Matiu 17 - Edo Bible (E Baibol Ẹdo) Version 1996

O Fi Egbe Werriẹ

¹ Ikpẹdẹ ehan ghi gberra nẹ, Jesu keghi rhie Pita kevbe etiọnrẹn Jems kevbe Jọn ọkpa ba egbe gha rrie uhunmwu oke.

² Ọ keghi sirra iran fi egbe werriẹ, aro ẹre kegha fi wain wain vbe owẹn, ukpọn rẹn keghi fuọfua vbe ukpa.

³ Erhuanegbe eha nii keghi bẹghe vbe Mosis kevbe Elaija gu Jesu guan.

⁴ Pita keghi kha wẹẹ, “Nọyaẹnmwa, ọ maa gbe ni ima na rre emwa na, a deghẹ u ho, I gha bọ eko eha ye emwa, ọkpa ọghe uwẹ, ọkpa ọghe Mosis kevbe nọkpa ọghe Elaija.”

⁵ Vbene ọ wa guan ni, okuku ne ọ fi wain wain keghi rhu gue iran, urhu ọkpa keghi ke uwu okuku nii guan ladian wẹẹ, “Ọna ọre ovbi mwẹ ne I ho ẹmwẹ ọnrẹn kevbe ne ọ ghan, wa danmwehọ ẹre.”

⁶ Ugbẹn vbe avbe erhuanegbe họn urhu na, iran keghi runran, iran dele viọ aro rhu otọ.

⁷ Jesu keghi khian bu iran rre, ọ ya obọ kan iran, ọ wẹẹ, “Wa kpaegbe, wa ghẹ gie ohan mu uwa.”

⁸ Ugbẹn vbe iran ghi tọn aro mu, iran ma ghi bẹghe ọmwa ọvbehe gberra Jesu ọkpa.

⁹ Iran ghi tuorre ke uhunmwu oke dee, Jesu tama iran wẹẹ, “Wa ghẹ ta umian ne uwa miẹn na ma ọmwa rhọkpa, a te do huẹn Ovbi Ọmwa kpao vbe orinmwi.”

¹⁰ Ẹkpo ni ọre avbe erhuanegbe na nọọn Jesu wẹẹ, “Vbọzẹ ne iran ni ma emwa Uhi na kha wẹ Elaija ọ gha ka rre?”

¹¹ Jesu wanniẹn tama iran wẹẹ, “Ẹmwata Elaija ogha ka re ne ọ do mwamwa emwi hia ye otọ.

¹² Sokpan, ne I tama uwa wẹẹ, Elaija rre nẹ, Sokpan emwa ma rẹn ọnrẹn, iran keghi ruẹe vbe ne ọ khọn iran. Erriọ zẹ iran ra vbe ru Ovbi Ọmwa khọọ.”

¹³ Avbe erhuanegbe keghi do rẹn ighe Jọn ne Ọsamẹ ọre ọ kha.

Jesu Sinmwi Ọvbokhan Okpia Ne Ọ Mwẹ Orhiọn Esu

¹⁴ Iran ghi ke odọ rre do vba emwa ni gbe ẹbu ye evba, okpia ọkpa keghi bu Jesu gha dee, ọ diguẹ nẹẹn ọ wẹẹ,

¹⁵ “Lahọ tohan ovbi mwẹ nokpia! Ọwa ọre ọ mu ẹn, ẹghẹ hia ọre ọ ya mu ẹn fi uwu erhẹn kevbe uwu amẹ.

¹⁶ I rhie ẹre bu avbe erhuanegbe gha dee sokpan iran ma sẹtin sinmwi ẹn.”

¹⁷ Jesu keghi wanniẹn wẹẹ, “Wa ne ẹ i mwẹ iyayi kevbe ni vbe ba odẹ ku! Vbe i a gha kpee sẹ hẹ vbe ehe ne uwa ye? Vbe i a gha ziengbe ne uwa kpee sẹ hẹ? Rhie ne ọvbokhan gun mwẹ vbe emwa.”

¹⁸ Jesu keghi khu orhiọn esu ni ladian, egbe na wa rran ọmọ nii vbe ọwarọkpa.

¹⁹ Avbe erhuanegbe keghi bu Jesu rre vbe ẹkhokho, iran nọ rẹn wẹẹ, “Vbọzẹ ne ima ma na sẹtin khu orhiọn esu ni ladian yi?” [

²⁰ Jesu wanniẹn iran ẹmwẹ wẹẹ, “Rhunmwuda ighe iyayi uwa ma sẹ. Deghẹ wa gele mwẹ iyayi ne ọ kpọlọ sẹ vbe ikpẹ itaba, wa gha sẹtin tama oke na wẹẹ, ‘Kpao vbe emwa gha rrie odọ.’ Ọ ghi gele kpao. A i miẹn emwi ne ẹ i gie uwa ru.

²¹ Sokpan erhunmwu kevbe aguẹ ọkpa ọre ọ sẹtin khu egbe ọna ladian, emwi ọvbehe i rrọọ ne ọ gha sẹtin.]”

Jesu Vbe Dọlegbe Guan Kan Ẹmwẹ Uwu Ẹre

²² Ugbẹn vbe erhuanegbe hia ghi si egbe koko vbe Galili, Jesu tama iran wẹẹ, “Vbe ọ ma he kpẹe wan, a gha si Ovbi Ọmwa gie iran ne emwa.

²³ Iran gha gbe ẹe rua, sokpan, vbe ikpẹdẹ ne ogieha, ọ gha rhiọrre.” Ẹmwẹ na keghi gbe iran ne erhuanegbe egbe.

Igho Ọgua Osa Ne A Hae

²⁴ Ugbẹn vbe Jesu kevbe avbe erhuanegbe ẹre ghi sẹ Kapaniọn, iran ni koko igho Ọgua Osa keghi bu Pita gha dee, iran nọ ẹnrẹn wẹẹ “Arowa uwa zẹ igho Ọgua Osa yi?”

²⁵ Pita wanniẹn tama iran wẹẹ, “Vbọ ghi zẹ.” Ugbẹn vbe Pita ghi la uwu owa, Jesu keghi ka mu ẹmwẹ ni rre, ọ wẹẹ, “Saimọn, vbe uwẹ ro ẹmwẹ na hẹẹ? De emwa ni zẹ igho uhunmwu gie avbe ọba agbọn na yi? Emotọ ra avbe ọrriọvbe?”

²⁶ Pita wanniẹn tama rẹn wẹ, “Avbe ọrriọvbe.” Jesu wanniẹn tama rẹn wẹẹ, “Ọnii rhie ma ighe avbe emotọ i zẹ.

²⁷ I ma ho ne a zẹdẹ ho iran na ẹmwẹ. Rhunmwuda ọnii, gha rrie odighi ne u fi ẹghọe fi ọ, ehẹn ne ọ rhirhi ka mu, si ẹe ladian. U gha ghe unu ẹnrẹn, u gha miẹn igho ne ọ gha sẹ uẹ ya zẹ ọghomwẹ kevbe ọghe uwa, rhie gha khian, ya ya zẹ igho uhunmwu ima ne iran.”