Nahum 3 - Edo Bible (E Baibol Ẹdo) Version 1996

¹ Ọghọe fo ighe ẹvbo ọhọn ohoghe ne izigha nii, ọ vuọn ne ẹfe ne a gha fu hẹ gha rrie.

² Gha họn vbene asan tu hẹ, owogho owẹ imọto, igiawẹ ẹsin ni vbọlọ ghe ukhunmwu edobidokpannọ ọghe ikẹkẹ okuo!

³ Iran ni hin ẹsin vin ghe odaro umozo gha filo usanna kua, asoro gha fi wainwain, a silo orinmwi yan egbe, ikun orinmwi ne a i sẹtin ka emwa gha rrua owẹ vbe egbe iran.

⁴ A gha rri ọre oya nian ighe e Ninevi ne ọ kẹkẹẹ ua Ọ ya ose silo avbe uhunmwu ẹvbo kẹ egbe. Ọ keghi ya iran khian eviẹn.

⁵ E Nọyaẹnmwa ne Oghodua khare wẹẹ, “I gha rriọ oya, Ninevi, I gha bannọ ọn uan, I ghi vbe gie avbe uhunmwu ẹvbo miẹn ọn, iran gha miẹn ọn vbe uwu emwiekhue ruẹ.

⁶ I gha ru uẹ vbe emwi osọnnọ I ghi ya iku gue ruẹ mu otọ emwa gha yan unu an gha ghe ruẹ vbe ohan nọkhua.

⁷ Emwa ni bẹghe ruẹ hia gha lẹ werriegbe. Iran ghi kha wẹẹ, ‘Itowa ọre Ninevi ghi khin! De ọmwa ne ọ gha tohan rẹn? De ọmwa ne ọ gha ho ne ọ fu ẹre ẹko rre.’ ”

⁸ E Ninevi, wẹ vbe maa sẹ Tebis ne igiogbẹ Igipt nian ra? Rẹn vbe gha mwẹ ẹzẹ ne ọ degue ẹre. E Naẹl ọ re ọ gha re ogba ne a gba ga ẹre.

⁹ Rẹn ọ re ọ gha kha yan e Sudan kevbe Igipt, ẹtin ẹnrẹn ma vbe gha mwẹ khian sẹ evba. Te Libya ye egbe kọ ẹe.

¹⁰ Sevba te a ye viọ Tebis gha rrie iwe. Abọ idunmwu hia ọ re a na wa gha gbele ivbi iran la ẹrinmwi. A ye ghan rro emwa rẹn ni hin usi viọ kpao, a keghi ghaa iran ne emwa ni viọ iran oghunmwu.

¹¹ E Ninevi, wẹ tobọ ruẹ gha vbe zurọ ezurọ ọmwa ne ayọn gbe! We tobọ ruẹ gha vbe hia ne u lẹ eghian ruẹn fe.

¹² Avbe ogba ne u gba ga egbe hia gha ye vbe erhan ohọ ne ọmọ vboo ye ọ re uhunmwu. U gha rueghe erhan rẹn, ọmọ rẹn ghi wa de ye uẹ unu zẹẹ.

¹³ Avbe ivbiyokuo ruẹ yevbe ikhuo, ẹvbo ruẹ keghi khian ne ẹ i ghi mwẹ ogba ne a gba ga ẹre, vbe odaro avbe eghian ruẹn. Erhẹn gha giẹn ogba ne a mu gbe onurho ruẹ.

¹⁴ Sa amẹ ye otọ, ne u mu egbe khẹ okuo ne ọ ra ghae ga ruẹ. Vbe ya si avbe ogba ne u gba ga egbe tua. Rri ekẹn ya ru ibiriki, ne u vbe viọ avbe ibiriki nii u mannọẹn mu egbe ye otọ.

¹⁵ Emwi ne ọ rhirhi a khọn ruẹn, u ru, te a gha ye giẹn ruẹn uan vbe okuo, ne uwu. Te a ra wa gbe uẹ ogbefo zẹ vbe emwiokọ ne irhiso re. Te uwa vbe gha muan vbe irhiso.

¹⁶ Avbe ọduẹki ne u biẹlẹe bun sẹ avbe orhọnmwẹ ni rre iso, sokpan, banbanna nian, a ho ehia bẹkun, zẹ vbe irhiso ni rhan ifuẹn iran, iran keghi tinnọ gha rrie.

¹⁷ Avbe ekhaẹmwẹ ruẹn ye vbe irhiso ni mama lele ekẹn vbe ẹdẹ ne oni fi. Sokpan, ugbẹn vbe ovẹn ghi yan rre, iran tinnọ kua, a ma ghi vbe rẹn ehe ne iran lae.

¹⁸ Ọgbaisi Asiria, avbe gọvina ruẹn wulo nẹ, avbe emwa ni hin usi ruẹ vbe vbiẹ ovbe ne a i ghi na rhiọrre. A zagha emwa ruẹn hia lele uhunmwu oke ni yo, a ma miẹn ọmwa ne ọ gha ghi viọ iran gha die owa.

¹⁹ Ẹwẹn ruẹn i mwẹ ukhunmwu, a i vbe sẹtin kpe ẹwẹn ruẹn ne ọ rrie. Emwa hia ni họẹn ighe a fuẹn ruẹn uan, gha kpe obọ ne oghọghọ, ọmwa ne uyinmwẹ ekhọe dan ruẹn ne ẹ i fo la ban rrọ ra?