Nọmbas 23 - Edo Bible (E Baibol Ẹdo) Version 1996

¹ Ọ keghi khama e Balak wẹẹ, “Gba aka ihinrọn ye emwa mẹ ne u viọ ẹkhuia ẹmila ihinrọn kevbe ogho ihinrọn rre.”

² E Balak keghi ru vbene a tama rẹn, irẹn kevbe Balam keghi ya ẹkhuia ọkpa kevbe ogho ọkpa zọ ese vbe aka ọkpọkpa.

³ Ẹre Balam na khama e Balak wẹẹ, “Mudia ke emwi izọ ẹse ruẹ vbe emwa, mẹ ra ya ghe de ghẹ Nọyaẹnmwa gha bu mwẹ rre. I gha tama ruẹn emwi ne ọ rhirhi a mu ma mwẹ.” Ọ re irẹn ọkpa na gha rrie uhunmwu oke.

⁴ Osanobua keghi do vba ẹre. E Balam keghi khama rẹn wẹẹ, “I bọlọ nene aka ihinrọn nẹ, I keghi vbe ya ẹkhuia ẹmila ọkpa ke ogho ọkpa zọ ese vbe ọkpọkpa vbọ.”

⁵ E Nọyaẹnmwa keghi gie Balam werriegbe bu e Balak gha khian ne ọ ya tama rẹn uhunmwu ne irẹn gie.

⁶ Ẹre irẹn na gha khian, ọ keghi do vba e Balak vbe ọ ye mudia ke ese na giẹn uan ọghe ọe ke ẹe kevbe avbe ọkaolotu e Moab hia.

⁷ E Balam keghi guan ẹmwẹ akhasẹ na wẹẹ, “E Balak ne ọba e Moab ọ re ọ rhie mwẹ ke Siria ne ẹvbo oke ne odẹ ahọ gha dee. Ọ keghi kha wẹẹ, ‘Larre do gun mwẹ guan, fi avbe emwa Izrẹl unu.’

⁸ Vbia ra sẹtin fi ne Osanobua ma fi ẹre unu hẹ ra ne I wẹ ne ọ zẹ ẹbe vbe Osanobua ma kha vberriọ?

⁹ I gha ke uhunmwu oke ni yo bẹghe iran. I gha sẹtin ke uhunmwu oke ne giẹre rhie aro lele iran. Ẹvbo ne irẹn ọkpa vbe ẹhi ẹre rrọ iran khin. Irẹnrẹn i ghẹ afiangbe iran sẹ avbe ẹvbo ọvbehe.

¹⁰ Uniẹn ivbi Izrẹl ye vbe ikpekhae ne otọ. Iran bun gbe, ẹ i gia ka. Gie ufomwẹ ẹdẹ agbọn mwẹ yevbe ọghe ọkpa vbe emwa Osanobua gun mwẹ wu vbe ọfumwegbe zẹ vbe ọmwa ẹmwata.”

¹¹ Ẹre Balak na tama e Balam wẹẹ, “Vbua ru mwẹ hẹ na yi? Te I tie ruẹ rri emwa ne u do fi avbe eghian mwẹ unu, sokpan te u ghi na erhunmwu ne iran na.”

¹² Rẹn keghi wanniẹn wẹẹ, “Ẹmwẹ ne Nọyaẹnmwa wẹ ne I ta ọkpa ọre I sẹtin ta.”

Ẹmwẹ Akhasẹ Ne Ogieva Ọghe Balam

¹³ Ẹre Balak na khama e Balam wẹẹ, “Lele mwẹ gha die ihe ọvbehe ne u gha na sẹtin bẹghe eso vbe uwu iran ne ivbi Izrẹl kẹkan. U ghi ke evba fi iran unu mẹ.”

¹⁴ Ọ keghi rhie ẹre gha rrie ako oha ọghe Zofin vbe uhunmwu oke Pisga. Ọ keghi vbe gba aka ihinrọn vbe evba, ọ na ya ẹkhuia ẹmila ọkpa ke ogho ọkpa zọ ese vbe uhunmwu ọkpọkpa vbọ.

¹⁵ E Balam keghi khama Balak wẹẹ, “Mudia ke ese na giẹn uan ruẹn vbe emwa, mẹ ra ya vba e Nọyaẹnmwa vbe odẹ.”

¹⁶ E Nọyaẹnmwa keghi do vba e Balam, ọ na tama rẹn ẹmwẹ ne ọ gha ta, ọ na gie ẹe werriegbe bu e Balak ne ọ ya tama rẹn uhunmwu ne irẹn gie.

¹⁷ Ọ re ọ na werriegbe, ọ keghi do vba e Balak vbe ọ ye mudia ke ese na giẹn uan ọghe ọe ke ẹe kevbe avbe ọkaolotu ivbi e Moab. E Balak keghi nọ rẹn vbene Nọyaẹnmwa kha hẹ,

¹⁸ ẹre Balam na guan ẹmwẹ akhasẹ ọre: “Larre, Balak ne ovbi Zipọ, do danmwẹ ehọ ẹmwẹ ne I ra ta.

¹⁹ Osanobua i ye vbe emwa ne agbọn, ni ta ohoghe; rẹn i re ọmwa kẹkan ne ọ gbe yo gbe rre. Emwi ne ọ rhirhi ta, ọre ọ ru; ọ gha guan, a ghi ru ẹe.

²⁰ Erhunmwu ọre a we mwẹ na Osa gha na erhunmwu nẹ, mẹ i sẹtin kie ẹre werriegbe. Iran wewẹ wẹ irẹn ọre ọba iran.

²¹ I miẹn ọẹn nẹ wẹ ẹbe ra ọkhọ ẹ i rre ivbi Izrẹl ẹdẹ na khuẹ, e Nọyaẹnmwa ne Osanobua iran rrọ ne iran.

²² Osanobua viọ iran ke otọ Igipt ladian nẹ; ọ kevbe gbinna ne iran zẹ vbe ede,

²³ Ẹbo awan ọkpa i rrọ, ra azẹn, ne a gha sẹtin ya ru ẹvbo ivbi Izrẹl emwi emwa gha ta vbe ekpa Izrẹl wẹẹ, ‘U ma miẹn emwi ne Osa ru ne iran.’

²⁴ Te ẹvbo Izrẹl yevbe oduma ne ọ mwẹ ẹtin, ọ ma gbe yanghan re nẹ, ẹ i hẹwẹ, ọ te wọn esagiẹn iran ne irẹn gbele.”

²⁵ Ẹre Balak na tama e Balam wẹẹ, “U ma fi ivbi Izrẹl unu, ghẹ ghi vbe na erhunmwu ne iran khekherriọ!”

²⁶ E Balam keghi wanniẹn wẹẹ, “Mẹ ma tama ruẹn ra wẹ emwi ne Nọyaẹnmwa tama mwẹ hia ọre I khian ru?”

Ẹmwẹ Akhasẹ Ne Ogieha Ọghe Balam

²⁷ E Balak keghi kha wẹẹ, “Lele mwẹ gha dee ne I rhie ruẹ gha rrie ihe ọvbehe. U gha ghe, Osanobua gha kue ne u fi iran unu mẹ ke evba gha khian.”

²⁸ Ẹre ọ na rhie Balam gha rrie Uhunmwu oke Peọ ne a ke ghe ato.

²⁹ E Balam keghi tama rẹn wẹẹ, “Gba aka ihinrọn mẹ vbe emwana ne u vbe viọ ẹkhuia ẹmila ihinrọn kevbe ogho ihinrọn gun mwẹ.”

³⁰ E Balak keghi ru vbene a tama rẹn. Ọ keghi ya ẹkhuia ẹmila ọkpa zọ ese ye aka ọkpọkpa.