Nọmbas 19 - Edo Bible (E Baibol Ẹdo) Version 1996

Emuẹn Ẹmila Ne Ọ Baa

¹ E Nọyaẹnmwa keghi tama e Mosis kevbe Errọn

² ne iran ru emwamwa na ne ivbi Izrẹl wẹẹ, ne iran mu ẹmila ne ọ baa ne a ma he ya winna ke ne ẹ i mwẹ okan.

³ Ne uwa mu ne Eliaza ne ohẹn. A ghi mu ẹn lahin ore agọ rre ne a sirra ẹre gbee.

⁴ Eliaza ghi rhie vbe esagiẹn ọnrẹn, ọ ghi ya ikpinhianbọ sanmwẹ ọẹn igba ihinrọn ghe odẹ Owa Ukpọn Ile,

⁵ A ghi vbe sirra ohẹn giẹn ikun aranmwẹ ni hia, ohian, kevbe efun, esagiẹn kevbe ibiẹ ọre.

⁶ Rẹn ghi rhie erhan sida, kevbe abọ hisọp kevbe ukpọn ne ọ baa, ọ ghi filẹe ku uwu erhẹn nii.

⁷ Vbe iyeke ọnii, ọ ghi ya họ ukpọn rẹn, ọ ghi mu amẹ hihiẹ ku egbe, iyeke ọnii, ọ sẹtin la uwu agọ; sokpan, awua ye rrọ ẹre egbe rhinrin ya sẹ ẹghẹ ota.

⁸ Ọmwa ne ọ ya giẹn ẹmila nii, ọ ghi vbe họ ukpọn rẹn, ọ ghi vbe hihiẹ amẹ yan egbe ẹre, sokpan rẹn ye vbe mwẹ awua ọ te ya sẹ ota.

⁹ Ẹghẹ nii, ọmwa ne awua i gue ghi ya koko emuẹn ẹmila nii, ọ ghi ya viọ ẹre ye ehe nẹ i mwẹ awua vbe a gha lahin agọ rre nẹ, a ghi sẹ ọe rae ye evba ne ivbi Izrẹl ya ẹe gha gua amẹ ne a ya khuẹ awua kua. Te a ru emwi na ne a ya kpe orukhọ kua.

¹⁰ Ọmwa ne ọ si emuẹn ni koko, ọ ghi họ ukpọn rẹn, sokpan awua ye guẹe ọ te ya sẹ ota. Emwamwa na, ọ ghe ẹdẹdẹmwẹdẹ nọ ne ivbi Izrẹl kevbe avbe erhunmwuyẹn ni rre uwu ẹbu iran.

Egbe Ne Ọ Dekan Ikun Orinmwi

¹¹ Ọmwa ne ọ yobọ kan ọmwa ne ọ wu nẹ, ghi gha re ne awua gue la ikpeedẹ ihinrọn.

¹² Ọ ghi ya ye amẹ akpehuan khuẹ egbe ẹre huan vbe ikpẹdẹ ne ogieha ke ikpẹdẹ ne ogihinrọn, rẹn keghi do gha re ne ọ huanrẹn, sokpan a deghẹ ọ ma khuẹ egbe ẹre huan vbe ikpẹdẹ ne ogihinrọn, ọ ghi gha re nọ ma huan.

¹³ Ọmwaikọmwa ne ọ yobọ kan orinmwi, ọ na ma khuẹ egbe ẹre huan, khian ne ọma huan rhunmwuda a ma he mu amẹ akpehuan ku ọre. Ọ ru Owa Ukpọn Ile Nọyaẹnmwa awua, a i ghi vbe kae ba emwa Osanobua.

¹⁴ Ọmwa gha wu vbe uwu owa ukpọn, ọmwaikọmwa ne ọ rre uwu owa ukpọn nii vbe ẹghẹ ne ọ na wu ra ọmwaikọmwa ne ọ larọ, khian ne awua gue la ikpẹdẹ ihinrọn.

¹⁵ Avbe esago ra akhe ne ẹ i mwẹ ugue ni rre uwu ẹre vbe khian ne awua ye.

¹⁶ Odẹ vbenian, ọmwaikọmwa ne ọ ya obọ kan ọmwa ne a gbua ra ne ọ wu uwu ẹhi vbe adesẹ ore, ra ọmwa ne ọ ya obọ kan ugboloko ọmwa, ra idin, ghi khian ne awua gue la ikpẹdẹ ihinrọn.

¹⁷ Egbe ama huan vbenian, a ghi zẹ emuẹn vbe ẹmila na giẹ uan ne a ya gha kpe awua kua ye akhe, a ghi sa amẹ nọfurre ba ẹre.

¹⁸ Vbe ọ ghe ne okaro, ọmwa ne awua i gue ghi rhie abọ ebe afọ, ọ ghi fiẹe ye uwu amẹ nii, ọ ghi miẹn rẹn lele owa ukpọn nii, kevbe emwi hia ni rre uwu ẹre kevbe emwa ni rre evba. Vbe ọ ghe ne ogieva, ọmwa ne awua i gue ghi miẹn amẹ nii ku ọmwa ne ọ ya obọ kan ugboloko ọmwa, ra ikun orinmwi ra idin.

¹⁹ Ọmwa nẹ i mwẹ awua ghi miẹn amẹ nii ku ọmwa ne awua gue nii vbe ikpẹdẹ ne ogieha kevbe ikpẹdẹ ne ogihinrọn. Vbe ikpẹdẹ ne ogihinrọn, ọ ghi kpẹe huan ighẹ ọmwa ni ne a miẹn wẹ ọ ghi họ ukpọn rẹn nẹ, ọ mu amẹ rhurhẹ yan egbe, ọ keghi do khian ne ẹ i ghi mwẹ awua vbe ọ ghi sẹ ẹghẹ ne ovẹn ya dero.

²⁰ Ọmwaikọmwa ne awua gue, ne ọ ma khuẹ egbe ẹre huan, awua wa ye guẹe, rhunmwuda a ma he mu amẹ akpehuan ku ọre. Ọ ru Owa Ukpọn Ile Nọyaẹnmwa awua, a i ghi vbe kae ba ivbi Osanobua.

²¹ Uhi na ghi gha rre atẹ vbe obọ uwa ẹdẹdẹmwẹdẹ. Ọmwa ne ọ miẹn rẹn kua ighẹ amẹ akpehuan, rẹn ghi vbe họ ukpọn irẹn, ọmwa ne ọ rhirhi ye obọ kan amẹ ni, awua gu ẹe rhinrin ya sẹ ota.

²² Emwikemwi ne ọmwa ne awua gue ye obọ kan, vbe khian ne awua ye, ọmwaikọmwa ne ọ vbe ya obọ kan rẹn khian ne awua gue ya sẹ ota.