Nọmbas 12 - Edo Bible (E Baibol Ẹdo) Version 1996

A Rri E Miriam Oya

¹ E Mosis keghi rhie ovbi ẹvbo Kusi ọkpa rọnmwẹ, ọ re Miriam kevbe Errọn na gbe odan yọ.

² Iran keghi kha wẹẹ, “E Mosis ọkpa ọ re Nọyaẹnmwa gie ẹre uhunmwu rre ra? Ẹ i vbe gie ima uhunmwu rre?” E Nọyaẹnmwa keghi họn ẹmwẹ ne iran tae

³ (E Mosis keghi re ọmwa ne ọ mu egbe rriotọ sẹ emwa hia ni rre agbọn na.)

⁴ Vbe udomwurri, e Nọyaẹnmwa keghi tama e Mosis, Errọn kevbe Miriam wẹẹ, “I ho ne uwa eheha gha die uwu Owa Ukpọn Ile.” Iran na gha khian,

⁵ ẹre Nọyaẹnmwa na nana orre okuku tuorre, ọ na mudia ye onurho Owa Ukpọn. ọ keghi da tie wẹẹ, “Errọn! Miriam!” Iran eveva keghi zẹ owẹ ghe odaro.

⁶ E Nọyaẹnmwa keghi kha wẹẹ, “Banbanna nian, danmwehọ ẹmwẹ ne I ra ta. A gha miẹn ighẹ akhasẹ rre uwu uwa, mẹ ghi rhie egbe mwẹ ma rẹn vbe umian, I ghi vbe gu iran guan vbe imina.

⁷ Sokpan I gha gue Mosis ne ọguọmwadia mwẹ guan, ọ lughaẹn. I rhie ẹre ye ne ọ gbe aro ghe izrẹl ne emwa mwẹ nẹ.

⁸ Rhunmwuda onii ọ re I na gu ẹe guan vbe ghe aro mwẹ ghe aro uẹ, vbe ne a gbẹe ẹho, ighẹ ẹ i re itan ne a kpa, uhin ighẹ rẹn deghẹ a kpa mwẹ nẹ! Vbọzẹ ne ohan na gie uwa talọ ku e Mosis ne ọguọmwadia mwẹ?”

⁹ Ohu iran keghi mu e Nọyaẹnmwa vbe ọ kpa hin ehe ne iran ye rre.

¹⁰ Ẹre okuku nii na si hin Owa Ukpọn nii rre, Emianmwẹ ne ọ sẹtin la ọmwa ọvbehe egbe keghi hihiẹ yan ikpakpa egbe Miriam ọ na do gha fua vbe isonorhọ, Errọn keghi ghe ẹre ọ keghi miẹn wẹ emianmwẹ wa gba ẹre egbe.

¹¹ Ọ keghi tama e Mosis wẹẹ, “Lahọ enọwanrẹn, ghẹ gie ima rrioya ye orukhọ akpa ne ima ru.

¹² Ghẹ gie ẹe do yevbe emwi ne a biẹe ne ọ wu ye agbọn, vbe ne asefẹn ọkpa vbe ikpakpa egbe ẹre na khian ne emwi re.”

¹³ Ẹre Mosis na datu tie Nọyaẹnmwa wẹẹ, “Osanobua, mu ẹre egbe rran.”

¹⁴ E Nọyaẹnmwa keghi wanniẹn wẹẹ, “Akpawẹ te erha ẹe ghi tu asẹn ye ọre aro vbo, ẹre te ọ gha ziengbe efaa ẹre la ikpẹdẹ ihinrọn. Rhunmwuda ọnii, wa rhie ẹre hin agọ rre la uzọla ọkpa, vbe iyeke ọnii, a sẹtin rhie ẹre werriegbe rre.”

¹⁵ A keghi rhie Miriam hin agọ rre la ikpẹdẹ ihinrọn. Emwa nii ma vbe si kpao a te do rhie ẹre werriegbe rre.

¹⁶ Ẹre iran na kpao vbe Hazẹrot ya gbe agọ ye Paran.