Nehimaia 8 - Edo Bible (E Baibol Ẹdo) Version 1996

Ẹzra Tie Uhi Ma Emwa Nii

¹ Vbe ọ ghi te sẹ uki ne ogihinrọn, ivbi Izrẹl hia keghi gbe ẹkun sotọ vbe ẹvbo edọmwadẹ ọghọe. vbe uki ne okaro ọghe, uki ni, iran hia ke do si egbe koko vbe Jerusalẹm, vbe ehe ne otọe na vbe aro vbe uwu Urho Amẹ. Iran ke wẹ ne Ẹzra ne ohẹn kevbe ne ọ rẹn uhi ne Nọyaẹnmwa rhie la obọ e Mosis gie ivbi Izrẹl ne ọ mu ebe nene uhi re.

² Ẹre Ẹzra ghi na mu nene ebe gha die ehe ne iran hia si egbe koko yi ikpia, ikhuo kevbe ibiẹka ni gha wan sẹ nẹ ne ọ gha na rẹn emwi ne a guan yan.

³ Evba nii ọ re ọ na ke owiẹ ya tie ebe nii ma iran ya sẹ ogiavan, iran hia ke wa gha kakabọ danmwehọ ẹre.

⁴ Ẹzra keghi mudia yan ekpatako ne a kan yo ghe ukhunmwu khẹ emwi na. Avbe ikpia na keghi mudia ye ọre oberhọmwa: e Matitaia, e Siẹma, Anaia, Uraia, e Hilkaia kevbe Maaseia. Iran na kevbe mudia ye ọre obọ iye ọmwa: e Pedaia, e Misiaẹl, e Malkija, e Hasium, e Hasbadana, e Zẹkaraia kevbe Mẹsiulam.

⁵ Ehe ne Ẹzra na mudia yan ekpatako nii ne ọ yo sẹ iran hia, iran keghi tan aro yọ ọre egbe. Ọ ghi wa we ebe nii ọwarọkpa, ehia keghi wa kpaegbe mudia.

⁶ Ẹzra keghi kha wẹẹ, “Wa rho e Nọyaẹnmwa, ne Osanobua nọkhua!” Emwa ni hia keghi viọ obọ da odukhunmwu, iran keghi kha wẹẹ, “Isẹ!” Iran na diguẹ gae, vbe ne iran na viọ aro rhu otọ.

⁷ Iyekọni, iran keghi kpaegbe, iran na mudia ye ihẹ iran, avbe Livai keghi rhan otọ nene Uhi ma iran: e Jesua, e Bani, e Siẹrebia, e Jamin, Akub, e Siabetai, e Hodaia, e Maaseia, e Kelita, Azaraia, e Jozabad, e Hanan, kevbe Pelaia.

⁸ Iran keghi zẹ edu ẹre ladian iran na vbe rhan otọ ẹre zẹ vbene iran gha na rẹn otọ ẹre ighẹ emwa nii.

⁹ Iran ghi họn emwi ne Uhi nọ rẹn, ọ keghi da iran sẹrriọ wẹ iran na suẹn gha viẹ. Ẹre Nehimaia ne ne ọkhaemwisẹ, Ẹzra ne ohẹn kevbe ne ọ rẹn nene Uhi, kevbe avbe Livai ni gha rhan otọ nene Uhi ma emwa nii, keghi tama iran wẹẹ, “Ẹdẹnẹrẹ na, ẹdẹ nọhuanrẹn nọ ne Nọyaẹnmwa ne Osanobua uwa rhunmwuda ọnii, wa ghẹ khiẹ ra ne uwa vbe gha viẹ.

¹⁰ Banbanna nian, wa gha rrie owa ne uwa rri evbare esi, wa fian vbe evbare uwa ne iran ne ẹ i mwẹ, ne uwa vbe sa ne iran vbe ayọn uwa. Ẹdẹ nọhuanrẹn ọ re ẹrẹ khin ne Nọyaẹnmwa rhunmwuda ọnii, wa ghẹ khiẹ. Oghọghọ ne Nọyaẹnmwa, rhie ne uwa gha ya uwa wegbe.”

¹¹ Avbe Livai keghi la uwu ẹbu iran, iran na gha bọ iran, iran na gha tama iran wẹ ne iran ghẹ khiẹ vbe ẹdẹ nọhuanrẹn vberriọ.

¹² Rhunmwuda ọnii, emwa ni hia ke gha rrie owa. Iran na ya re, iran na da vbe ẹko rhiẹnrhiẹnmwẹ, iran na ghae ne emwa ọvbehe vbe emwi ne iran mwẹ rhunmwuda, emwi ne a tie ma iran, la iran ehọ.

Emwiukpo Irhu

¹³ Vbe ẹdẹ ne ọ lele ẹe, avbe ekaẹgbẹe dọmwadẹ ẹwae, deba avbe ohẹn keghi bu Ẹzra gha khian ne iran ya ruẹ vbene Uhi kha re.

¹⁴ Iran keghi miẹn wẹ, Uhi ne Nọyaẹnmwa rhie la obọ e Mosis rre tae wẹ ne ivbi Izrẹl gha gba irhu dia vbe ẹghẹ Emwiukpo Irhu.

¹⁵ Rhunmwuda ọnii, iran ke yi uhi na wẹ ne a ya tae ma emwa ni rre Jerusalẹm ke avbe okpẹvbo ke ore nekhua hia nekpa wẹẹ, “Wa gha rrie avbe oke ya giagia ewanmwẹ, ebe ẹgogo, orriema kevbe ebe ne a ya bọ owa, ne uwa do gbe irhu zẹ vbene a gbẹnnẹ ọẹn ye ebe Uhi.”

¹⁶ Rhunmwuda ọnii, avbe emwa ni keghi gele ya giagia ebe, iran na do gbe irhu yan owa iran kevbe ore iran, kevbe ore Ọgua Osa kevbe ughe ẹvbo vbe ọkpẹn Urho Amẹ kevbe Urho Ifreim.

¹⁷ Iran hia fẹẹrẹ ni ke iwe rre keghi gbe irhu dia, okaro ne a he ya ruẹe ọ re ọ na khin ke ẹghẹ Jọsua ne ovbi e Nọn gha dee. Egbe keghi wa gha mu iran hia, iran na gha ghọghọ.

¹⁸ Ke ikpẹdẹ ne okaro ọghe emwiukpo ni kpao ya sẹ ikpẹdẹ ne okiekie, iran kegha fian tie vbe ebe Uhi Osanobua ni ẹdẹgbegbe. Iran keghi ru emwiukpo nii la ikpẹdẹ ihinrọn, vbe ikpẹdẹ ne ogierẹnrẹn, iran keghi do ugie ne a ya mu ẹẹn ye otọ zẹ vbene Uhi khare.