso,

¹¹ te ọ gha ha emwi hia ne ọ ve ra ne ọ yan rẹn sokpan a ma wẹ ọdọ ẹre wẹ hẹn vbe ọ họn ẹẹn.

¹² Sokpan adeghẹ ọdọ ẹre ma kue ne ọ mu eyan nii sẹ vbe ọ họn ẹẹn, a i ghi vbe wẹ ne ọ ru ẹe. Ọdọ ẹre ọre ọ ma gie ẹe mu eyan ni sẹ. E Nọyaẹnmwa gha ya bọ ẹe.

¹³ Ọdọ ẹre mwẹ asẹ ne ọ ya so igie yọ ra ne ọ khuan ruan ighẹ emwi ne ọ ve ra eyan ne ọ yan rẹn.

¹⁴ Sokpan adeghẹ ọdọ ẹre ma wẹ hẹn vbe ẹdẹ ne ọ họn ẹẹn, te ọ gha ha emwi hia ne ọ ve ra ne ọ yan rẹn. Ugbẹn vbe okpia nii ma wẹ hẹn vbe ọ họn ẹẹn, ọ so igie yọ nẹ.

¹⁵ Sokpan, adeghẹ ọ khuan eyan nii vbe ọ kpẹe nẹ ne ọ họn ẹẹn, rẹn ọ khian ya egbe miẹn oya ne okhuo nii gha re ye ne ọ na ma mu eyan rẹn sẹ.

¹⁶ Ilele ne Nọyaẹnmwa mu ye otọ ne Mosis vbe ekpa emwi ne okhuo ne ọ rre owa ọdọ ra ne ọ rre owa erha ẹe ru ọre ena khin.