Levitikọs 7 - Edo Bible (E Baibol Ẹdo) Version 1996

Izẹ Ọhẹ A Hae Werriegbe

¹ “Emwamwa ọghe vbene a gha ya gha ha emwi werriegbe hẹ ọre ena khin. Izọese ne ọ huansẹ ẹsẹse nọ.

² Aranmwẹ ne a ya zọ ese na, odẹ okuọ ọghe aka ọre a gha na gbe ẹe, ehe ne a na gbele aranmwẹ ese na giẹn uan, a ghi rhurhẹ esagiẹn ọnrẹn ye igienenẹ ọghe aka.

³ A ghi viọ ẹvbi ẹre hia ladian a ghi ya ẹe zẹ ọhẹ ye uhunmwu aka, ẹrhunrhun ẹnrẹn ne ọ ti, ẹvbi ne ọ rhu lele ẹkpokhurhu ẹre,

⁴ ihẹnmwẹ ọnrẹn kevbe ẹvbi nii rri ọe, kevbe ititi ẹvbi nii rre udu ẹre.

⁵ Ohẹn ghi giẹn ẹvbi na hia vbe aka zẹ vbe izẹ ọhẹ evbare gie Nọyaẹnmwa. Izẹ ọhẹ a hae werriegbe nọ.

⁶ Ọmọ okpia ne ọ rhirhi gha re ovbi ohẹn sẹtin rri ọe, a ghi rri ọe vbe ehe ne awua i ye, rhunmwuda emwi ne ọ mobọ huan nọ.

⁷ “Emwamwa ọkpa ọre ọ rre ẹmwẹ izẹọhẹ orukhọ kevbe izẹọhẹ a hae werriegbe, ohẹn ne ọ zọ ese nii ọre ọ yan emiowo nii.

⁸ Ohian ọghe aranmwẹ ne a ya zọ ese na giẹn uan. Ohẹn ne ọ zọ ese nii ọre ọ yan rẹn.

⁹ Izẹọhẹ ọka hia ne a fian ẹn vbe aroewu ra vbe ọkpan ra vbe uwawa, ohẹn ne ọ ya ẹe zọhẹ ne Nọyaẹnmwa ọre ọ yan rẹn.

¹⁰ Izẹọhẹ ọka ne a ma le hia, a deghẹ a ya ofigbọn gbe ẹe ra te ọ ka ẹe, avbe ohẹn Errọn hia ọre ọ yan rẹn, a ghi gha ẹre umwọmwẹ ne iran.

Isara

¹¹ “Emwamwa izẹọhẹ, isara ne a rhie gie Nọyaẹnmwa ọre ena khin.

¹² Ọmwa gha zẹ ọhẹ na do ya kpọnmwẹ Osanobua, ọ ghi mu ebrẹd ne a ma ye eyist gbe lele aranmwẹ nii gha dee, ọ sẹtin gha re ududu ne a ya irhuarhua ne a ya ofigbọn ọliv gbe ru, ra ne fẹrhẹfẹrhẹ ne a ya ofigbọn woo, ra ebrẹd ne a ya irhuarhua ne a ya ofigbọn ọliv gbe ru.

¹³ Yevbe deba ọnii, ọ ghi vbe viọ ebrẹd ne a ma ya eyist gbe rre.

¹⁴ Ọ ghi ya obọkpa ọghe egbe ebrẹd ughughan na, zẹ ọhẹ kpataki gie Nọyaẹnmwa. Ohẹn ne ọ mu esagiẹn rhurhẹ ku aka ọre ọ yan rẹn.

¹⁵ Ẹdẹ ne a ya aranmwẹ nii zọ ẹse ọre a gha vbe rri emiowo ẹre, a ghẹ gie ẹe kẹrre vbọ ne ẹdẹ gbe ẹe.

¹⁶ “A deghẹ ọmwa viọ emwi izọhẹ isara ne ọ do ya mu eyan ne ọ yanrẹn sẹ rre, ra te ọ mu ẹẹn rre ne ọ do ya ẹe ru izọhẹ akọrhọre rre, a ma kha wẹ ne a wa rri ehia fo vbe ẹdẹ ne a do ya ẹe zẹ ọhẹ, sokpan, a deghẹ ọ kẹrre, a sẹtin rri ọe vbe ẹdẹ ne ọ lele ẹe.

¹⁷ Emiowo ne ọ ye kẹrre yasẹ ikpẹdẹ ne ogieha, a ghi giẹn ọnrẹn uan.

¹⁸ A deghẹ a ye re vbọ vbe ikpẹdẹ ne ogieha, Osanobua i rhan obọ miẹn izọhẹ ọmwa nii. A i ra ka emwi izọhẹ ba emwi esi ne ọ ru sokpan a ghi ka ẹe ba nọ ma huan, ọmwaikọmwa ne ọ rri ọe, rẹn ọ ra vbe rrioya yọ.

¹⁹ A deghẹ emiowo nii dekan emwi awua, a ghẹ ghi rri ọe, sokpan a ghi giẹn ọnrẹn uan. Ọmwaikọmwa ne awua i gue sẹtin rri ọe.

²⁰ Sokpan ọmwa ne awua gue gha rri ọe, a ghẹ ka ẹe ba emwa Osanobua.

²¹ A deghẹ ọmwaikọmwa ye vbe re vbe emiowo izọese na, vbe ọ ya obọ kan emwi awua nẹ, ọre ke egbe ọmwa nagbọn ra aranmwẹ rre nọ, a ghẹ ghi ka ẹe ba emwa Osanobua.”

²² E Nọyaẹnmwa keghi viọ emwamwa na ne Mosis:

²³ “Ne ọ viọ ne ivbi Izrẹl. A ghẹ rri ẹvbi ẹmila, ohuan ra ẹwe.

²⁴ A ghẹ rri aranmwẹ ne ọ wu uwu ẹhi, ra ne aranmwẹ ọvbehe gbua, sokpan a sẹtin ya ẹe ru emwi ọvbehe ne ọ rhirhi gha khin.

²⁵ Ọmwaikọmwa ne ọ rri ẹvbi aranmwẹ ne a ya zẹ ọhẹ gie Nọyaẹnmwa a ghẹ ghi vbe ka ẹe ba emwa Osanobua ọvbehe.

²⁶ Ehe ne ọ rhirhi a khọn ivbi Izrẹl ne iran gha ye, iran ghẹ danmwẹ ọẹn ne a ye esagiẹn ahianmwẹ ra aranmwẹ ru evbare re.

²⁷ Ọmwa ne ọ rhirhi rra uhi na, a ghẹ ghi ka ẹe ba ọmwa Osanobua ọvbehe.”

²⁸ E Nọyaẹnmwa keghi viọ emwamwa na ne Mosis:

²⁹ Ne ọ viọ ne ivbi Izrẹl. “Ọmwaikọmwa ne ọ rhirhi zẹ ọhẹ isara, ọ ghi rhie vbọ gie Nọyaẹnmwa zẹ vbe ihaoko kpataki.

³⁰ Ọ ghi ya obọ ẹre viọ ẹre gha dee zẹ vbe izọhẹ evbare. Ọ ghi mu ẹvbi aranmwẹ nii kevbe ewẹn ọnrẹn, ọ ghi viọ ẹre gie Nọyaẹnmwa zẹ vbe ihaoko kpataki.

³¹ Ohẹn ghi giẹn ẹvbi ẹre vbe aka, sokpan ohẹn ọ re ọ yan ewẹn ne ọ rrọọ.

³² Owẹ ọre ne obọ erha ọmwa vbo, a ghi mu zẹ vbe oghae kpataki.

³³ Ne ohẹn ne ọ ye esagiẹn kevbe ẹvbi izọhẹ isara nii zọ ese.

³⁴ Ẹwẹn ọnrẹn keghi re oko kpataki, owẹ obọ erha ọmwa rẹn keghi re oghae kpataki ne Nọyaẹnmwa miẹn ivbi Izrẹl re viọ ne avbe ohẹn. Ọna keghi re emwi ne ọ khẹke iran, ne ivbi Izrẹl gha mwẹ iran re, kevbe orre ya sẹ orre.

³⁵ Ehe ne a viọ ne Nọyaẹnmwa vbe evbare nii, ne Nọyaẹnmwa ghi vbe viọ ne Errọn kevbe ivbi ẹre vbe ẹdẹ ne a ma iran ohẹn, ọre ena khin.

³⁶ Ẹdẹ nẹdẹrriọ ọre Nọyaẹnmwa yi ẹre iyi ne ivbi Izrẹl wẹ ne iran gha viọ vbe emwi izẹ ọhẹ ne iran. Emwamwa ne ivbi Izrẹl gha rhie owẹ lele nọ, ke orre ya sẹ orre.”

³⁷ Ena ọrọre emwamwa ne a ru vbe ọghe ese na giẹn uan, ese ọka, ese orukhọ, ese a hae werriegbe, ese na ya ma ohẹn kevbe isara.

³⁸ Uhunmwu oke Sainai ọre Nọyaẹnmwa na viọ emwamwa na ne Mosis, vbe uwu ato vbe evba nii vbe ẹdẹ ne Nọyaẹnmwa tama ivbi Izrẹl wẹ ne iran zẹ ọhẹ rre.