Nọmbas 21 - Edo Bible (E Baibol Ẹdo) Version 1996

A Khọn Emwa Kenan Miotọ

¹ Ugbẹn vbe Arad ne ọba ne ọ rre odẹ ekẹn Kenan ghi họn ighẹ ivbi Izrẹl la odẹ Atarim dee, ọ keghi mu igbinna bu iran, ọ na munọ eso vbọ.

² Ẹre ivbi Izrẹl na do yan emwi ne Nọyaẹnmwa wẹẹ, “U gha gie ima khọn iran na miẹn otọ, ma gha ya iran kevbe ẹvbo iran fi ohan nuẹn, ma ghi fuẹn iran uan.”

³ E Nọyaẹnmwa keghi họn ọghe iran, ọ keghi yi iran obọ ne iran ya khọn Kenan mu otọ. Ivbi Izrẹl keghi fuẹn iran kevbe ẹvbo iran uan. Iran kegha tie evba nii Họma.

Ẹyẹn Ne A Ya Oze Ru

⁴ Ivbi Izrẹl keghi la odẹ Ẹzẹ Irunmwu kpahin oke Họ rre, ne iran miẹn ehe na fian oha ye Idọm obọ gberra. Sokpan iran ghi sẹ odẹ, emwa ma ghi sẹtin zin egbe.

⁵ Iran kegha filo unu gie Osanobua kevbe Mosis, iran kegha gui ẹzọ uwu unu wẹẹ, “Vbọzẹ ne uwa na viọ ima ke Igipt gha die uwu ato yi ne ima do wulo vbe ehe ne evbare i ye, amẹ i rrọ. Ẹtin ima ghi sẹ ẹmwẹ evbare oya na ọvbehe.”

⁶ Ẹre Nọyaẹnmwa na gie ẹyẹn ne ọ mwẹ obi la uwu ẹbu iran, ẹyẹn keghi salọ nibun vbe uwu ivbi Izrẹl, iran keghi wulo.

⁷ Emwa ni keghi bu e Mosis gha dee, iran tama rẹn wẹẹ, “Ma ru orukhọ ne ima na gha filo unu gie Nọyaẹnmwa kevbe uwẹ. Banbanna nian, na erhunmwu ghe Nọyaẹnmwa ne ọ viọ avbe ẹyẹn kpao.” Ẹre Mosis na na erhunmwu ne emwa nii.

⁸ Ẹre Nọyaẹnmwa na tama e Mosis ne ọ ya oze ru ẹyẹn mu yan ọkpọ ne ọmwa ne ẹyẹn a rhirhi sa sẹtin gha ghe ẹre ne ọ vbe fe.

⁹ Ẹre Mosis na ya oze ru ẹyẹn ọ na mu ẹẹn rrọ yan ọkpọ. Ọmwaikọmwa ne ẹyẹn sae ghi ghe ẹyẹn oze ni, ọ ghi fe.

Iran Khian Gha rrie Iya Avbe Ivbi E Moab

¹⁰ Ivbi Izrẹl keghi si okhian, iran ke ya yakọ vbe Obẹt.

¹¹ Iran ghi kpa vbe evba rre, iran keghi ya bu agọ ye Abarim ne ọ rẹn khuan vbe uwu ẹgbo ne ọ rre odẹ ehe ne otọe Moab sẹe vbe odẹ ahọ.

¹² Iran keghi si kpao vba, iran na ya bu agọ ye Iya Zẹrẹd.

¹³ Iran ghi kpao vbe evba iran keghi bu agọ ye odẹ okuọ Ẹzẹ Anọn, vbe ẹgbo ne ọ ya sẹ otọ Amọri (Anọn ke ghi re uwu e Moab kevbe Amọri.)

¹⁴ Ọnii ọ si ẹe ne Ebe Okuo Ọghe Nọyaẹnmwa na guan kan “emwi ne I ru vbe ẹvbo Waheb vbe ikinkin e Sufa, kevbe avbe iya, Ẹzẹ Anọn,

¹⁵ kevbe ehanhan iya ne ọ ya sẹ ẹvbo Ar kevbe laghe ehe ne Moab sẹe.”

¹⁶ Evba nii ọre iran ke kpao gha rrie ehe ne a tie ẹre Uhae, ehe ne Nọyaẹnmwa na tama e Mosis wẹẹ, “Sii avbe emwa ni koko, I gha sa amẹ ne iran wọn.”

¹⁷ Ẹghẹ nii ivbi Izrẹl na so ihuan na: “Uhae, rhie amẹ ruẹn ladian; ma gha so ihuan gbe ọbokhian nẹ ẹn.

¹⁸ Uhae ne avbe ivbi ọba fian ẹn kevbe avbe ọkaolotu emwa nii iran ye ada ọba fian ẹn kevbe ọkpọ erhan utuaotọ ọghe iran.” Iran keghi ke uwu ẹgbo kpao gha rrie Matana,

¹⁹ iran keghi ke evba kpao gha rrie Nahaliẹl, iran keghi vbe ke Nahaliẹl kpao gha rrie Bamot.

²⁰ Iran keghi ke Bamot kpao gha rrie iya ne ọ rre otọe Moab vbe ototọ Oke Pisga ne a ke ghe ato.

A Khọn Ọba Saihọn Kevbe Ọba Ọg Miotọ

²¹ Ẹre ivbi Izrẹl na gie uhunmwu gie Saihọn ne ọba ivbi Amọri wẹẹ:

²² “Gie ima la otọ ruẹ gberra. Ke ima kevbe emwirri mwa, ne ọ ra fian odẹ rra la uwu oha ra ugbo emwi okọ uwa ẹ i rrọ, ma i ra sa wọn vbe uhae rua. Adesẹ odẹ ma ra gha lele khian ma te do lahin otọe rua rre.”

²³ Sokpan, e Saihọn ma kue ne ivbi Izrẹl la otọ ẹvbo ẹre gberra. Ọ keghi gu ivbi Izrẹl gbinna.

²⁴ Sokpan ivbi Izrẹl keghi gbele nibun vbe uwu iran ne eghian nii vbe okuo, iran na yin otọe iran, ke Ẹzẹ Anọn ne ọ rre odẹ okuọ ọghe Jabọk ya sẹ Jazẹ vbe ehe ne otọe Amọn sẹe.

²⁵ Ẹre ivbi Izrẹl na khọnmiotọ ẹvbo Amọn hia ya sẹ Hesbọn kevbe ẹvbo ni lẹga ẹre hia, iran keghi yin ẹnrẹn.

²⁶ E Hesbọn ọ re ọ gha re igiogbe ẹvbo ọghe ivbi Amọri ne ọba Saihọn, rẹn na ọ re ọ gu ọmwa ne ọ te ka re ọba Moab gbinna, ọ na khọn miẹn ẹre otọe hia ya sẹ Ẹzẹ Anọn.

²⁷ Ọnii ọ si ẹe ne avbe ukamuka na ya ẹe sihuan wẹẹ: “Gha die Hesbọn, gha die ẹvbo ọba Saihọn! Ma ho ne a bọ ẹe ne a dọlọ rhie ẹre ye ihe.

²⁸ Vbe ẹghẹ ọkpa yi, ivbiyokuo Saihọn keghi ke Hisbọn kpao zẹ vbe erhẹn ọ keghi dunmwu Ar ne ọ rre Moab rẹnkhẹnrẹnkhẹn ọ keghi mi oke ne ọ ke odọ vbe Anọn re.

²⁹ Ọ suwa, wa ne ivbi Moab: Wa la ọrhiae rrie nẹ wa ni gho e Kemọs ẹbọ uwa keghi ya avbe emwa nii khian ni rre errọ avbe Ikhuo keghi khian oghunmwu ọba Amọri.

³⁰ Sokpan, banbanna nian, a fuẹn ivbi uniẹn iran an kevbe Hesbọn wa gha dee do se Dibọn kevbe Nasim ya sẹ Mofa vbe ọkpẹn Madeba.”

³¹ Ẹre ivbi Izrẹl na yin otọe ivbi Amọri.

³² E Mosis keghi gie emwa ne iran ya ghe vbene iran gha ya gu ẹvbo Jazẹ gbinna hẹ. Ivbi Izrẹl keghi khọn rẹn mu otọ ke ẹe kevbe ẹvbo ni lẹga ẹre. Iran keghi khulo emwa Amọri ni rre evba kua.

³³ Ivbi Izrẹl keghi werriegbe, iran keghi la odẹ Basian, Ọg ne ọba Basian keghi viọ ivbiyokuo ẹre gha dee do gu iran ginna vbe Ẹdrẹi.

³⁴ E Nọyaẹnmwa keghi tama e Mosis wẹẹ, “Ghẹ gie ohan rẹn muẹn, I gha guẹ khọnmiotọ vbe uhunmwu ẹnrẹn, emwa rẹn kevbe otọe ẹre. Ruẹe vbene u vbe ru Saihọn ne ọba Amọri vbe Hesbọn.”

³⁵ Ẹre ivbi Izrẹl na gbe Ọg, kevbe ovbi ẹre kevbe emwa ni hia vbe ne ọkpa ma na vbe ke ẹe vbo, iran na yin otọe nii.