Nọmbas 29 - Edo Bible (E Baibol Ẹdo) Version 1996

Izẹ Ọhẹ Vbe Ẹghẹ Emwiukpo Ukpo Ọgbọn

¹ Vbe ikpẹdẹ ne okaro ọghe uki ne ogihinrọn, wa ghi si egbe koko ne uwa ru ugamwẹ, a ghẹ vbe winna iwinna rhọkpa. A ghi kpe okpe vbe ẹdẹ nẹdẹrriọ.

² U ghi ha oko ese na giẹn uan gie Nọyaẹnmwa, emwi nọ winhin yẹ ọre nọ, avbe emwi na: ovbi ẹkhuia ẹmila, ogho ọkpa, ivbi ogho ihinrọn ni he rre ukpo ọkpa, ehia ghi gha re ne ẹ i mwẹ okan.

³ U ghi vbe zẹ ọhẹ ọka nọkhẹke, irhuarhua ne a ye ofigbọn oliv gbe vbenian, uwan irhuarhua ehan ghi lele ẹkhuia ẹmila ọkpa, uwan enẹ ghi lele ogho ọkpa.

⁴ Uwan eva ghi lele oteghe ohuan ọkpọkpa.

⁵ U ghi vbe ya ovbukhọ ọkpa zọ ese orukhọ, odẹ vberriọ, u ghi ru iruemwi akpehuan ne emwa nii.

⁶ U ghi ya ena zẹ ọhẹ ba ese na giẹn uan ọghe ẹdẹgbegbe ọghe ikpẹdẹ ne okaro vbe uki, ke ẹe kevbe izẹọhẹ ọka kevbe ọghe ayọn. Avbe izẹọhẹ evbare na, emwi ni winhin yẹ Nọyaẹnmwa nọ.

Izẹ Ọhẹ Vbe Ẹdẹ Erinmwian

⁷ Vbe ikpẹdẹ ne ogigbe, ọghe uki ne ogihinrọn, wa ghi si egbe koko ne uwa ru ugamwẹ, wa ghẹ rri evbare rhọkpa, wa ghẹ winna,

⁸ Wa ghi zọ ese na giẹn uan ghe Nọyaẹnmwa, uwinhinmwẹ ne ọ yẹ ọre, avbe emwi na: ovbi ẹkhuia ẹmila ọkpa, ogho ọkpa ivbi ogho ihinrọn ni he rre ukpo ọkpa, ehia ghi gha re ne ẹ i mwẹ okan.

⁹ Vbe zẹ ọhẹ ọka vbene ọ khẹ ke, irhuarhua ne a ya ofigbọn oliv gbe; uwan ehan ọghe irhuarhua ghi lele ẹkhuia ne ọ rrọọ, uwan enẹ ghi lele ogho.

¹⁰ Ke uwan eva ghi vbe lele oteghe ohuan ọkpọkpa.

¹¹ A ghi vbe ya ovbukhọ ọkpa zọ ese orukhọ deba ẹwe ne a ya zọ ese akpehuan ọghe emwa nii, deba izọese ẹdẹgbegbe ke ẹe kevbe izẹọhẹ ọka kevbe ayọn.

Izẹọhẹ Vbe Ẹghẹ Emwiukpo Irhu

¹² Wa ghi si egbe koko ye ugamwẹ vbe ikpẹdẹ ekesugie ọghe uki ne ogihinrọn. Wa ghi ya ikpẹdẹ ihinrọn ru emwiukpo ne a ya ya ọghọ ne Nọyaẹnmwa, wa ghẹ winna iwinna rhọkpa.

¹³ Vbe ikpẹdẹ ne okaro na, wa ghi ya evbare zẹ ọhẹ gie Nọyaẹnmwa, emwi nọ winhin yẹ ọre nọ, avbe emwi na: ivbi ẹkhuia ẹmila iwera, ogho eva, ivbi ogho iwenẹ ni he rre ukpo ọkpa, ehia ghi gha re ne ẹ i mwẹ okan.

¹⁴ U ghi vbe zẹ ọhẹ ọka ne ọ khẹ ke uẹ, irhuarhua ne a ya ofigbọn oliv gbe, uwan ehan ọghe irhuarhua ghi deba ẹkhuia ẹmila ọkpa, uwan enẹ ghi lele ogho ọkpọkpa.

¹⁵ Uwan eva ghi lele oteghe ohuan ọkpọkpa deba izẹọhẹ ayọn ne ọ khẹke.

¹⁶ U ghi vbe ya ovbukhọ ọkpa zọ ese orukhọ, u ghi ya ena zọ ese deba izẹọhẹ ẹdẹgbegbe ni rrọọ ke ẹe kevbe izẹọhẹ ọka kevbe ayọn.

¹⁷ Vbe ikpẹdẹ ne ogieva, u ghi ya ẹkhuia ẹmila iweva zọ ese kevbe ogho eva kevbe ivbi ogho iwenẹ ni he rre ukpo ọkpa, ehia ghi gha re ne ẹ i mwẹ okan.

^18-19 Avbe emwi ne a vbe ya zọ ese vbe ikpẹdẹ ne okaro hia, a ghi wa ya ehia zọ ese ba ẹre.

²⁰ Vbe ikpẹdẹ ne ogieha, u ghi ya ivbi ẹkhuia ẹmila ihinrọn zọ ese, kevbe ogho eva deba ivbi ogho iwenẹ ni he rre ukpo ọkpa, ehia ghi gha re ne ẹ i mwẹ okan.

^21-22 Vbe ya emwi hia ne a ya zọ ese vbe ẹdẹ ne okaro zọ ese ba ẹre.

²³ Vbe ikpẹdẹ nogienẹ, u ghi ya ivbi ẹkhuia ẹmila igbe zọ ese kevbe ogho eva kevbe ivbi ogho iwenẹ ni he rre ukpo ọkpa, ehia ghi gha re ne ẹ i mwẹ okan.

^24-25 U ghi vbe ya emwi ne a ya zọ ese vbe ikpẹdẹ ne okaro hia zọ ese ba ẹre.

²⁶ Vbe ikpẹdẹ ne ogisẹn, u ghi ya ivbi ẹkhuia ẹmila ihinrin zọ ese, kevbe ogho eva deba ivbi ogho iwenẹ ni he rre ukpo ọkpa, ehia ghi gha re ne ẹ i mwẹ okan.

^27-28 U ghi vbe ya emwi nekpa hia na ya zọ ese vbe ikpẹdẹ ne okaro zọ ese ba ẹre.

²⁹ Vbe ikpẹdẹ nogiehan, u ghi ya ivbi ẹkhuia ẹmila erẹnrẹn zọ ese, ogho eva kevbe ivbi ogho iwenẹ ni he rre ukpo ọkpa, ehia ghi gha re ne ẹ i mwẹ okan.

^30-31 U ghi vbe ya emwi hia ne a ya zọ ese vbe ikpẹdẹ ne okaro zọ ese ba ẹre.

³² Vbe ikpẹdẹ ne ogihinrọn, u ghi ya ivbi ẹkhuia ẹmila ihinrọn zọ ese, kevbe ogho eva deba ivbi ogho iwenẹ ni he rre ukpo ọkpa ehia ghi gha rre ne ẹ i mwẹ ozan.

^33-34 U ghi vbe ya emwi hia ne a ya zọ ese vbe ikpẹdẹ ne okaro zọ ese lelẹe.

³⁵ Vbe ikpẹdẹ ne ogierẹnrẹn, wa ghi si egbe koko ne uwa ru ugamwẹ, wa ghẹ winna iwinna rhọkpa.

³⁶ Wa ghi ye avbe emwi na zọ ese na giẹn uan zẹ vbe izẹọhẹ evbare ghe Nọyaẹnmwa, emwi ne ọ winhin yẹ ọre: ovbi ẹkhuia ẹmila ọkpa, ogho ọkpa deba ivbi ogho iwenẹ ni he rre ukpo ọkpa, ehia ghi gha re ne ẹ i mwẹ okan.

^37-38 U ghi vbe ye avbe emwi hia ne a ya zọ ese vbe ikpẹdẹ ne okaro zọ ese lele ẹe.

³⁹ Enena ọrọre emwi ne u ghi ya gha zọ ese ghe Nọyaẹnmwa vbe ẹghẹ emwiukpo rua, zẹ vbe izẹọhẹ na giẹn uan, izẹọhẹ ọka izẹọhẹ ayọn kevbe isara. A ghi ru ena deba izẹọhẹ emwi obọ ọmwa ne u ru ya mu eyan ruẹn sẹ ra zẹ vbe isara.

⁴⁰ Ẹre Mosis na na iyẹn emwi hia ne Osanobua tama rẹn ma ivbi Izrẹl.