Matiu 21 - Edo Bible (E Baibol Ẹdo) Version 1996

Ọbọbọ I Ru Nẹ Ne A Si La E Jerusalẹm

¹ Iran ghi bu Jerusalẹm iran keghi do sẹ Bẹtfag vbe Oke Ọliv. Evba ọre Jesu ke gie eva vbe uwu avbe erhuanegbe ẹre ke odaro.

² Ọ tama iran wẹẹ, “Wa gha rrie ẹvbo ne ọ rre odaro uwa na. Wa gha miẹn vbe ọwarọkpa ekẹtẹkẹtẹ ne a dere ke ẹe kevbe ovbi ẹre. Wa rhan iran viọ bu mwẹ gha dee.

³ Ọmwa ne ọ rhirhi gu uwa guan, wa tama rẹn wẹ, ‘Nọyaẹnmwa mwẹ emwi ne ọ ra ya iran ru.’ Ọ gha gie iran gha dee ọwarọkpa.”

⁴ Ọna sunu ne a ya mu ẹmwẹ ne akhasẹ tae sẹ wẹẹ:

⁵ “Wa khama Zaiọn ne okpẹvbo, ọba ruẹ bu ruẹ dee nian. Ọmẹhẹ ne ọ hin ekẹtẹkẹtẹ, ọ hin ekẹtẹkẹtẹ ne aranmwẹ ne a ya kun ihẹ ke ovbi ekẹtẹkẹtẹ ne sọguọsọguọ.”

⁶ Avbe erhuanegbe keghi gele gha khian ya ru vbene ọ gie iran.

⁷ Iran keghi mu ekẹtẹkẹtẹ nii vbe ovbi ẹre rre. Iran wa ukpọn yan iran, Jesu keghi tota yan iran.

⁸ Emwa ni bun keghi wa ukpọn iran ye odẹ, emwa ọvbehe keghi vbe giagia abọ erhan, iran wa ehia ye odẹ.

⁹ Avbe emwa ni ke odaro ne Jesu kevbe ni rre ọre odieke keghi tọn urhu mu kha wẹẹ, “Urhomwẹ nọ ne ovbi e Devid. Afiangbe Osanobua nọ ne ọmwa ne ọ dee vbe eni Nọyaẹnmwa, Uyi nọ ne Osanobua.”

¹⁰ Ugbẹn vbe Jesu ghi wa la ore Jerusalẹm, ẹvbo ni hia keghi wa mu rueghe. Emwa hia keghi nọ wẹẹ, “Gha ọ na khin?”

¹¹ Iran keghi wanniẹn wẹẹ, “Ọ na ọrọre Jesu ne akhase ovbi e Nazarẹt ne Galili.”

Jesu La Uwu Ọgua Osa

¹² Jesu keghi la uwu Ọgua Osa, ọ keghi khulo iran ni khiẹn kevbe ni dẹ ladian vbe Ọgua Osa. Ọ keghi ya eteburu iran ni rọ igho uhunmwu rhu kevbe ukhuerhe iran ni khiẹn elikhukhu.

¹³ Ọ tama iran wẹẹ, “A gbẹn ọẹn ye uwu ebe wẹẹ Osanobua khare wẹẹ, ‘Owa erhunmwu ọre a gha tie owa mwẹ?’ Sokpan wa ya ẹe khian ẹgun oyi!”

¹⁴ Avbe uke kevbe arọe keghi bu ẹre la uwu Ọgua Osa, ọ keghi sinmwi iran hia.

¹⁵ Ugbẹn vbe avbe igiohẹn kevbe iran ni ma emwa Uhi ghi miẹn emwi ọyunnuan ne ọ ru deba avbe ibiẹka nọ go kevbe ni wee vbe uwu Ọgua Osa wẹẹ, “Uyi nọ ne ovbi e Devid.”

¹⁶ Iran tama Jesu wẹẹ, “Wẹ họn ẹmwẹ ne iran ta yi?” Jesu wanniẹn tama iran wẹẹ, “I wa họn ẹsẹse. Wa ma he tie ebe ne ọ khare wẹẹ, ‘Wa ma ibiẹka kevbe emobọ ẹmwẹ urhomwẹ ne ọ gbae.’ ”

¹⁷ Jesu keghi sẹ iran rae gha rrie Bẹtani, ọ kegha rre evba vbe asọn nii hia.

Jesu Fi Erhan Ohọ Unu

¹⁸ Jesu ghi dọlegbe die ore ẹvbo vbe ẹdẹ ne ogieva, ohanmwẹ kegha gbẹe.

¹⁹ Rẹn keghi bẹghe erhan ohọ ọkpa vbe ọkpẹn odẹ. Sokpan ọ ma miẹn emwi rhọkpa vbe uhunmwu ẹnrẹn gberra ebe. Rhunmwuda ọnii Jesu tama erhan ohọ nii wẹẹ, “U i ghi dọlegbe mọ ọvbehe.” Erhan ohọ ni keghi kaka ọwarọkpa nii.

²⁰ Unu keghi yan avbe erhuanegbe vbe iran miẹn emwi na. Iran nọ rẹn wẹẹ, “Vbọzẹ ne erhan ohọ ni na wa kaka ọwarọkpa vberriọ yi?”

²¹ Jesu wanniẹn tama iran wẹẹ, “Ne I tama uwa, a deghẹ uwa yayi vbe ne a i na biro eva, wa gha sẹtin ru egbe emwi ne I ru erhan ohọ na re, vbe ẹmwata wa gha sẹtin khama oke wẹẹ, ‘Vbọ uhe ne u ya werriẹ fi uwu okun,’ ọ ghi gha ye erriọ.

²² Deghẹ wa yayi, emwi ne uwa rhirhi nọọn, ọ gha sẹ uwa obọ.”

Inọta Vbekpa Asẹ Ọghe Jesu

²³ Jesu keghi dọlegbe la Ọgua Osa, ugbẹn vbe ọ ghi ma emwa emwi, avbe igiohẹn kevbe eniwanrẹn avbe Ju bu ẹre rre do nọ rẹn wẹẹ, “De asẹ ne u mwẹ ne u ya ru avbe emwi na, gha ọ rhie asẹ nu uẹn?”

²⁴ Jesu wanniẹn tama iran, “I gha nọ uwa ọta ọkpa kẹkan wa gha rhie ewanniẹn mẹ, I gha tama uwa asẹ ne I mwẹ ne I ya ru emwi na hia.

²⁵ De ehe ne asẹ ne Jọn ya samẹ ke rre yi? Obọ Osanobua ra obọ ọmwa?” Iran kegha mu ẹmwẹ na yo mu uẹn rre wẹẹ, “Vbe a ra tae hẹ yi? Ma gha kha wẹẹ obọ Osanobua, ọ gha nọ emwi ne ọ ghi zẹ ne ima ma na ya e Jọn yi.

²⁶ Sokpan ma gha kha wẹẹ obọ ọmwa nọ, a ma rẹn emwi ne iran na gha ru rhunmwuda iran hia wa kha ighẹ akhasẹ ẹmwata ọre Jọn khin.”

²⁷ Rhunmwuda ọnii, iran wanniẹn tama Jesu wẹẹ, “Ma ma rẹn.” Rẹn kevbe tama iran wẹẹ, “Mẹ i vbe tama uwa khekherriọ asẹ ne I ya ru avbe emwi na.

Itan Emọ Ikpia Eva

²⁸ “Vbe uwa a ro ẹmwẹ na hẹ? Okpia ọkpa kegha mwẹ emọ ikpia eva. Ọ keghi ya tama nọdiọn wẹẹ, ‘Ovbi mwẹ, ya winna vbe, ugbo emwiokọ ẹrẹna.’

²⁹ Ọ wanniẹn wẹẹ, ‘I i sẹtin yo.’ Sokpan, vbe okiekie ẹre, ọ fi ekhọe werriẹ, ọ na gha khian.

³⁰ Erha iran keghi vbe ya tama nọkpa vberriọ zẹẹ. Rẹn keghi wanniẹn wẹẹ, ‘I họn ẹn evbavba.’ Sokpan ọ ma yo.

³¹ Vbe uwu iran eva na, gha ọ ru emwi ne erha ẹe ho vbọ?” Iran wanniẹn wẹẹ, “Nọdiọn nọ.” Jesu wanniẹn tama iran wẹẹ, “Ne I tama uwa, avbe iran ni koko igho uhunmwu kevbe avbe igberagia ọre ọra ka la arriọba Osanobua khẹ uwa.

³² Rhunmwuda, Jọn ne Ọsamẹ rre do ma uwa odẹ ẹmwata ne uwa gha la, wa ma ya ẹe yi. Sokpan, iran ni koko igho uhunmwu kevbe avbe igberagie keghi ya ẹe yi. Wa rhe yevbe miẹn emwi vberriọ, wa ma wẹ ne uwa fi ekhọe werriẹ vbe okiekie ne uwa do ya ẹe yi.”

Itan Iran Ni Gbe Aro Ghe Ugbo Emwiokọ

³³ Jesu keghi khama iran wẹẹ, “Wa vbe danmwehọ itan ọvbehe: okpia ọkpa rrọọ ne ọ mwẹ otọ, ọ keghi mu ẹre ugbo emwiokọ, ọ gba ogba ga ẹre, ọ keghi vbe fian okọ ne a na ru ẹdin yọọ, ọ keghi vbe bọọ owa ọbodẹ ne ọ yo yọọ, ọ keghi mu uẹn ne emwa vbe agbeghae, ọ na gha rrie ehe.

³⁴ Ọ ghi sẹ ẹghẹ ne a ya rhọ emwiorhọ, ọ keghi gie ọkpa vbe uwu eviẹn ọnrẹn ne ọ ya miẹn iran oghae ne ọse irẹn egbe vbọ viọ rre.

³⁵ Iran ni keghi munọ eviẹn ọnrẹn nii, iran mama ọkpa vbọ, iran gbe ọkpa vbọ rua fẹẹrẹ, iran keghi filo okuta gbe nọkpa.

³⁶ Okpia na keghi dọlegbe gie eviẹn ni bun sẹ ne ọ ka gie bu iran. Iran keghi wa vbe ru iran vberriọ zẹẹ.

³⁷ Vbe okiekie, ọ gie ovbi ẹre bu iran, ọ wẹẹ, ‘Ẹ i mwẹ iran ma tohan ovbi mwẹ.’

³⁸ Sokpan iran ni rre ugbo nii ghi wa bẹghe ovbi ẹre na, iran keghi wa si uma wẹẹ, ‘Ghe ovbi enọyan ugbo, wa larre ne a gbe ẹe rua ne emwi ẹnrẹn khian ọghọmwa.’

³⁹ Rhunmwuda ọnii, iran keghi mu uẹn, iran sanmwẹ ọẹn ladian vbe ugbo ni, iran keghi gbe ẹe rua.”

⁴⁰ Jesu keghi nọọn iran wẹẹ, “Nọyan ugbo gha ghi rre, vbe uwa yayi ighẹ ọ gha ru iran na hẹẹ?”

⁴¹ Iran wanniẹn wẹẹ, “Te ọ ra gbele emwa dan ni uan, ọ ghi mu ugbo ni ne emwa ọvbehe ni gha viọ emwi ne ọ sẹ irẹn egbe ne ẹn vbe ẹghẹ, vbe iran a rhọ emwiorhọ.”

⁴² Jesu tama iran wẹẹ, “Wa ma he tie emwi ne Ebe tae? “ ‘Okuta ne iran ni bọ owa he wẹ ẹ i ma ọre ọ ghi do khian a ma miẹn a i ru. Nọyaẹnmwa ọre ọ ru emwi na, emwi ne ọ yan ọmwa unu uan ọ na khin.’ ”

⁴³ Jesu keghi gbẹe wanniẹn wẹẹ, “Ne I tama uwa, a gha miẹn uwa Arriọba Osanobua, a ghi rhie ne emwa ọvbehe ni gha sẹtin mọ ọmọ ladian vbe ne ọ kei yi. [

⁴⁴ Ọmwa ne ọ de gbe okuta ni, gha guọghọ ua. Sokpan ọmwa ne okuta ni de gbe gha wa rẹnkhuan.]”

⁴⁵ Avbe igiohẹn kevbe avbe Farisi ghi họn avbe itan ne Jesu kpae na, iran rẹnrẹn ighe iran ọre ọ kha.

⁴⁶ Iran te ho ne iran mu ẹn khui, sokpan ohan avbe emwa kegha mu iran rhunmwuda iran kha nẹ ighe akhasẹ ọre Jesu khin.